വാഷിംഗ്ടൺ: പ്രസിഡന്റ് ഡോണൾഡ് ട്രംപ് സർജൻ ജനറൽ പദവിയിലേക്ക് നിർദ്ദേശിച്ച ഡോ. നിക്കോൾ സഫിയറിന്റെ നാമനിർദ്ദേശത്തിന് യുഎസ് സെനറ്റ് ഹെൽത്ത്, എഡ്യൂക്കേഷൻ, ലേബർ ആൻഡ് പെൻഷൻസ് കമ്മിറ്റി അംഗീകാരം നൽകി. ബുധനാഴ്ച നടന്ന പാർട്ടി അടിസ്ഥാനത്തിലുള്ള വോട്ടെടുപ്പിലാണ് ഡെമോക്രാറ്റുകളുടെ എതിർപ്പ് മറികടന്ന് സഫിയറിന്റെ പേര് സെനറ്റിന്റെ പൂർണ്ണ സഭയുടെ പരിഗണനയ്ക്കായി കൈമാറിയത്.
റേഡിയോളജിസ്റ്റും മെമ്മോറിയൽ സ്ളോൺ കെറ്ററിംഗ് കാൻസർ സെന്ററിലെ ബ്രെസ്റ്റ് ഇമേജിംഗ് വിഭാഗം മേധാവിയുമായ സഫിയർ, ഫോക്സ് ന്യൂസിലെ മുൻ മെഡിക്കൽ വിദഗ്ദ്ധ കൂടിയാണ്. മുൻപ് ഡോ. കേസി മീൻസിന്റെ നാമനിർദ്ദേശം സെനറ്റിൽ തടസ്സപ്പെട്ടതിനെ തുടർന്നാണ് കഴിഞ്ഞ ഏപ്രിലിൽ ട്രംപ് സഫിയറിനെ സർജൻ ജനറലായി തെരഞ്ഞെടുത്തത്. കോവിഡ് മഹാമാരി കാലത്ത് പൊതുജനാരോഗ്യ കേന്ദ്രങ്ങൾ കൈക്കൊണ്ട പല നടപടികളെയും കടുപ്പത്തിൽ വിമർശിച്ചിരുന്ന വ്യക്തിയാണ് സഫിയർ.
സെനറ്റ് കമ്മിറ്റിക്ക് മുൻപിൽ ഹാജരായ സഫിയർ വാക്സിനുകളുമായി ബന്ധപ്പെട്ട് എടുത്ത വ്യക്തമായ നിലപാടുകളാണ് സമിതി അധ്യക്ഷനും റിപ്പബ്ലിക്കൻ സെനറ്ററുമായ ബിൽ കാസിഡിയുടെ പിന്തുണ ഉറപ്പാക്കാൻ സഹായിച്ചത്. എം.എം.ആർ വാക്സിനുകൾ അമീബിയാസിസ് അടക്കമുള്ള രോഗങ്ങൾ തടയാൻ ഏറ്റവും ഫലപ്രദമാണെന്നും അവ ജീവന് ഭീഷണിയല്ലെന്നും, കുട്ടിക്കാലത്തെ വാക്സിനുകൾ ഓട്ടിസത്തിന് കാരണമാകില്ലെന്നും സഫിയർ മൊഴി നൽകി. സഫിയറിന്റെ ഈ തുറന്നുപറച്ചിൽ പൊതുജനാരോഗ്യ രംഗത്തെ ശാസ്ത്രീയ സത്യങ്ങൾ കാത്തുസൂക്ഷിക്കാൻ ഉപകരിക്കുമെന്ന് ചൂണ്ടിക്കാണിച്ചാണ് സെനറ്റ് കമ്മിറ്റി നിർദ്ദേശം അംഗീകരിച്ചത്.
