വാഷിങ്ടൺ: ഇറാൻ തങ്ങളുടെ ആണവനിലയങ്ങളിൽ ‘ഏറ്റവും ഉയർന്ന തലത്തിലുള്ള പരിശോധനകൾക്ക്’ അനന്തകാലത്തേക്ക് സമ്മതിച്ചിട്ടുണ്ടെന്ന് യുഎസ് പ്രസിഡന്റ് ഡോണൾഡ് ട്രംപ്. യുഎന്നിന്റെ ആണവ നിരീക്ഷണ ഏജൻസിയുമായുള്ള സഹകരണത്തിൽ യാതൊരു മാറ്റവുമില്ലെന്ന് ഇറാൻ വ്യക്തമാക്കിയതിന് തൊട്ടുപിന്നാലെയാണ് ട്രംപിന്റെ ഈ അവകാശവാദം. “ഭാവിയിലേക്ക് (അനന്തകാലത്തേക്ക്!!!) ഏറ്റവും ഉയർന്ന തലത്തിലുള്ള ആണവ പരിശോധനകൾക്ക് ഇറാൻ പൂർണ്ണമായും സമ്മതിച്ചിട്ടുണ്ട്. ഇത് ആണവരംഗത്തെ സുതാര്യത ഉറപ്പാക്കും. അവർ ഇതിന് സമ്മതിച്ചിരുന്നില്ലെങ്കിൽ കൂടുതൽ ചർച്ചകൾ ഉണ്ടാകുമായിരുന്നില്ല,” തന്റെ സമൂഹമാധ്യമ പ്ലാറ്റ്ഫോമായ ‘ട്രൂത്ത് സോഷ്യലിൽ’ ട്രംപ് കുറിച്ചു.
കഴിഞ്ഞ വാരാന്ത്യത്തിൽ സ്വിറ്റ്സർലൻഡിൽ ആരംഭിച്ച ചർച്ചകളെച്ചൊല്ലി ഇരുരാജ്യങ്ങളും തമ്മിൽ നിലനിൽക്കുന്ന പരസ്പരവിരുദ്ധമായ പ്രസ്താവനകളുടെ തുടർച്ചയായിരുന്നു ഇത്. അന്താരാഷ്ട്ര ആണവോർജ്ജ ഏജൻസിയിലെ ഇൻസ്പെക്ടർമാരെ രാജ്യത്തേക്ക് പ്രവേശിപ്പിക്കാൻ ഇറാൻ സമ്മതിച്ചതോടെ ചർച്ചകളിൽ ‘വലിയൊരു നാഴികക്കല്ല്’ പിന്നിട്ടതായി യുഎസ് വൈസ് പ്രസിഡന്റ് ജെ.ഡി. വാൻസും കഴിഞ്ഞ ദിവസം അവകാശപ്പെട്ടിരുന്നു. എന്നാൽ, ആണവ ഏജൻസിയുമായുള്ള സഹകരണം നിലവിലുള്ള ചട്ടങ്ങൾക്കും നടപടിക്രമങ്ങൾക്കും വിധേയമായി മാത്രമേ തുടരൂ എന്നാണ് മണിക്കൂറുകൾക്ക് ശേഷം ടെഹ്റാൻ പ്രതികരിച്ചത്.
കഴിഞ്ഞ ആഴ്ച ഇറാനുമായി ഒപ്പുവെച്ച ധാരണാപത്രത്തിന്റെ ഭാഗമായി, ഇറാന്റെ തുറമുഖങ്ങൾക്ക് മേൽ ഏർപ്പെടുത്തിയിരുന്ന യുഎസ് ഉപരോധം പിൻവലിച്ച നടപടി തുടരുമെന്ന് ട്രംപ് തന്റെ പോസ്റ്റിൽ വീണ്ടും വ്യക്തമാക്കി. കൂടാതെ, ഇറാൻ്റെ മരവിപ്പിച്ച ഫണ്ടുകൾ വിട്ടുനൽകുന്നത് കർശനമായ നിബന്ധനകളോടെ മാത്രമായിരിക്കുമെന്നും അദ്ദേഹം അവകാശപ്പെട്ടു. മോചിപ്പിക്കുന്ന പണം അമേരിക്കയിൽ നിന്ന് മാത്രമായി ധാന്യങ്ങൾ (ചോളം, ഗോതമ്പ്, സോയാബീൻ) ഉൾപ്പെടെയുള്ള ഭക്ഷണസാധനങ്ങളും മരുന്നുകളും വാങ്ങാൻ മാത്രമേ ഉപയോഗിക്കാവൂ എന്നാണ് നിബന്ധന. “ഇവയെല്ലാം ഇറാൻ്റെ ജനങ്ങൾക്ക് ഇപ്പോൾ അടിയന്തരമായി ആവശ്യമുള്ള കാര്യങ്ങളാണ്. അവിടെ നിലനിൽക്കുന്നത് ഒരു മാനുഷിക പ്രതിസന്ധിയാണ്, വളരെ വൈകുന്നതിന് മുൻപ് ഇപ്പോൾത്തന്നെ അവരെ സഹായിക്കേണ്ടത് ആവശ്യമാണെന്ന് ഞാൻ കരുതുന്നു. ചർച്ചകൾ മികച്ച രീതിയിലാണ് മുന്നോട്ട് പോകുന്നത്,” ട്രംപ് കൂട്ടിച്ചേർത്തു.
