
ഫിന്നി രാജു, ഹ്യൂസ്റ്റൺ
കാലിഫോർണിയ: ഇന്ത്യ പെന്തെക്കോസ്ത് ദൈവസഭ (ഐപിസി) ജനറൽ പ്രസിഡന്റായിരുന്ന പാസ്റ്റർ ഡോ. ടി. വൽസൻ ഏബ്രഹാമിന്റെ അനുസ്മരണ, സംസ്കാര ശുശ്രൂഷകൾ ഡിസംബർ 4, 5 തീയതികളിൽ ദക്ഷിണ കാലിഫോർണിയയിലെ മൂന്ന് കേന്ദ്രങ്ങളിലായി നടക്കും. നവംബർ നാലിന് കാലിഫോർണിയയിൽ അന്തരിച്ച അദ്ദേഹത്തിന് 74 വയസ്സായിരുന്നു. ഐപിസി വിശ്വാസിസമൂഹത്തെയും ലോകമെമ്പാടുമുള്ള പെന്തെക്കോസ്ത് സഭാനേതാക്കളെയും വിശ്വാസികളെയും ദുഃഖത്തിലാഴ്ത്തിയതായിരുന്നു അദ്ദേഹത്തിന്റെ വേർപാട്.
ഇന്ത്യയിലെ ഏറ്റവും വലിയ തദ്ദേശീയ പെന്തെക്കോസ്ത് സഭാപ്രസ്ഥാനങ്ങളിലൊന്നായ ഐപിസിക്ക് ഇന്ത്യ, ഉത്തര അമേരിക്ക, യൂറോപ്പ്, മധ്യപൂർവദേശം, ഓസ്ട്രേലിയ തുടങ്ങിയ മേഖലകളിലായി 12,000ത്തിലധികം സഭകളുണ്ട്. അനുസ്മരണ, സംസ്കാര ശുശ്രൂഷകൾഡിസംബർ നാലിന് വെള്ളിയാഴ്ച ഉച്ചകഴിഞ്ഞ് മൂന്നുമുതൽ അഞ്ചുവരെ ഒന്റാറിയോയിലെ ഇന്ത്യ ക്രിസ്ത്യൻ അസംബ്ലിയിൽ അനുസ്മരണ സമ്മേളനം (Evening of Tributes) നടക്കും.
വിലാസം: 1355 W. 6th Street, Ontario, California 91762.ഡിസംബർ അഞ്ചിന് ശനിയാഴ്ച രാവിലെ പത്തിന് പസഡീനയിലെ ലേക്ക് അവന്യൂ ചർച്ചിൽ (Lake Avenue Church) ജീവിതാനുസ്മരണ ശുശ്രൂഷ (Celebration of Life) നടക്കും. വിലാസം: 393 N. Lake Avenue, Pasadena, California 91101.
തുടർന്ന് അന്നേദിവസം ഉച്ചകഴിഞ്ഞ് രണ്ടിന് ഗ്ലെൻഡെയിലിലെ ഫോറസ്റ്റ് ലോൺ സെമിത്തേരിയിൽ സംസ്കാര ശുശ്രൂഷകൾ നടക്കും. വിലാസം: Forest Lawn Glendale, 1712 S. Glendale Avenue, Glendale, California 91205.
എല്ലാ സമയങ്ങളും പസഫിക് സ്റ്റാൻഡേർഡ് സമയം അനുസരിച്ചാണ്.ഡോ. വൽസൻ ഏബ്രഹാമിന് അന്ത്യാഞ്ജലി അർപ്പിക്കാനും അനുസ്മരണ, സംസ്കാര ശുശ്രൂഷകളിൽ പങ്കെടുക്കാനുമായി ആയിരക്കണക്കിന് വിശ്വാസികൾ എത്തുമെന്നാണ് പ്രതീക്ഷിക്കുന്നത്. ഇന്ത്യ, അമേരിക്ക, കാനഡ തുടങ്ങി ലോകത്തിന്റെ വിവിധ ഭാഗങ്ങളിൽനിന്നുള്ള സഭാനേതാക്കളും പാസ്റ്റർമാരും സുവിശേഷപ്രവർത്തകരും വിശ്വാസികളും അദ്ദേഹത്തിന് അന്തിമോപചാരം അർപ്പിക്കാൻ കാലിഫോർണിയയിൽ എത്തുമെന്നാണ് പ്രതീക്ഷ.
നൂറ്റാണ്ടിലേറെ പഴക്കമുള്ള ആത്മീയ പൈതൃകംഐപിസിയുടെ പ്രധാന സ്ഥാപക നേതാക്കളിലൊരാളായ പാസ്റ്റർ കെ. ഇ. ഏബ്രഹാമിന്റെ പൗത്രനും മുൻ ജനറൽ പ്രസിഡന്റ് പാസ്റ്റർ ടി. എസ്. ഏബ്രഹാമിന്റെ പുത്രനുമായിരുന്നു ഡോ. ടി. വൽസൻ ഏബ്രഹാം. 1920കളുടെ തുടക്കത്തിൽ കേരളത്തിലുണ്ടായ പെന്തെക്കോസ്ത് ആത്മീയ ഉണർവിൽനിന്നാണ് ഐപിസി പ്രസ്ഥാനത്തിന്റെ ആരംഭം. പാസ്റ്റർ കെ. ഇ. ഏബ്രഹാമിനൊപ്പം പാസ്റ്റർ പി. എം. സാമുവൽ, പാസ്റ്റർ കെ. സി. ചെറിയാൻ, പാസ്റ്റർ പി. ടി. ചാക്കോ, പാസ്റ്റർ കെ. സി. ഉമ്മൻ തുടങ്ങി നിരവധി ദൈവദാസന്മാരുടെയും വിശ്വാസികളുടെയും പ്രാർത്ഥനയും ത്യാഗവും അർപ്പണബോധവുമാണ് പ്രസ്ഥാനത്തിന്റെ വളർച്ചയ്ക്ക് അടിത്തറ പാകിയത്.
കേരളത്തിലെ എളിയ തുടക്കത്തിൽനിന്ന് ലോകവ്യാപകമായ പെന്തെക്കോസ്ത് പ്രസ്ഥാനമായി ഐപിസി വളർന്നു.1935ൽ ആന്ധ്രാപ്രദേശിലെ ഏലൂരിൽ സഭ ഔദ്യോഗികമായി രജിസ്റ്റർ ചെയ്തു. പാസ്റ്റർ പി. എം. സാമുവൽ ആദ്യ ജനറൽ പ്രസിഡന്റായും പാസ്റ്റർ പി. ടി. ചാക്കോ ജനറൽ സെക്രട്ടറിയായും പ്രവർത്തിച്ചു. കേരളത്തിലെ കുമ്പനാട് ഹെബ്രോനിലാണ് സഭയുടെ അന്താരാഷ്ട്ര ആസ്ഥാനം. നൂറ്റാണ്ടിലേറെ പഴക്കമുള്ള ഈ ആത്മീയ പൈതൃകം തുടർന്നുകൊണ്ടാണ് ഡോ. വൽസൻ ഏബ്രഹാം സഭയുടെ നേതൃത്വത്തിലെത്തിയത്.
2006 മുതൽ 2013 വരെ ഐപിസി ജനറൽ സെക്രട്ടറിയായിരുന്ന അദ്ദേഹം 2019ൽ ജനറൽ പ്രസിഡന്റായി ചുമതലയേറ്റു.ഇന്ത്യയിലെ ഓരോ പിൻകോഡ് മേഖലയിലും സഭ; സുവിശേഷവ്യാപനം ജീവിതദർശനം ഇന്ത്യയുടെ എല്ലാ ഭാഗങ്ങളിലേക്കും യേശുക്രിസ്തുവിന്റെ സുവിശേഷം എത്തിക്കുകയെന്നത് ഡോ. വൽസൻ ഏബ്രഹാമിന്റെ പ്രധാന ജീവിതദർശനങ്ങളിലൊന്നായിരുന്നു. 1984ൽ അദ്ദേഹം സ്ഥാപിച്ച ഇന്ത്യ ഗോസ്പൽ ഔട്ട്റീച്ച് (ഐജിഒ) ഇന്ത്യയിലെ സുവിശേഷവ്യാപനത്തിനും തദ്ദേശീയ സുവിശേഷപ്രവർത്തകരുടെ പരിശീലനത്തിനും പ്രത്യേക പ്രാധാന്യം നൽകി.
ഇന്ത്യ ഗോസ്പൽ ഔട്ട്റീച്ച്, ഇന്ത്യ ബൈബിൾ കോളജ് ആൻഡ് സെമിനാരി, മറ്റു വേദപഠന പരിശീലനകേന്ദ്രങ്ങൾ എന്നിവയിലൂടെ ആയിരക്കണക്കിന് പാസ്റ്റർമാരെയും സുവിശേഷകരെയും മിഷനറിമാരെയും ക്രൈസ്തവ ശുശ്രൂഷകരെയും പരിശീലിപ്പിക്കുന്നതിന് അദ്ദേഹത്തിന്റെ നേതൃത്വത്തിലുള്ള പ്രവർത്തനങ്ങൾ സഹായകമായി. ഇന്ത്യയിലെ വിവിധ ഭാഷാവിഭാഗങ്ങളിലേക്കും ജനസമൂഹങ്ങളിലേക്കും അവരുടെ ഭാഷയിലും സംസ്കാരത്തിലും സുവിശേഷം എത്തിക്കുന്നതിനായി തദ്ദേശീയരായ ദൈവദാസന്മാരെ പരിശീലിപ്പിച്ച് നിയോഗിക്കുകയെന്നതായിരുന്നു അദ്ദേഹത്തിന്റെ പ്രധാന ലക്ഷ്യം.
ഇന്ത്യയിലെ ഓരോ തപാൽ പിൻകോഡ് മേഖലയിലും ഒരു സഭ സ്ഥാപിക്കണമെന്നത് അദ്ദേഹത്തിന്റെ ശ്രദ്ധേയമായ സുവിശേഷ ദർശനങ്ങളിലൊന്നായിരുന്നു. ഈ ദർശനം മുന്നോട്ടുകൊണ്ടുപോകാനുള്ള പ്രവർത്തനങ്ങൾ തുടരുമെന്നാണ് അറിയിച്ചിരിക്കുന്നത്. പുതിയ സഭകളുടെ സ്ഥാപനത്തിനും ആത്മീയ നേതാക്കളെ വളർത്തിയെടുക്കുന്നതിനും സുവിശേഷം അധികം എത്തിച്ചേരാത്ത പ്രദേശങ്ങളിലെ പ്രവർത്തനങ്ങൾക്കും അദ്ദേഹം പ്രത്യേക പ്രാധാന്യം നൽകി.
ഇന്ത്യ ബൈബിൾ കോളജ് ആൻഡ് സെമിനാരിയുടെ പ്രസിഡന്റായും പ്രവർത്തിച്ച അദ്ദേഹം 1987ൽ കാലിഫോർണിയയിൽ സ്ഥാപിച്ച ഇന്ത്യ ക്രിസ്ത്യൻ അസംബ്ലിയുടെ സ്ഥാപക സീനിയർ പാസ്റ്ററുമായിരുന്നു.പ്രസംഗകൻ, വേദാധ്യാപകൻ, സഭാഭരണനേതാവ്, ആത്മീയ ഉപദേശകൻ എന്നീ നിലകളിൽ ഇന്ത്യയിലും അമേരിക്കയിലും മറ്റു രാജ്യങ്ങളിലുമുള്ള വിശ്വാസിസമൂഹത്തിൽ അദ്ദേഹം ശ്രദ്ധേയമായ സ്വാധീനം ചെലുത്തി.
ആത്മീയലോകത്തിന് തീരാനഷ്ടംഡോ. ടി. വൽസൻ ഏബ്രഹാമിന്റെ വേർപാട് ഐപിസി പ്രസ്ഥാനത്തിനും ലോകമെമ്പാടുമുള്ള പെന്തെക്കോസ്ത് വിശ്വാസിസമൂഹത്തിനും വലിയ നഷ്ടമാണ്. സുവിശേഷവ്യാപനം, സഭാസ്ഥാപനം, വേദപഠനം, ആത്മീയ നേതൃത്വപരിശീലനം എന്നീ മേഖലകളിൽ അദ്ദേഹം നൽകിയ സംഭാവനകൾ ആയിരക്കണക്കിന് വിശ്വാസികളുടെയും ശുശ്രൂഷകരുടെയും ജീവിതത്തിൽ സ്വാധീനം ചെലുത്തിയിട്ടുണ്ട്.
ഭാര്യ ലാലി ഏബ്രഹാം, നാലു മക്കൾ, സഹോദരിമാരായ ആനി, സ്റ്റാർല, ഷേർലി എന്നിവർ കുടുംബാംഗങ്ങളാണ്.ഇന്ത്യയിലുടനീളം സുവിശേഷം എത്തിക്കണമെന്ന അദ്ദേഹത്തിന്റെ ദർശനവും സഭയ്ക്കും ദൈവരാജ്യവ്യാപനത്തിനുമായി സമർപ്പിച്ച ജീവിതവും വരുംതലമുറകൾക്ക് പ്രചോദനമായി നിലനിൽക്കും. ഡിസംബർ നാലിനും അഞ്ചിനും കാലിഫോർണിയയിൽ നടക്കുന്ന അനുസ്മരണ, സംസ്കാര ശുശ്രൂഷകളിൽ അദ്ദേഹത്തിന്റെ ജീവിതത്തെയും സുവിശേഷപ്രവർത്തനങ്ങളെയും ആത്മീയ നേതൃത്വത്തെയും നന്ദിയോടെ അനുസ്മരിക്കും.
Tribute to IPC General President Dr. T. Valsan Abraham; funeral services to be held in California on December 4 and 5, with believers expected to attend to pay their final respects.













