വാഷിംഗ്ടൺ: രാജ്യത്തെ നിലവിലെ സാഹചര്യങ്ങളിൽ വോട്ടർമാർക്കിടയിൽ അതൃപ്തി നിലനിൽക്കുന്നുണ്ടെന്ന തിരിച്ചറിവിൽ, വരാനിരിക്കുന്ന നവംബറിലെ മിഡ്ടേം തിരഞ്ഞെടുപ്പിനായി പുതിയ രാഷ്ട്രീയ തന്ത്രങ്ങൾ മെനഞ്ഞ് പ്രസിഡന്റ് ഡോണൾഡ് ട്രംപും സംഘവും. ഭരണത്തിന്റെ വിലയിരുത്തലായി തിരഞ്ഞെടുപ്പിനെ മാറ്റുന്നതിന് പകരം, ഇരു പാർട്ടികളുടെയും നയങ്ങൾ തമ്മിലുള്ള തിരഞ്ഞെടുപ്പായി ഇതിനെ അവതരിപ്പിക്കാനാണ് റിപ്പബ്ലിക്കൻ പാർട്ടിയുടെ തീരുമാനം. ഡെമോക്രാറ്റുകൾ അധികാരത്തിൽ തിരിച്ചെത്തിയാൽ കാര്യങ്ങൾ കൂടുതൽ വഷളാകുമെന്ന് വോട്ടർമാരെ ബോധ്യപ്പെടുത്താനാണ് ട്രംപിന്റെ ഉപദേശകർ പദ്ധതിയിടുന്നത്.ട്രംപിന്റെ പ്രവർത്തനങ്ങളിൽ ജനങ്ങൾക്ക് അതൃപ്തിയുണ്ടെങ്കിലും ചില പ്രധാന വിഷയങ്ങളിൽ ഇപ്പോഴും റിപ്പബ്ലിക്കൻ പാർട്ടിയിലാണ് ജനങ്ങൾ വിശ്വാസമർപ്പിക്കുന്നത് എന്ന ആഭ്യന്തര പോളിംഗ് ഫലമാണ് ഇത്തരമൊരു നീക്കത്തിന് പിന്നിൽ. ചീഫ് ഓഫ് സ്റ്റാഫ് സൂസി വൈൽസ്, ജെയിംസ് ബ്ലെയർ തുടങ്ങിയ പ്രമുഖർ വാഷിംഗ്ടണിൽ നടന്ന രഹസ്യ യോഗത്തിൽ ഈ തന്ത്രങ്ങൾ വിശദീകരിച്ചു. നിലവിലെ പുരോഗതിയുമായി മുന്നോട്ട് പോകണോ അതോ റെക്കോർഡ് നാണയപ്പെരുപ്പത്തിലേക്കും വർദ്ധിച്ചുവരുന്ന കുറ്റകൃത്യങ്ങളിലേക്കും തിരിച്ചുപോകണോ എന്നതാണ് വോട്ടർമാരുടെ മുന്നിലുള്ള ചോദ്യമെന്ന് നേതാക്കൾ വ്യക്തമാക്കുന്നു.മിഡിൽ ഈസ്റ്റിലെ യുദ്ധവും വർദ്ധിച്ചുവരുന്ന ജീവിതച്ചെലവും ഭരണപക്ഷത്തിന് വലിയ വെല്ലുവിളിയാണ് ഉയർത്തുന്നത്. ഇതിനിടെ വെർജീനിയയിലെ പുതിയ മണ്ഡല പുനർനിർണ്ണയ നടപടികൾ ഡെമോക്രാറ്റുകൾക്ക് അനുകൂലമായേക്കാമെന്നതും റിപ്പബ്ലിക്കൻ പാർട്ടിയെ പ്രതിരോധത്തിലാക്കുന്നുണ്ട്. നിലവിൽ പ്രതിനിധി സഭയിൽ കേവലം നാല് സീറ്റുകളുടെ മാത്രം ഭൂരിപക്ഷമുള്ള റിപ്പബ്ലിക്കൻ പാർട്ടിക്ക്, വരാനിരിക്കുന്ന തിരഞ്ഞെടുപ്പ് ഭരണത്തുടർച്ചയ്ക്കും രാഷ്ട്രീയ നിലനിൽപ്പിനും അതീവ നിർണ്ണായകമാണ്. ഈ പ്രതിസന്ധികളെ മറികടക്കാൻ നയപരമായ താരതമ്യത്തിലൂടെ വോട്ടർമാരെ സ്വാധീനിക്കാനാണ് ട്രംപ് പക്ഷം ലക്ഷ്യമിടുന്നത്.
