ഇരട്ട പൗരത്വത്തിനായി ‘ലോസ്റ്റ് കാനേഡിയൻസ്’ തിരക്ക്: കാനഡയ്ക്ക് വെല്ലുവിളിയോ?

കാനഡ: പൂർവ്വിക ബന്ധം അടിസ്ഥാനമാക്കി പൗരത്വം അനുവദിക്കുന്ന പുതിയ നിയമം പ്രാബല്യത്തിൽ വന്നതോടെ, “ലോസ്റ്റ് കാനേഡിയൻസ്” എന്ന് അറിയപ്പെടുന്ന ആയിരക്കണക്കിന് ആളുകൾ ഇരട്ട പൗരത്വത്തിനായി അപേക്ഷിച്ച് രംഗത്തെത്തി. ഇതോടെ അപേക്ഷകളുടെ വർധനവ് കൈകാര്യം ചെയ്യാൻ കാനഡ തയ്യാറാണോ എന്ന ചർച്ച ഉയരുന്നു.അഞ്ച് മക്കളിൽ ഇളയവനായ ജോ ബൗഷെർ, സഹോദരങ്ങളിൽ നിന്ന് പല കഴിവുകളും നേടിയെങ്കിലും ഫ്രഞ്ച് ഭാഷ പഠിക്കാൻ കഴിഞ്ഞില്ല. ഫ്രഞ്ച്-കാനേഡിയൻ വംശജരായ മാതാപിതാക്കൾ തമ്മിൽ ഫ്രഞ്ചിൽ സംസാരിച്ചിരുന്നുവെങ്കിലും, അവർ താമസിച്ചിരുന്ന അമേരിക്കയിലെ മെയിൻ സംസ്ഥാനത്ത് സ്കൂളുകളിൽ ഫ്രഞ്ച് പഠിപ്പിക്കുന്നത് ഒരുകാലത്ത് നിരോധിച്ചിരുന്നു. ഇതോടെ കുടുംബത്തിൽ ഇംഗ്ലീഷിന് പ്രാധാന്യം ലഭിച്ചു.

“ഫ്രഞ്ച് സംസാരിക്കുന്നവരെ രണ്ടാംതരം പൗരന്മാരായി കാണുകയും അവരെ അവഗണിക്കുകയും ചെയ്തിരുന്നു,” ബൗഷെർ പറയുന്നു.19-ാം നൂറ്റാണ്ടിലും 20-ാം നൂറ്റാണ്ടിലും തൊഴിൽ തേടി ഒരു ദശലക്ഷത്തിലധികം ഫ്രഞ്ച്-കാനേഡിയന്മാർ അമേരിക്കയിലെ ന്യൂ ഇംഗ്ലണ്ട് മേഖലയിലേക്ക് കുടിയേറി. അന്നത്തെ നിയമങ്ങൾ കാരണം, അമേരിക്കയിൽ ജനിച്ച അവരുടെ സന്തതികൾക്ക് കാനേഡിയൻ പൗരത്വം ലഭിക്കാതെ പോയി. ഇതാണ് “ലോസ്റ്റ് കാനേഡിയൻസ്” എന്ന തലമുറ രൂപപ്പെടാൻ കാരണം.

ഡിസംബറിൽ പ്രാബല്യത്തിൽ വന്ന പുതിയ നിയമം ഈ ചരിത്ര അനീതി പരിഹരിക്കുകയാണ് ലക്ഷ്യമിടുന്നത്. ഇനി കാനേഡിയൻ പൗരന്മാരുടെ മക്കൾക്ക് മാത്രമല്ല, പൂർവ്വിക ബന്ധം തെളിയിക്കാൻ കഴിയുന്ന ഏവർക്കും പൗരത്വം ലഭ്യമാകും. 2025 ഡിസംബർ 15 മുതൽ 2026 ജനുവരി 31 വരെ 12,430 അപേക്ഷകൾ ലഭിച്ചു. ഇതിൽ 6,280 എണ്ണം പരിഗണിച്ചപ്പോൾ 1,480 പേർക്ക് പൗരത്വം അനുവദിച്ചു.

അമേരിക്കൻ പ്രസിഡന്റ് ഡോണാൾഡ് ട്രംപിന്റെ രണ്ടാം കാലാവധിയുടെ ആദ്യ വർഷാവസാനത്തിൽ നിയമം പ്രാബല്യത്തിൽ വന്നത് ശ്രദ്ധേയമായി വിലയിരുത്തപ്പെടുന്നു.“ഇക്കാലത്ത് സാഹചര്യങ്ങൾ മാറുന്നുവെന്ന തോന്നൽ ഉണ്ടാകുന്നു. സ്വന്തം രാജ്യത്തോട് ബന്ധം നിലനിൽക്കുന്നതിൽ ആശ്വാസമുണ്ട്,” ബൗഷെർ പറഞ്ഞു. പുതിയ നിയമപ്രകാരം പൂർവ്വിക ബന്ധമുള്ളവർ സ്വതവേ കാനേഡിയൻ പൗരന്മാരായി കണക്കാക്കപ്പെടുന്നതിനാൽ, പൗരത്വം നേടുന്നതിനല്ല, അത് തെളിയിക്കാനാണ് അപേക്ഷ നൽകേണ്ടത്. അപേക്ഷാ ഫീസ് 75 കാനേഡിയൻ ഡോളറാണ്. എന്നാൽ രേഖകൾ ശേഖരിക്കൽ, വംശാവലി പഠനം, നിയമസഹായം തുടങ്ങിയ ചെലവുകൾ കൂടുതലാകാം.

കാനഡയുമായുള്ള ബന്ധം തെളിയിക്കാൻ പലരും പഴയ രേഖകൾ, ജനന സർട്ടിഫിക്കറ്റുകൾ, ബാപ്തിസം രേഖകൾ എന്നിവ പരിശോധിക്കേണ്ടി വരുന്നു. ഇതോടെ മോണ്ട്രിയലിലെ വംശാവലി വിദഗ്ധർ തിരക്കിലായിരിക്കുകയാണ്. “മുമ്പ് സൈഡ് ബിസിനസായിരുന്നത് ഇപ്പോൾ പൂർണ സമയ ജോലിയായി മാറി,” എന്ന് ഒരു വിദഗ്ധൻ അഭിപ്രായപ്പെട്ടു.

Thousands of ‘lost Canadians’ have applied for dual citizenship – is Canada ready?