അമേരിക്കയിൽ സ്ഥിരതാമസത്തിനുള്ള ഗ്രീൻ കാർഡ് അപേക്ഷകളിൽ 15.6 ലക്ഷത്തിലേറെ എണ്ണം നടപടികൾ പൂർത്തിയാകാതെ കെട്ടിക്കിടക്കുന്നു. 2026 ജൂൺ 30 വരെയുള്ള കണക്കനുസരിച്ച് 15,60,290 അപേക്ഷകളാണ് യുഎസ് പൗരത്വ, കുടിയേറ്റ സേവന വിഭാഗമായ യുഎസ്‌സിഐഎസിന്റെ (USCIS) പരിഗണനയിലുള്ളത്. ഇതിൽ ഏറ്റവും കൂടുതൽ അപേക്ഷകൾ ഫ്ലോറിഡ, കാലിഫോർണിയ, ടെക്സസ് സംസ്ഥാനങ്ങളിലാണ്. അമേരിക്കയിൽ താമസിക്കുന്ന വിദേശികൾക്ക് സ്ഥിരതാമസ പദവിക്കായി അപേക്ഷിക്കാൻ ഉപയോഗിക്കുന്ന ഐ-485 ഫോമിൽ സമർപ്പിച്ച അപേക്ഷകളുടെ കണക്കാണിത്. 2026 ഏപ്രിൽ മുതൽ ജൂൺ വരെയുള്ള കാലയളവിലെ വിവരങ്ങൾ ഒക്ടോബർ 26ന് പുറത്തുവിട്ട റിപ്പോർട്ടിലാണ് ഉൾപ്പെടുത്തിയിരിക്കുന്നത്.
ഫ്ലോറിഡയിലാണ് ഏറ്റവും കൂടുതൽ അപേക്ഷകൾ കെട്ടിക്കിടക്കുന്നത്. സംസ്ഥാനത്തെ വിവിധ ഓഫീസുകളിലായി 2,65,495 അപേക്ഷകളുണ്ട്. ടാമ്പയിൽ 46,609, കെൻഡലിൽ 45,973, ഹിയാലിയയിൽ 43,153 അപേക്ഷകളാണ് നടപടികൾ കാത്തിരിക്കുന്നത്. കാലിഫോർണിയയിൽ 1,61,398 അപേക്ഷകളും ടെക്സസിൽ 1,40,743 അപേക്ഷകളുമാണ് പരിഗണനയിലുള്ളത്. കാലിഫോർണിയയിലെ സാൻ ജോസിൽ 23,633, ലോസ് ആഞ്ചലസിൽ 20,529, സാൻ ഫ്രാൻസിസ്കോയിൽ 18,364 അപേക്ഷകളുണ്ട്. ടെക്സസിൽ ഹ്യൂസ്റ്റണിലാണ് ഏറ്റവും കൂടുതൽ അപേക്ഷകൾ (57,601). ഡാളസിൽ 38,257ഉം സാൻ അന്റോണിയോയിൽ 30,622ഉം അപേക്ഷകൾ കെട്ടിക്കിടക്കുന്നു.
അതേസമയം, ഈ കണക്കുകൾ അതത് സംസ്ഥാനങ്ങളിൽ താമസിക്കുന്ന അപേക്ഷകരുടെ എണ്ണത്തെ സൂചിപ്പിക്കുന്നില്ല. അപേക്ഷകൾ കൈകാര്യം ചെയ്യുന്ന ഓഫീസുകളുടെ അടിസ്ഥാനത്തിലാണ് യുഎസ്‌സിഐഎസ് കണക്കുകൾ തയ്യാറാക്കുന്നത്. അതിനാൽ അപേക്ഷകരുടെ താമസസ്ഥലവും അപേക്ഷ പരിഗണിക്കുന്ന ഓഫീസും വ്യത്യസ്തമായിരിക്കാം. കെട്ടിക്കിടക്കുന്ന അപേക്ഷകളിൽ 6,18,097 എണ്ണം മാനുഷിക പരിഗണനയുടെ അടിസ്ഥാനത്തിലുള്ളവയാണ്. ആകെ അപേക്ഷകളുടെ 40 ശതമാനത്തോളം വരുമിത്. കുടുംബബന്ധങ്ങളുടെ അടിസ്ഥാനത്തിലുള്ള അപേക്ഷകൾ 6,11,067 ആണ്. തൊഴിൽ അടിസ്ഥാനത്തിലുള്ള അപേക്ഷകൾ 2,68,408ഉം മറ്റ് വിഭാഗങ്ങളിലുള്ളവ 62,718ഉം ആണ്.
യുഎസ്‌സിഐഎസിന്റെ വിവിധ സർവീസ് സെന്ററുകളിലും അപേക്ഷകൾ കെട്ടിക്കിടക്കുന്നുണ്ട്. വെർമോണ്ടിൽ 2,46,100, നെബ്രാസ്കയിൽ 42,805, കാലിഫോർണിയയിൽ 21,108, ടെക്സസിൽ 13,250 അപേക്ഷകളാണ് നടപടികൾ കാത്തിരിക്കുന്നത്. അപേക്ഷകളിൽ വേഗത്തിൽ തീരുമാനമെടുക്കുന്നതിനായി പരിശോധനാ മാനദണ്ഡങ്ങളിൽ വിട്ടുവീഴ്ച ചെയ്യില്ലെന്ന് യുഎസ്‌സിഐഎസ് വക്താവ് സാക് കാഹ്ലർ വ്യക്തമാക്കി. ഗുണനിലവാരവും സുരക്ഷാ പരിശോധനകളും വേഗത്തിനുവേണ്ടി ഒഴിവാക്കില്ലെന്ന് അദ്ദേഹം ന്യൂസ് വീക്കിനോട് പറഞ്ഞു.
നിയമപരമായ കുടിയേറ്റം കൂടുതൽ കർശനമാക്കുന്നതിന്റെ ഭാഗമായി ട്രംപ് ഭരണകൂടം മാനുഷിക പരിഗണനയിലുള്ള താൽക്കാലിക പ്രവേശനത്തിന് നിയന്ത്രണങ്ങൾ ഏർപ്പെടുത്തുകയും അഭയാർഥി പ്രവേശന പദ്ധതി നിർത്തിവയ്ക്കുകയും ചെയ്തിരുന്നു. ഇതിനിടെയാണ് പുതിയ കണക്കുകൾ പുറത്തുവന്നത്. തീരുമാനമെടുത്ത ഗ്രീൻ കാർഡ് അപേക്ഷകളിലെ അംഗീകാര നിരക്ക് മുൻ പാദത്തെ അപേക്ഷിച്ച് 2.6 ശതമാനം പോയിന്റ് കുറഞ്ഞതായും റിപ്പോർട്ടിലുണ്ട്. എന്നാൽ ഓരോ അപേക്ഷകനും എത്രകാലമായി കാത്തിരിക്കുകയാണെന്ന വിവരം കണക്കുകൾ വ്യക്തമാക്കുന്നില്ല.
US has over 1.5 million pending green card applications: USCIS data
