വാഷിംഗ്ടൺ: ഇറാൻ്റെ ആണവപദ്ധതി പൂർണ്ണമായി അവസാനിപ്പിക്കണമെന്ന മുൻ നിലപാടിൽ നിന്ന് യുഎസ് പ്രസിഡൻ്റ് ഡോണൾഡ് ട്രംപ് പിന്നോട്ട് പോകുന്നതായി സൂചന. ഇറാൻ്റെ ആണവപദ്ധതി 20 വർഷത്തേക്ക് നിർത്തിവെക്കുന്നത് താൻ അംഗീകരിക്കുമെന്ന് ട്രംപ് പ്രസ്താവിച്ചു. എന്നാൽ ഇത് വെറുമൊരു പ്രഖ്യാപനമല്ലെന്നും, “യഥാർത്ഥ 20 വർഷം” ആണെന്ന് ഉറപ്പുവരുത്താൻ കൃത്യമായ ഗ്യാരണ്ടി വേണമെന്നും അദ്ദേഹം വ്യക്തമാക്കി.
ആയുധ നിർമ്മാണത്തിൻ്റെ പ്രധാന ഘട്ടമായ യുറേനിയം സമ്പുഷ്ടീകരണം ഇറാൻ സ്ഥിരമായി നിർത്തണമെന്നായിരുന്നു ട്രംപ് മുൻപ് ആവശ്യപ്പെട്ടിരുന്നത്. ചർച്ചകളിൽ പുരോഗതിയൊന്നും കാണാത്ത സാഹചര്യത്തിൽ ഇറാനോടുള്ള തൻ്റെ ക്ഷമ നശിച്ചുകൊണ്ടിരിക്കുകയാണെന്ന് ബീജിംഗിൽ ചൈനീസ് പ്രസിഡൻ്റ് ഷി ജിൻപിംഗുമായുള്ള കൂടിക്കാഴ്ചയ്ക്ക് ശേഷം മാധ്യമപ്രവർത്തകരോട് സംസാരിക്കവെ അദ്ദേഹം പറഞ്ഞു.
ഫെബ്രുവരി 28-നാണ് ഇസ്രായേലും യുഎസും സംയുക്തമായി ഇറാനിൽ വ്യോമാക്രമണം ആരംഭിച്ചത്. നിലവിൽ ചർച്ചകൾക്കായി പ്രഖ്യാപിച്ച വെടിനിർത്തൽ ഇരുപക്ഷവും വലിയതോതിൽ പാലിക്കുന്നുണ്ട്. പാകിസ്ഥാനാണ് ഇരുരാജ്യങ്ങൾക്കുമിടയിൽ മധ്യസ്ഥനായി പ്രവർത്തിക്കുന്നത്. എന്നാൽ യുദ്ധം അവസാനിപ്പിക്കാനായി ഇരുപക്ഷവും മുന്നോട്ടുവെച്ച നിർദ്ദേശങ്ങൾ പരസ്പരം നിരസിച്ചതിനാൽ സമാധാന ചർച്ചകൾ ഇപ്പോഴും പ്രതിസന്ധിയിലാണ്. എല്ലാ മുന്നണികളിലെയും യുദ്ധം അവസാനിപ്പിക്കുക, ലെബനനിലെ ഹിസ്ബുള്ളയ്ക്കെതിരെയുള്ള ഇസ്രായേൽ ആക്രമണം നിർത്തുക, ഇറാനിയൻ തുറമുഖങ്ങൾക്കെതിരെയുള്ള യുഎസ് നാവിക ഉപരോധം പിൻവലിക്കുക എന്നിവയാണ് ഇറാൻ്റെ പ്രധാന ആവശ്യങ്ങൾ. എന്നാൽ ഇറാന് ആണവായുധം നിർമ്മിക്കാൻ അനുവാദം നൽകില്ലെന്നും, അവർ തടസ്സപ്പെടുത്തിയിരിക്കുന്ന ഹോർമുസ് കടലിടുക്ക് വീണ്ടും തുറക്കണമെന്നുമാണ് യുഎസിൻ്റെയും ചൈനയുടെയും നിലപാട്.
ഇസ്ലാമാബാദിൽ നടന്ന ചർച്ചയ്ക്കിടെ, യുറേനിയം സമ്പുഷ്ടീകരണം അഞ്ച് വർഷത്തേക്ക് നിർത്താമെന്ന ഇറാൻ്റെ നിർദ്ദേശത്തിന്, കുറഞ്ഞത് 20 വർഷമെങ്കിലും വേണമെന്ന് യുഎസ് വൈസ് പ്രസിഡന്റ് ജെ.ഡി. വാൻസ് നിർബന്ധം പിടിച്ചതായി ഏപ്രിലിൽ യുഎസ് മാധ്യമങ്ങൾ റിപ്പോർട്ട് ചെയ്തിരുന്നു. എന്നാൽ, ട്രംപ് നേരിട്ട് 20 വർഷത്തെ സമയപരിധിയെക്കുറിച്ച് പരാമർശിക്കുന്നത് ഇതാദ്യമായാണ്.
ട്രംപിൻ്റെ പുതിയ പ്രസ്താവനയോട് ഇസ്രായേൽ ഇതുവരെ ഔദ്യോഗികമായി പ്രതികരിച്ചിട്ടില്ല. എങ്കിലും, ഇറാൻ്റെ പക്കലുള്ള സമ്പുഷ്ടീകരിച്ച യുറേനിയം ശേഖരം പൂർണ്ണമായും ഇല്ലാതാക്കാതെ യുദ്ധം അവസാനിപ്പിക്കില്ലെന്ന നിലപാടിലാണ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. ഒബാമ ഭരണകൂടത്തിൻ്റെ കാലത്തെ 2015-ലെ ആണവ കരാറിനെ നെതന്യാഹു ശക്തമായി എതിർത്തിരുന്നു. കാലക്രമേണ ഇറാന് മേലുള്ള നിയന്ത്രണങ്ങൾ ഇല്ലാതാകുന്ന ‘സൺസെറ്റ് ക്ലോസുകൾ’ ഇറാനെ വീണ്ടും ആണവായുധം നിർമ്മിക്കാൻ സഹായിക്കുമെന്നാണ് ഇസ്രായേലിൻ്റെ ആശങ്ക.
Trump says Iran’s nuclear program should be halted for 20 years
