ഹോർമുസ് കടലിടുക്ക് യുഎസ് കീഴടക്കുമെന്ന് ട്രംപ്; നടക്കില്ലെന്ന് ഇറാൻ

ന്യൂയോർക്ക്/ടെഹ്‌റാൻ: ഇറാൻ്റെ മേൽ സൈനിക വിജയം നേടിയ ശേഷം തന്ത്രപ്രധാനമായ ഹോർമുസ് കടലിടുക്ക് അമേരിക്കയുടെ സ്വന്തം പ്രദേശമായി പ്രഖ്യാപിക്കുമെന്ന് യുഎസ് പ്രസിഡൻ്റ് ഡോണൾഡ് ട്രംപ്. യുഎസും ഇറാനും തമ്മിലുള്ള യുദ്ധസമാനമായ അന്തരീക്ഷം നിലനിൽക്കുന്നതിനിടെ, ന്യൂയോർക്കിൽ നടന്ന ഒരു റാലിയിലാണ് ട്രംപിൻ്റെ വിവാദ പ്രസ്താവന. എന്നാൽ, ട്രംപിൻ്റേത് വെറും മിഥ്യാധാരണ മാത്രമാണെന്നും ഹോർമുസ് കടലിടുക്കിൻ്റെ പൂർണ്ണ നിയന്ത്രണം ഇറാന് തന്നെയായിരിക്കുമെന്നും ഇറാൻ്റെ ഉപവിദേശകാര്യ മന്ത്രി കാസെം ഗരീബാബാദി തിരിച്ചടിച്ചു.

ആഗോള എണ്ണ-വാതക വിതരണത്തിൻ്റെ നാഡീഞരമ്പായ ഹോർമുസ് കടലിടുക്കിന്മേൽ യുഎസിന് ‘പൂർണ്ണ നിയന്ത്രണമുണ്ട്’ എന്ന് ട്രംപ് അവകാശപ്പെട്ടതിന് തൊട്ടുപിന്നാലെയാണ് പുതിയ പ്രഖ്യാപനം. മേഖലയിലെ അമേരിക്കൻ നാവിക ഉപരോധത്തെ ഒരു ‘ഉരുക്ക് മതിൽ’ എന്നാണ് ട്രംപ് വിശേഷിപ്പിച്ചത്. “ഞങ്ങൾ അനുവദിച്ചാൽ മാത്രമേ ഇനി ഈ വഴി കപ്പലുകൾക്ക് കടന്നുപോകാൻ സാധിക്കൂ,” ട്രംപ് വ്യക്തമാക്കി.

അതേസമയം, അമേരിക്ക തങ്ങളുടെ തന്ത്രപരമായ പരാജയം സമ്മതിക്കുന്നത് വരെ നാവിക ഉപരോധം തുടരുമെന്ന് ഇറാൻ വ്യക്തമാക്കി. “ഹോർമുസ് കടലിടുക്ക് ഇറാൻ്റേതായിരുന്നു, ഇറാൻ്റേതാണ്, ഇറാൻ്റേതായി തന്നെ തുടരും. ഈ കടലിടുക്ക് എപ്പോൾ തുറക്കണം, അടയ്ക്കണം എന്ന് തീരുമാനിക്കുന്നത് ഇറാൻ്റെ കൽപ്പനപ്രകാരം മാത്രമായിരിക്കും,” എന്ന് ഗരീബാബാദി എക്സിൽ കുറിച്ചു.

അതേസമയം, തുടർച്ചയായ ആക്രമണങ്ങളിലൂടെ ഇറാൻ്റെ മിസൈൽ, ഡ്രോൺ ഉത്പാദന ശേഷിയുടെ 82 ശതമാനവും അമേരിക്ക തകർത്തതായി ട്രംപ് അവകാശപ്പെട്ടു. ഇറാൻ്റെ 212 വിമാനങ്ങൾ വെടിവെച്ചിട്ടതായും 159 കപ്പലുകൾ കടലിൻ്റെ അടിത്തട്ടിലാക്കിയതായും ട്രംപ് റാലിയിൽ പറഞ്ഞു. ഇറാൻ്റെ ആണവ മോഹങ്ങൾ അമേരിക്കൻ സൈന്യം എന്നെന്നേക്കുമായി ഇല്ലാതാക്കിയെന്നും അദ്ദേഹം കൂട്ടിച്ചേർത്തു.

കഴിഞ്ഞ ദിവസം അബുദാബിയുടെ സർക്കാർ ഉടമസ്ഥതയിലുള്ള ‘അഡ്‌നോക്’ (ADNOC) കമ്പനിയുടെ രണ്ട് എണ്ണപ്പാറ്റകൾക്ക് നേരെ ഹോർമുസ് കടലിടുക്കിൽ വെച്ച് ഡ്രോൺ ആക്രമണമുണ്ടായതോടെ മേഖലയിലെ സ്ഥിതി കൂടുതൽ വഷളായിരിക്കുകയാണ്. ആക്രമണത്തിന് പിന്നിൽ ഇറാനാണെന്ന് ആരോപിച്ച യുഎഇ, ഇത് അന്താരാഷ്ട്ര നിയമങ്ങളുടെ ലംഘനവും കടൽക്കൊള്ളയുമാണെന്ന് കുറ്റപ്പെടുത്തി. ആക്രമണത്തെത്തുടർന്ന് ഈ മേഖലയിലൂടെയുള്ള വാണിജ്യ കപ്പൽ ഗതാഗതം വൻതോതിൽ കുറഞ്ഞിട്ടുണ്ട്. ഇത് ആഗോളതലത്തിൽ എണ്ണവില വർദ്ധനവിന് കാരണമാകുമെന്ന ആശങ്ക ശക്തമാക്കിയിരിക്കുകയാണ്.

Trump says US will take over Strait of Hormuz; Iran says it won’t happen