വാഷിംഗ്ടൺ: അമേരിക്കൻ ഫെഡറൽ ബ്യൂറോ ഓഫ് പ്രിസൺസ് ജീവനക്കാരുടെ യൂണിയനുമായുള്ള കൂട്ടായ ചർച്ചാ കരാർ റദ്ദാക്കിയ നടപടി റദ്ദാക്കി ഫെഡറൽ കോടതി. ബ്യൂറോ ഡയറക്ടർ വില്യം മാർഷൽ റദ്ദാക്കിയ കരാർ ഉടനടി പുനഃസ്ഥാപിക്കാൻ കണക്റ്റിക്കട്ട് ഡിസ്ട്രിക്റ്റ് കോടതി ജഡ്ജി വെർണൺ ഒലിവർ ഉത്തരവിട്ടു. 30,000-ത്തോളം വരുന്ന ഫെഡറൽ ജയിൽ ജീവനക്കാർക്ക് വൻ ആശ്വാസം നൽകുന്നതാണ് ഈ വിധി. 2025 സെപ്റ്റംബർ 25-നാണ് യൂണിയൻ പ്രവർത്തനങ്ങൾ ഏജൻസിയുടെ പുരോഗതിക്ക് തടസ്സമാണെന്ന് ആരോപിച്ച് ബ്യൂറോ ഓഫ് പ്രിസൺസ് ഡയറക്ടർ കരാർ ഏകപക്ഷീയമായി അവസാനിപ്പിച്ചത്.
എന്നാൽ നാഷണൽ കൗൺസിൽ ഓഫ് പ്രിസൺ ലോക്കൽസ് നൽകിയ ഹർജി പരിഗണിച്ച്, കരാർ റദ്ദാക്കിയ ഡയറക്ടറുടെ നടപടി ഭരണനിർവ്വഹണ ചട്ടങ്ങളുടെ ലംഘനമാണെന്ന് കോടതി ചൂണ്ടിക്കാട്ടി. 2029 മേയ് വരെ കാലാവധിയുള്ള കരാറിന്റെ എല്ലാ വ്യവസ്ഥകളും ഉടനടി പ്രാബല്യത്തിൽ വരുത്താനും കോടതി ഉത്തരവിട്ടു. ദേശീയ സുരക്ഷയും ഇന്റലിജൻസ് വിഭാഗങ്ങളുമായി ബന്ധപ്പെട്ട ഫെഡറൽ ഓഫീസുകളിൽ യൂണിയൻ കരാറുകൾ ഒഴിവാക്കാൻ 2025 മാർച്ചിൽ ട്രംപ് ഭരണകൂടം ഉത്തരവിട്ടിരുന്നുവെങ്കിലും, ആറു മാസത്തോളം ഈ കരാർ ബ്യൂറോ തുടരുകയായിരുന്നു.
തുടർന്നാണ് ഡയറക്ടർ പെട്ടെന്ന് കരാർ അവസാനിപ്പിച്ചത്. കോടതി വിധി തങ്ങൾക്ക് ലഭിച്ച വലിയ വിജയമാണെന്ന് യൂണിയൻ നേതൃത്വം പ്രതികരിച്ചെങ്കിലും, ജസ്റ്റിസ് ഡിപ്പാർട്ട്മെന്റ് വിധിക്കെതിരെ സ്റ്റേ ആവശ്യപ്പെട്ട് അപ്പീൽ നൽകാൻ സാധ്യതയുണ്ടെന്നും ജീവനക്കാർ ജാഗ്രത പാലിക്കണമെന്നും യൂണിയൻ പ്രസിഡന്റ് ബ്രാൻഡി വൈറ്റ് വ്യക്തമാക്കി.
