വാഷിങ്ടൺ: അന്താരാഷ്ട്ര തലത്തിലുള്ള മാതാപിതാക്കൾ തമ്മിലുള്ള കുട്ടികളെ തട്ടിക്കൊണ്ടുപോകൽ കേസുകൾ പരിഹരിക്കുന്നതിനുള്ള നടപടികൾ മനഃപൂർവം തടസ്സപ്പെടുത്തുന്ന വിദേശ ഉദ്യോഗസ്ഥർക്കെതിരെ പുതിയ വിസ നിയന്ത്രണ നയം പ്രഖ്യാപിച്ച് യുഎസ്. ഇത്തരം കേസുകളുടെ പരിഹാരം വൈകിപ്പിക്കുന്നതിനോ അതിന് കൂട്ടുനിൽക്കുന്നതിനോ ഉത്തരവാദികളായ വ്യക്തികൾക്കും അവരുടെ അടുത്ത കുടുംബാംഗങ്ങൾക്കും പുതിയ നിയന്ത്രണങ്ങൾ ബാധകമാകുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ അറിയിച്ചു.
വിദേശ സർക്കാർ ഉദ്യോഗസ്ഥർ, ജഡ്ജിമാർ, ജുഡീഷ്യൽ അഡ്മിനിസ്ട്രേറ്റർമാർ, നിയമപാലന ഉദ്യോഗസ്ഥർ തുടങ്ങിയവർ നയത്തിന്റെ പരിധിയിൽ വരും. കുട്ടികളെ തട്ടിക്കൊണ്ടുപോയ കേസുകൾ പരിഹരിക്കുന്നതിനും കുട്ടികളെ അവർ സാധാരണയായി താമസിച്ചിരുന്ന രാജ്യത്തേക്ക് തിരിച്ചെത്തിക്കുന്നതിനുമായി നിലവിലുള്ള നിയമങ്ങളോ നയങ്ങളോ കോടതി ഉത്തരവുകളോ മനഃപൂർവം നടപ്പാക്കാതിരിക്കുകയോ പാലിക്കാതിരിക്കുകയോ ചെയ്യുന്നവർക്കെതിരെ വിസ നിയന്ത്രണം ഏർപ്പെടുത്താനാകും. ഇത്തരം വ്യക്തികളെ ഉത്തരവാദിത്തപ്പെട്ടവരാക്കാനും രാജ്യങ്ങളെ അവരുടെ ബാധ്യതകൾ നിറവേറ്റാൻ സമ്മർദം ചെലുത്താനും യുഎസ് സ്റ്റേറ്റ് ഡിപ്പാർട്ട്മെന്റിന് പുതിയ നയം അധിക സംവിധാനമൊരുക്കുമെന്ന് റൂബിയോ പറഞ്ഞു.
“അന്താരാഷ്ട്ര തലത്തിലുള്ള മാതാപിതാക്കൾ തമ്മിലുള്ള കുട്ടികളെ തട്ടിക്കൊണ്ടുപോകൽ കേസുകൾ വേഗത്തിൽ പരിഹരിക്കുന്നതിന് തടസ്സം സൃഷ്ടിക്കുന്നതിൽ ഉത്തരവാദികളായവർക്കോ അതിന് കൂട്ടുനിൽക്കുന്നവർക്കോ അവരുടെ അടുത്ത കുടുംബാംഗങ്ങൾക്കുമെതിരെ വിസ അനുവദിക്കുന്നത് നിയന്ത്രിക്കുന്ന പുതിയ നയം ഇന്ന് പ്രഖ്യാപിക്കുകയാണ്,” റൂബിയോ പറഞ്ഞു. അന്താരാഷ്ട്ര അതിർത്തികൾ കടത്തി കൊണ്ടുപോയ അമേരിക്കൻ കുട്ടികളുടെ സംരക്ഷണവും അവരെ മാതാപിതാക്കളുമായി വീണ്ടും ഒന്നിപ്പിക്കുന്നതും യുഎസ് ഭരണകൂടത്തിന്റെ പ്രധാന പരിഗണനയാണെന്നും അധികൃതർ വ്യക്തമാക്കി.
വിദേശ ഉദ്യോഗസ്ഥർ, ജഡ്ജിമാർ, ജുഡീഷ്യൽ അഡ്മിനിസ്ട്രേറ്റർമാർ, നിയമപാലന ഉദ്യോഗസ്ഥർ എന്നിവർ മനഃപൂർവം നടപടികൾ തടസ്സപ്പെടുത്തുന്നത് കുടുംബങ്ങൾ തമ്മിലുള്ള വേർപാട് നീണ്ടുപോകാനും കുട്ടികളെ യുഎസിലേക്ക് തിരിച്ചെത്തിക്കുന്നത് തടസ്സപ്പെടാനും കാരണമാകുമെന്ന് റൂബിയോ പറഞ്ഞു. അന്താരാഷ്ട്ര തലത്തിലുള്ള കുട്ടികളെ തട്ടിക്കൊണ്ടുപോകുന്ന സംഭവങ്ങൾ തടയുന്നതിനും കുട്ടികളെ അവർ സാധാരണയായി താമസിച്ചിരുന്ന രാജ്യത്തേക്ക് സുരക്ഷിതമായും വേഗത്തിലും തിരിച്ചെത്തിക്കുന്നതിനും സ്റ്റേറ്റ് ഡിപ്പാർട്ട്മെന്റ് പ്രവർത്തിക്കുന്നുണ്ടെന്നും പ്രസ്താവനയിൽ പറയുന്നു.
അന്താരാഷ്ട്ര നിയമപ്രകാരമുള്ള ബാധ്യതകൾ രാജ്യങ്ങൾ നിറവേറ്റുന്നതിൽ പരാജയപ്പെടുമ്പോൾ ഉത്തരവാദിത്തം ഉറപ്പാക്കുന്നതിനുള്ള യുഎസ് നിയമത്തിലെ മറ്റൊരു സംവിധാനമാണ് പുതിയ നയമെന്നും എല്ലാ അമേരിക്കൻ കുട്ടികളുടെയും സുരക്ഷയും ക്ഷേമവും സംരക്ഷിക്കാൻ ഞങ്ങൾ പ്രതിജ്ഞാബദ്ധരാണ് എന്നും റൂബിയോ വ്യക്തമാക്കി.
US announces visa restrictions for officials blocking international child abduction cases
