വാഷിംഗ്ടൺ: അമേരിക്കൻ തിരഞ്ഞെടുപ്പുകളുടെ സുരക്ഷയും വിശ്വാസ്യതയും സംബന്ധിച്ച് രാജ്യാന്തര ശ്രദ്ധയാകർഷിക്കുന്ന പ്രൈം ടൈം പ്രസംഗവുമായി പ്രസിഡന്റ് ഡോണൾഡ് ട്രംപ് രംഗത്ത്. വരാനിരിക്കുന്ന നിർണായകമായ ഇടക്കാല തിരഞ്ഞെടുപ്പിന് മുന്നോടിയായാണ് രാജ്യത്തെ അഭിസംബോധന ചെയ്തുകൊണ്ടുള്ള ട്രംപിന്റെ ഈ നീക്കം. തിരഞ്ഞെടുപ്പ് സുരക്ഷയുമായി ബന്ധപ്പെട്ട് വളരെ പ്രധാനപ്പെട്ടതും രാജ്യം ഞെട്ടുന്നതുമായ ചില വിവരങ്ങൾ പ്രസംഗത്തിൽ വെളിപ്പെടുത്തുമെന്നാണ് വൈറ്റ് ഹൗസ് വൃത്തങ്ങൾ നൽകുന്ന സൂചന.
മുൻ തിരഞ്ഞെടുപ്പുകളിൽ ചൈനയുടെ ഇടപെടൽ ഉണ്ടായിട്ടുണ്ടെന്ന തരത്തിലുള്ള രഹസ്യാന്വേഷണ രേഖകൾ ട്രംപ് പുറത്തുവിട്ടേക്കുമെന്നും റിപ്പോർട്ടുകളുണ്ട്. വോട്ടിംഗ് മെഷീനുകളുടെ സുരക്ഷ, മെയിൽ-ഇൻ ബാലറ്റുകളുടെ നിയന്ത്രണം, വോട്ടർമാർക്ക് കർശനമായ തിരിച്ചറിയൽ കാർഡ് നിർബന്ധമാക്കൽ തുടങ്ങിയ വിഷയങ്ങൾ പ്രസംഗത്തിൽ പ്രധാന ചർച്ചയാകും. “തിരഞ്ഞെടുപ്പ് സുരക്ഷയെക്കുറിച്ച് വളരെ നിർണായകമായ പ്രഖ്യാപനമാണ് പ്രസിഡന്റ് നടത്താൻ പോകുന്നത്. സുതാര്യമായ തിരഞ്ഞെടുപ്പ് ഇല്ലെങ്കിൽ നമുക്കൊരു രാജ്യമില്ല.” എന്നാണ് വൈറ്റ് ഹൗസ് പ്രസ് സെക്രട്ടറി കാരോലിൻ ലെവിറ്റ് വ്യക്തമാക്കിയത്.
അതേസമയം, ട്രംപിന്റെ ഈ പ്രൈം ടൈം പ്രസംഗത്തിനെതിരെ പ്രതിപക്ഷമായ ഡെമോക്രാറ്റുകൾ ശക്തമായി രംഗത്തെത്തിയിട്ടുണ്ട്. വരാനിരിക്കുന്ന ഇടക്കാല തിരഞ്ഞെടുപ്പിന്റെ സുതാര്യതയെ തകർക്കാനും, വോട്ടർമാർക്കിടയിൽ അവിശ്വാസം വളർത്താനുമാണ് ട്രംപ് ഔദ്യോഗിക പദവി ദുരുപയോഗം ചെയ്യുന്നതെന്ന് ഡെമോക്രാറ്റിക് നേതാക്കൾ ആരോപിച്ചു. ട്രംപിന്റെ ഈ പെട്ടെന്നുള്ള നീക്കത്തിൽ അദ്ദേഹത്തിന്റെ സ്വന്തം റിപ്പബ്ലിക്കൻ പാർട്ടിയിലെ ചില നേതാക്കൾക്കും ആശങ്കയുണ്ട്. ജനങ്ങളുടെ ജീവിതച്ചെലവ്, പണപ്പെരുപ്പം തുടങ്ങിയ പ്രധാന വിഷയങ്ങളിൽ നിന്ന് ശ്രദ്ധ തിരിക്കാൻ ഈ പ്രസംഗം കാരണമായേക്കുമെന്നാണ് അവരുടെ വിലയിരുത്തൽ. അമേരിക്കൻ സമയം വ്യാഴാഴ്ച രാത്രി 9 മണിക്ക് (ഇന്ത്യൻ സമയം വെള്ളിയാഴ്ച പുലർച്ചെ) വൈറ്റ് ഹൗസിലെ ഈസ്റ്റ് റൂമിൽ നിന്നാണ് ട്രംപ് ജനങ്ങളെ അഭിസംബോധന ചെയ്യുന്നത്. പ്രമുഖ അമേരിക്കൻ വാർത്താ ചാനലുകൾ ഈ പ്രസംഗം തത്സമയം സംപ്രേഷണം ചെയ്യുമോ എന്ന കാര്യത്തിൽ ഇപ്പോഴും ചർച്ചകൾ തുടരുകയാണ്.
Trump makes crucial move as midterm elections approach; will address the nation today with crucial revelations on election security
