ബീജിംഗ്: ചൈനീസ് സന്ദർശനത്തിനിടെ ലഭിച്ച ഗംഭീര സ്വീകരണത്തിന് പിന്നാലെ, വൈറ്റ് ഹൗസിൽ താൻ വിഭാവനം ചെയ്ത വിപുലമായ ബോൾറൂം പദ്ധതിയെക്കുറിച്ച് ആവേശം പങ്കുവെച്ച് അമേരിക്കൻ പ്രസിഡന്റ് ഡോണൾഡ് ട്രംപ്. ബീജിംഗിലെ ഗ്രേറ്റ് ഹാൾ ഓഫ് പീപ്പിളിൽ നടന്ന ചടങ്ങുകളിൽ നിന്ന് പ്രചോദനം ഉൾക്കൊണ്ടാണ് അമേരിക്കയിലും സമാനമായ രീതിയിൽ ഒരു വലിയ ഹാൾ നിർമ്മിക്കുമെന്ന് ട്രംപ് വ്യക്തമാക്കിയത്. ചൈനയ്ക്ക് ഇത്രയും വലിയൊരു ബോൾറൂം ഉണ്ടെങ്കിൽ അമേരിക്കയ്ക്കും അത് ആവശ്യമാണെന്നും, ട്രൂത്ത് സോഷ്യൽ പ്ലാറ്റ്ഫോമിലൂടെ അദ്ദേഹം കുറിച്ചു.
നിലവിൽ നിർമ്മാണത്തിലിരിക്കുന്ന ഈ കെട്ടിട സമുച്ചയം നിശ്ചയിച്ച സമയത്തേക്കാൾ വേഗത്തിൽ പൂർത്തിയാകുന്നുണ്ടെന്നും അമേരിക്കയിലെ തന്നെ ഇത്തരത്തിലുള്ള ഏറ്റവും മികച്ച സൗകര്യമായിരിക്കും ഇതെന്നും ട്രംപ് അവകാശപ്പെട്ടു. 2028 സെപ്റ്റംബറോടെ പദ്ധതി ഔദ്യോഗികമായി തുറന്നുകൊടുക്കാൻ കഴിയുമെന്നാണ് പ്രതീക്ഷിക്കുന്നത്. ബീജിംഗിലെ ടിയാനൻമെൻ സ്ക്വയറിൽ ചൈനീസ് പ്രസിഡന്റ് ഷി ജിൻപിങ്ങിനൊപ്പം നടക്കുന്ന ചിത്രം പങ്കുവെച്ചുകൊണ്ടാണ് ട്രംപ് ഈ പ്രഖ്യാപനം നടത്തിയത്. ലോകത്തിലെ തന്നെ മികച്ച നേതാക്കളിലൊരാളാണ് ഷി ജിൻപിങ് എന്നും അദ്ദേഹം വിശേഷിപ്പിച്ചു.
നേരത്തെ വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെയുണ്ടായ വെടിവെപ്പ് സംഭവത്തിന് ശേഷമാണ് വലിയൊരു ഹാളിന്റെ ആവശ്യം ട്രംപ് വീണ്ടും സജീവമായി ഉന്നയിക്കാൻ തുടങ്ങിയത്. പദ്ധതിയുടെ നിയമസാധുതയെച്ചൊല്ലി നിരവധി തർക്കങ്ങൾ നിലനിൽക്കുന്നുണ്ടെങ്കിലും, നയതന്ത്ര പ്രാധാന്യമുള്ള ചടങ്ങുകൾ സംഘടിപ്പിക്കാൻ ഇത്തരം ഒരു സംവിധാനം അത്യാവശ്യമാണെന്ന നിലപാടിൽ ഉറച്ചുനിൽക്കുകയാണ് പ്രസിഡന്റ് ട്രംപ്. അമേരിക്കയുടെ പ്രൗഢി വിളിച്ചോതുന്ന ഒന്നായിരിക്കും ഈ പദ്ധതിയെന്നും അദ്ദേഹം കൂട്ടിച്ചേർത്തു.
