വാഷിംഗ്ടൺ/ടെഹ്റാൻ: ഹോർമുസ് കടലിടുക്കിൻ്റെ പൂർണ്ണ നിയന്ത്രണം അമേരിക്കൻ സൈന്യം ഏറ്റെടുത്തെന്ന അവകാശവാദങ്ങൾക്കിടെ, ഇറാനുമായുള്ള ധാരണാപത്രം (MoU) പുതുക്കേണ്ടതില്ലെന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് വ്യക്തമാക്കി. തിങ്കളാഴ്ച കാലാവധി അവസാനിച്ച ധാരണാപത്രം നീട്ടാൻ അമേരിക്കയ്ക്ക് താല്പര്യമില്ലെന്നും, ഇറാൻ ഇനി “കീഴടങ്ങലിൻ്റെ വെള്ളക്കൊടി” ഉയർത്തുകയാണ് വേണ്ടതെന്നും ട്രംപ് മാധ്യമങ്ങളോട് പറഞ്ഞു.
തൻ്റെ ഔദ്യോഗിക സംഘം ഇറാൻ്റെ റെവല്യൂഷണറി ഗാർഡ് കോർപ്സുമായി (IRGC) ചർച്ചകൾ നടത്തുന്നുണ്ടെന്നും ട്രംപ് അവകാശപ്പെട്ടു. എന്നാൽ ട്രംപിൻ്റെ ഈ പ്രസ്താവന പൂർണ്ണമായും വ്യാജമാണെന്ന് പറഞ്ഞ് ഐ.ആർ.ജി.സി നേതൃത്വം രംഗത്തെത്തിയിട്ടുണ്ട്.
അതേസമയം, ധാരണാപത്രത്തിൻ്റെ കാലാവധി കഴിഞ്ഞ സാഹചര്യത്തിൽ അമേരിക്കയ്ക്കെതിരെ കൂടുതൽ കടുത്ത സൈനിക-രാഷ്ട്രീയ നിലപാടുകൾ സ്വീകരിക്കുമെന്ന സൂചനയാണ് ഇറാൻ നൽകുന്നത്. യു.എസിൻ്റെ ഭാഗത്തുനിന്നുണ്ടായ ഗുരുതരമായ കരാർ ലംഘനങ്ങൾ കാരണം, ഉപരോധങ്ങൾ നീക്കുന്നതുൾപ്പെടെയുള്ള വിഷയങ്ങളിൽ ചർച്ച നടത്താൻ നിശ്ചയിച്ചിരുന്ന 60 ദിവസത്തെ സമയപരിധി പൂർണ്ണമായും അർത്ഥശൂന്യമായിരിക്കുകയാണെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായ് വ്യക്തമാക്കി. അമേരിക്കയുടെ ഭാഗത്തുനിന്ന് ഏതെങ്കിലും തരത്തിലുള്ള സൈനിക നീക്കമുണ്ടായാൽ അതിശക്തമായി തിരിച്ചടിക്കാൻ ഇറാൻ്റെ സൈന്യവും സജ്ജമാണെന്ന് അദ്ദേഹം കൂട്ടിച്ചേർത്തു.
US cancels MoU with Iran; Trump says US has taken control of the Strait of Hormuz, no more talks, says US President
