വാഷിംഗ്ടൺ: ഇറാൻ തുറമുഖങ്ങൾക്കെതിരെ നിലവിലുള്ള ഉപരോധം കൂടുതൽ ശക്തമാക്കാൻ അമേരിക്കയ്ക്ക് മുന്നിൽ ഇനി പരിമിതമായ വഴികൾ മാത്രമേ അവശേഷിക്കുന്നുള്ളൂവെന്ന് പ്രമുഖ അന്താരാഷ്ട്ര സുരക്ഷാ വിദഗ്ദ്ധർ. ഇനിയൊരു നീക്കത്തിന് യു.എസ് മുതിർന്നാൽ അത് അമേരിക്കൻ സൈന്യത്തിൻ്റെ സുരക്ഷയെത്തന്നെ ബാധിക്കുന്ന വലിയ രീതിയിലുള്ള ഭീഷണിയുയർത്തുമെന്ന് ഹഡ്സൺ ഇൻസ്റ്റിറ്റ്യൂട്ടിലെ സീനിയർ ഫെല്ലോ ബ്രയാൻ ക്ലാർക്ക് മുന്നറിയിപ്പ് നൽകി. ചരിത്രത്തിൽ ഒരു യുദ്ധവും വ്യോമാക്രമണം കൊണ്ട് മാത്രം വിജയിച്ചിട്ടില്ലെന്നും അദ്ദേഹം ചൂണ്ടിക്കാട്ടി.
ഹോർമുസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതം സംരക്ഷിക്കാൻ സൈനിക ബലം ഉപയോഗിക്കുക എന്നതാണ് അമേരിക്കയുടെ മുന്നിലുള്ള ഒരേയൊരു വഴി. ഇതിനായി വാണിജ്യ കപ്പലുകൾക്ക് യു.എസ് നാവിക-വ്യോമസേനകളുടെ സജീവമായ കാവൽ ഏർപ്പെടുത്തേണ്ടി വരും. എന്നാൽ, ഇത് 1980-കളിൽ മേഖലയെ പിടിച്ചുകുലുക്കിയ ‘ടാങ്കർ യുദ്ധം’ പോലുള്ള ഒരു സാഹചര്യത്തിലേക്ക് കാര്യങ്ങളെ എത്തിക്കുമെന്നും കപ്പലുകൾ വ്യാപകമായി ആക്രമിക്കപ്പെടാൻ ഇടയാക്കുമെന്നും അദ്ദേഹം വ്യക്തമാക്കി.
കരസേനയെ ഇറക്കുന്നതിന് മുൻപായി, കടലിടുക്കിൽ തങ്ങൾക്ക് ഇപ്പോഴും സ്വാധീനമുണ്ടെന്ന് കാണിക്കാൻ അമേരിക്ക പരിമിതമായ രീതിയിൽ കപ്പലുകൾക്ക് അകമ്പടി സേവിക്കാൻ ശ്രമിച്ചേക്കാം. എങ്കിലും, ഈ പ്രതിസന്ധി ഒടുവിൽ ഇറാനും യെമനും കപ്പലുകളിൽ നിന്ന് നിശ്ചിത ഫീസ് ഈടാക്കി ഹോർമുസ് കടലിടുക്കിൻ്റെ നിയന്ത്രണം ഏറ്റെടുക്കുന്നതിലൂടെയാകും അവസാനിക്കുകയെന്നും, യു.എസിന് തങ്ങളുടെ അന്തസ്സ് കാത്തുസൂക്ഷിക്കാൻ എന്തെങ്കിലും താല്ക്കാലിക ഉടമ്പടികളിൽ ഒപ്പുവെക്കേണ്ടി വരുമെന്നും ക്ലാർക്ക് പ്രവചിക്കുന്നു.
US has limited options to tame Iran; new military move could backfire, say security experts
