വാഷിംഗ്ടൺ: കൗമാരക്കാരെയും കുട്ടികളെയും തങ്ങളുടെ സോഷ്യൽ മീഡിയ പ്ലാറ്റ്ഫോമുകളിലേക്ക് മനഃപൂർവം ആകർഷിച്ച് അടിമകളാക്കി മാറ്റിയെന്ന പരാതിയിൽ ഫേസ്ബുക്ക്, ഇൻസ്റ്റാഗ്രാം എന്നിവയുടെ മാതൃകമ്പനിയായ മെറ്റയ്ക്കെതിരെയുള്ള നിർണായക നിയമപോരാട്ടത്തിന് യുഎസിൽ തുടക്കമായി. കുട്ടികളുടെ സ്വകാര്യതാ നിയമങ്ങൾ കമ്പനി ലംഘിച്ചുവെന്ന് കാണിച്ച് യുഎസിലെ 29 സംസ്ഥാനങ്ങൾ നൽകിയ സംയുക്ത ഹർജിയിലാണ് കാലിഫോർണിയ ഫെഡറൽ കോടതിയിൽ വിചാരണ ആരംഭിച്ചത്. കേസിൽ മെറ്റയിൽ നിന്ന് കോടിക്കണക്കിന് ഡോളറാണ് സംസ്ഥാനങ്ങൾ പിഴയായി ഈടാക്കാൻ ആവശ്യപ്പെടുന്നത്.
ദോഷകരമായ ദൃശ്യങ്ങൾ കണ്ടത് 100 മടങ്ങ് അധികം കുട്ടികളെന്ന് വിസിൽബ്ലോവർ
മെറ്റാ പ്ലാറ്റ്ഫോമുകളിൽ അതിക്രമങ്ങളും അശ്ലീലതയും നിറഞ്ഞ ഗ്രാഫിക് ഉള്ളടക്കങ്ങൾ കൗമാരക്കാർ കാണാനിടയായ സംഭവത്തിൽ കമ്പനി പുറത്തുവിട്ട കണക്കുകൾ വ്യാജമാണെന്ന് ആദ്യദിനം സാക്ഷിപറഞ്ഞ മുൻ മെറ്റാ ജീവനക്കാരനും വിസിൽബ്ലോവറുമായ അർതുറോ ബെജാർ വെളിപ്പെടുത്തി. കമ്പനി ഔദ്യോഗികമായി റിപ്പോർട്ട് ചെയ്തതിനേക്കാൾ കുറഞ്ഞത് 100 മടങ്ങെങ്കിലും കൂടുതൽ കുട്ടികൾ ഇത്തരം ദോഷകരമായ ദൃശ്യങ്ങൾ കാണാനിടയായിട്ടുണ്ടെന്ന് അദ്ദേഹം കോടതിയെ അറിയിച്ചു.
പ്ലാറ്റ്ഫോമുകൾ യുവാക്കളെ ദോഷകരമായി ബാധിക്കുന്നുണ്ടെന്ന് വ്യക്തമായ ബോധ്യമുണ്ടായിട്ടും മെറ്റ സുരക്ഷയ്ക്ക് ഏറ്റവും കുറഞ്ഞ പരിഗണന മാത്രമാണ് നൽകിയതെന്നും, ഉപയോക്താക്കൾക്ക് ഉണ്ടാകുന്ന ദോഷങ്ങളെക്കുറിച്ച് പൊതുജനങ്ങൾക്ക് നൽകിയ റിപ്പോർട്ടുകളിൽ കമ്പനി മനഃപൂർവം എണ്ണം കുറച്ചുകാണിച്ചുവെന്നും ബെജാർ സാക്ഷ്യപ്പെടുത്തി.
ലക്ഷ്യം ഡാറ്റ ചോർത്തലും ലാഭവും മാത്രം?
ഉപയോക്താക്കളെ ആകർഷിക്കുക, അവരെ പരമാവധി സമയം പ്ലാറ്റ്ഫോമുകളിൽ കുടുക്കി നിർത്തുക, അവരുടെ ഡാറ്റ ചോർത്തുക, ഒപ്പം ഇതിൻ്റെ ദൂഷ്യഫലങ്ങളെക്കുറിച്ചുള്ള സത്യം പൊതുജനങ്ങളിൽ നിന്ന് മറച്ചുവെക്കുക എന്നിവയാണ് മെറ്റയുടെ പ്രധാന ബിസിനസ്സ് മാതൃകയെന്ന് കാലിഫോർണിയയ്ക്ക് വേണ്ടി ഹാജരായ അഭിഭാഷക മേഗൻ ഒ നീൽ കോടതിയിൽ ആരോപിച്ചു. സ്വന്തം മാനസികാരോഗ്യ ഗവേഷണങ്ങളിൽ പോലും കമ്പനി തിരിമറി നടത്തിയതായും സംസ്ഥാനങ്ങൾ ആരോപിക്കുന്നു.
എന്നാൽ ഈ ആരോപണങ്ങളെല്ലാം മെറ്റയുടെ അഭിഭാഷകൻ പോൾ ഷ്മിറ്റ് പൂർണ്ണമായും നിഷേധിച്ചു. സോഷ്യൽ മീഡിയയുടെ ദോഷവശങ്ങളെക്കുറിച്ചുള്ള വിവരങ്ങൾ പങ്കിടുന്നതിൽ കമ്പനിക്ക് മികച്ച ചരിത്രമുണ്ടെന്നും, ഉള്ളടക്ക നിയന്ത്രണങ്ങളും പ്രായപരിധി നയങ്ങളും നടപ്പിലാക്കുന്നത് സങ്കീർണ്ണമായ കാര്യമാണെന്നും അദ്ദേഹം വാദിച്ചു. യുവാക്കളെ പിന്തുണയ്ക്കുന്നതിൽ തങ്ങൾക്കുള്ള പ്രതിബദ്ധത തെളിയിക്കുന്ന രേഖകൾ കോടതിയിൽ ഹാജരാക്കുമെന്നും മെറ്റ വ്യക്തമാക്കി.
സക്കർബർഗ് സാക്ഷി പറയാൻ വരുമോ?
കേസിൽ മെറ്റാ സിഇഓ മാർക്ക് സക്കർബർഗ് നേരിട്ട് ഹാജരായി സാക്ഷി പറയുമോ എന്ന കാര്യം ഇപ്പോൾ വ്യക്തമല്ലെന്ന് കാലിഫോർണിയ അറ്റോർണി ജനറൽ റോബ് ബോണ്ട വാർത്താസമ്മേളനത്തിൽ പറഞ്ഞു. മുൻപ് ചില കേസുകളിൽ അദ്ദേഹം വന്നിട്ടുണ്ടെങ്കിലും ഈ കേസിൽ വരുമോ എന്നത് തീരുമാനിക്കപ്പെട്ടിട്ടില്ല. ഈ കേസിൽ തോറ്റാൽ മെറ്റയ്ക്ക് 1.4 ട്രില്യൺ ഡോളർ പിഴയൊടുക്കേണ്ടി വരുമെന്ന വാർത്തകൾ അദ്ദേഹം തള്ളി. തങ്ങൾ അത്രയും വലിയ തുകയല്ല ആവശ്യപ്പെടുന്നതെന്നും, എന്നാൽ വലിയൊരു തുക പിഴയായി ഈടാക്കാൻ കോടതി ജഡ്ജിയോട് ആവശ്യപ്പെടുമെന്നും അദ്ദേഹം വ്യക്തമാക്കി.
കോടതിക്ക് പുറത്ത് കണ്ണീരോടെ മാതാപിതാക്കളുടെ പ്രതിഷേധം
സോഷ്യൽ മീഡിയയിലെ നിരന്തരമായ ഇടപെടലുകളെ തുടർന്ന് കുട്ടികളെ നഷ്ടപ്പെട്ട നിരവധി മാതാപിതാക്കളും വിവിധ കാമ്പെയ്ൻ പ്രവർത്തകരും കോടതിക്ക് പുറത്ത് തടിച്ചുകൂടിയിരുന്നു. അതിലൊരു അമ്മയുടെ അനുഭവം കൊളറാഡോ അറ്റോർണി ജനറൽ ഫിൽ വെയ്സർ കോടതിയിൽ ചൂണ്ടിക്കാണിച്ചു. തനിക്ക് ദോഷം ചെയ്യുന്ന വീഡിയോകൾ കണ്ട് അതിന് അടിമയായി മാറിയ ഒരു പെൺകുട്ടി, തൻ്റെ മാനസികാരോഗ്യ പ്രശ്നങ്ങളെക്കുറിച്ച് മാതാപിതാക്കളോട് സംസാരിക്കരുതെന്ന രീതിയിലുള്ള നിർദ്ദേശങ്ങളാണ് ഓൺലൈനിലൂടെ സ്വീകരിച്ചതെന്നും ഒടുവിൽ അവൾ ആത്മഹത്യയിൽ അഭയം പ്രാപിച്ചുവെന്നും അദ്ദേഹം പറഞ്ഞു. സോഷ്യൽ മീഡിയ സൃഷ്ടിക്കുന്ന ഈ മാനസികാരോഗ്യ പ്രതിസന്ധിക്ക് ഉടനടി പരിഹാരം വേണമെന്നും അദ്ദേഹം ആവശ്യപ്പെട്ടു.
കോടതിയിൽ ആരംഭിച്ച ഈ ചരിത്രപ്രധാനമായ വിചാരണ വരും ആഴ്ചകളിലും തുടരും. ഏകദേശം അഞ്ച് മുതൽ ഏഴ് ആഴ്ച വരെ ഇത് നീണ്ടുനിൽക്കുമെന്നാണ് നിയമവിദഗ്ധർ കണക്കാക്കുന്നത്.
‘They trapped children, stole their data, and made a profit’; It was revealed that 100 times more children saw harmful images, Meta is being tried in the US
