വയനാട് കള്ളാടിയിലുണ്ടായ മണ്ണിടിച്ചിൽ ദുരന്തത്തിൽ എക്സ്കവേറ്റർ ഓപ്പറേറ്റർ ബിഹാർ സ്വദേശി മുഹമ്മദ് ഇമ്രാൻ, എൻജിനിയർ ഹിമാചൽ പ്രദേശ് സ്വദേശി രാഹുൽ ശർമ എന്നിവരുടെ മൃതദേഹങ്ങൾ കൂടി കണ്ടെത്തി. സോൺ ഒന്നിൽനിന്ന് നടത്തിയ തിരച്ചിലിലാണ് മൃതദേഹങ്ങൾ വീണ്ടെടുത്തത്. ഇതോടെ അപകടത്തിൽ മരിച്ചവരുടെ എണ്ണം അഞ്ചായി ഉയർന്നു. ഹിറ്റാച്ചി ഓപ്പറേറ്റർ ചന്ദ്രബാൻ പാൽ, ഫോർമാൻ ബികാസ് കുമാർ സിങ്, അൻമോൽ ദൊഡരായ് എന്നിവരുടെ മൃതദേഹങ്ങൾ നേരത്തെ കണ്ടെത്തിയിരുന്നു. വിക്രം റാണ, രാകേഷ് ഗുച്ചൈത്, അസ്ഹറുദ്ദീൻ അൻസാരി എന്നിവർക്കായി ഒന്നും രണ്ടും സോണുകളിൽ തിരച്ചിൽ ഊർജ്ജിതമായി തുടരുകയാണ്.
കഴിഞ്ഞ ഫെബ്രുവരിയിൽ മാത്രം വിവാഹിതനായ രാഹുൽ ശർമയുടെ വേർപാട് ചെമ്പ്ര റോഡിലെ വാടകവീട്ടിൽ പ്രാർഥനകളോടെ കഴിഞ്ഞിരുന്ന ഭാര്യ കല്പനയ്ക്കും കുടുംബത്തിനും തീരാനോവായി മാറിയിരിക്കുകയാണ്. അപകട വിവരമറിഞ്ഞ് ഹിമാചലിൽ നിന്ന് പിതാവും അമ്മാവനും ദുബായിൽ നിന്ന് സഹോദരനും വയനാട്ടിൽ എത്തിയിരുന്നു. രാഹുൽ ജീവനോടെ തിരിച്ചെത്തുമെന്ന കല്പനയുടെയും ബന്ധുക്കളുടെയും പ്രതീക്ഷകളാണ് മൃതദേഹം കണ്ടെത്തിയതോടെ കണ്ണീരിലവസാനിച്ചത്.
ദുരന്തഭൂമിയിൽ പ്രതിപക്ഷ നേതാവ് പിണറായി വിജയൻ സന്ദർശനം നടത്തി സ്ഥിതിഗതികൾ വിലയിരുത്തി. സിപിഎം സംസ്ഥാന സെക്രട്ടറി എം.വി. ഗോവിന്ദൻ, മുതിർന്ന നേതാവ് എം.വി. ജയരാജൻ, ശശി എന്നിവരും റവന്യൂ മന്ത്രി എ.പി. അനിൽ കുമാറും അദ്ദേഹത്തോടൊപ്പമുണ്ടായിരുന്നു. ബാക്കിയുള്ള മൂന്ന് പേരെയും കണ്ടെത്തുന്നതിനായി പ്രദേശത്ത് തിരച്ചിൽ ദൗത്യം പുരോഗമിക്കുകയാണ്.
Wayanad Landslide: Two More Bodies Recovered Including Engineer Rahul Sharma; Death Toll Rises to Five
