ഇറാനെതിരായ സൈനികാക്രമണം ഞായറാഴ്ച തന്നെ പുനരാരംഭിച്ചേക്കുമെന്ന് യുഎസ് പ്രസിഡന്റ് ഡോണൾഡ് ട്രംപ്. അതേസമയം, ഇറാനുമായി ഒരു കരാറിലെത്താനുള്ള സാധ്യതയും അദ്ദേഹം തള്ളിയില്ല. ഹോർമുസ് കടലിടുക്ക് തുറക്കുന്നതിനായി അമേരിക്കയുമായി കരാറിന് ഇറാൻ താൽപര്യപ്പെടുന്നുണ്ടെങ്കിലും വ്യവസ്ഥകൾ പാലിക്കുമോയെന്ന കാര്യത്തിൽ സംശയമുണ്ടെന്ന് ട്രംപ് പറഞ്ഞു.
ശനിയാഴ്ച ഫ്ലോറിഡയിൽ വോട്ട് രേഖപ്പെടുത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ഇറാനെ വീണ്ടും ആക്രമിക്കുമോയെന്ന ചോദ്യത്തിന്, “ഞാൻ അക്കാര്യം നിങ്ങളോട് പറയുമെന്ന് കരുതുന്നുണ്ടോ? ഒരുപക്ഷേ നാളെ. ആക്രമണത്തിന് സാധ്യതയുണ്ട്. അതുപോലെ നല്ലൊരു കരാറിലെത്താനും സാധ്യതയുണ്ട്. അവർ കരാറിന് ആഗ്രഹിക്കുന്നുണ്ട്. എന്നാൽ അത് പാലിക്കുമോയെന്നതാണ് പ്രശ്നം,” ട്രംപ് പറഞ്ഞു.
അമേരിക്കൻ നാവികസേനയും സൈന്യവും മികച്ച പ്രകടനമാണ് കാഴ്ചവച്ചതെന്ന് അവകാശപ്പെട്ട ട്രംപ്, ഇറാന്റെ എല്ലാ യുദ്ധവിമാനങ്ങളും തകർത്തതായും 259 കപ്പലുകൾ കടലിന്റെ അടിത്തട്ടിലായെന്നും പറഞ്ഞു. റെക്കോർഡ് പണപ്പെരുപ്പം മാത്രമാണ് ഇറാന് ഇനി ശേഷിക്കുന്നതെന്നും അദ്ദേഹം അവകാശപ്പെട്ടു.
അതേസമയം, അമേരിക്ക നാവിക ഉപരോധം പിൻവലിച്ചാൽ ഹോർമുസ് കടലിടുക്ക് തുറന്നുകൊടുക്കാമെന്ന് ഇറാൻ നിർദേശം മുന്നോട്ടുവച്ചെന്ന റിപ്പോർട്ട് ടെഹ്‌റാൻ നിഷേധിച്ചു. പാകിസ്ഥാൻ മധ്യസ്ഥർ വഴി ഇത്തരമൊരു നിർദേശം നൽകിയിട്ടില്ലെന്ന് ഇറാന്റെ തസ്നിം വാർത്താ ഏജൻസി റിപ്പോർട്ട് ചെയ്തു. സൗദി മാധ്യമങ്ങളിൽ വന്ന വാർത്തകൾ “നുണയും കെട്ടിച്ചമച്ചതുമാണെന്ന്” പ്രസ് ടിവിയും പ്രതികരിച്ചു.
Trump says US could attack Iran ‘maybe tomorrow’ as Tehran denies offering deal to reopen Hormuz
