വാഷിംഗ്ടൺ: ഇറാനെതിരെ കടുത്ത സൈനിക നടപടിയുണ്ടാകുമെന്ന ആഴ്ചകൾ നീണ്ട ഭീഷണികൾക്കൊടുവിൽ, പ്രതീക്ഷിച്ചതിലും സങ്കീർണ്ണമായ യുദ്ധത്തിൽ നിന്നും തടിയൂരാൻ അമേരിക്കൻ പ്രസിഡൻ്റ് ഡോണൾഡ് ട്രംപ് വഴിതേടുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ആണവ പ്രശ്നം പൂർണ്ണമായി പരിഹരിച്ചില്ലെങ്കിലും, തന്ത്രപ്രധാനമായ ഹോർമുസ് കടലിടുക്ക് വീണ്ടും തുറക്കാൻ ഇറാൻ തയ്യാറായാൽ യുദ്ധത്തിൽ വിജയം പ്രഖ്യാപിച്ച് പിന്മാറാൻ ട്രംപ് സന്നദ്ധനായേക്കുമെന്നാണ് സൂചന.
ഇറാനുമായി ഒരു ആണവ കരാറിൽ എത്തിച്ചേരാതെ തന്നെ യുദ്ധം അവസാനിപ്പിക്കാൻ കഴിയുമെന്ന് ട്രംപ് തൻ്റെ മുതിർന്ന സഹായികളോട് രഹസ്യമായി വെളിപ്പെടുത്തിയതായി പ്രമുഖ മാധ്യമമായ ‘ദി വാൾ സ്ട്രീറ്റ് ജേണൽ’ റിപ്പോർട്ട് ചെയ്തു. എന്നാൽ, കടലിടുക്ക് തുറക്കുന്നതിനായി ഇറാൻ വലിയ നിബന്ധനകൾ മുന്നോട്ടുവെച്ചതോടെ ട്രംപിൻ്റെ ഈ ‘മാനം കാക്കൽ’ തന്ത്രം പ്രതിസന്ധിയിലായിരിക്കുകയാണ്.
ഹോർമുസ് കടലിടുക്ക് തുറക്കുന്നതിനായി കോടിക്കണക്കിന് ഡോളറിൻ്റെ യുദ്ധനഷ്ടപരിഹാരം, യുഎസ് നാവിക ഉപരോധം അവസാനിപ്പിക്കൽ, മിഡിൽ ഈസ്റ്റിൽ നിന്ന് അമേരിക്കൻ സൈന്യത്തെ പൂർണ്ണമായി പിൻവലിക്കൽ തുടങ്ങിയ കടുത്ത ആവശ്യങ്ങളാണ് ഇറാൻ മുന്നോട്ട് വെച്ചിരിക്കുന്നത്. അമേരിക്ക യുദ്ധം പൂർണ്ണമായി അവസാനിപ്പിക്കുകയും മരവിപ്പിച്ച ഇറാനിയൻ ആസ്തികൾ വിട്ടുനൽകുകയും വേണമെന്ന് ഇറാൻ്റെ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മുഹമ്മദ് ബാഗർ സോൾഗാദർ വ്യക്തമാക്കി.
മിസൈലുകളും ഡ്രോണുകളും ഉപയോഗിച്ച് ഹോർമുസ് കടലിടുക്കിലെ കപ്പൽ ഗതാഗതം തടയാനുള്ള ഇറാൻ്റെ ശേഷി അന്താരാഷ്ട്ര എണ്ണവിലയെയും വാണിജ്യത്തെയും കാര്യമായി ബാധിച്ചിട്ടുണ്ട്. ഇത് ഇറാനു വലിയൊരു മേൽക്കൈ നൽകുന്നു. കഴിഞ്ഞ വാരാന്ത്യത്തിൽ യുണൈറ്റഡ് അറബ് എമിറേറ്റ്സിൻ്റെ കപ്പലിന് നേരെ ഇറാൻ നടത്തിയ മിസൈൽ ആക്രമണം മേഖലയിലെ സ്ഥിതിഗതികൾ കൂടുതൽ വഷളാക്കിയിരിക്കുകയാണ്.
അമേരിക്കയിൽ ഇടക്കാല തിരഞ്ഞെടുപ്പിന് മൂന്ന് മാസത്തിൽ താഴെ മാത്രം സമയം ബാക്കിനിൽക്കെ, ആഭ്യന്തരമായി വർദ്ധിച്ചുവരുന്ന ഇന്ധനവില ട്രംപിന് വലിയ രാഷ്ട്രീയ പ്രതിസന്ധി സൃഷ്ടിക്കുന്നുണ്ട്. യുദ്ധം ലക്ഷ്യം കണ്ടുവെന്ന് ജനങ്ങളെ ബോധ്യപ്പെടുത്താൻ ട്രംപ് തിടുക്കം കൂട്ടുന്നതും അതുകൊണ്ടാണ്. ആണവ കരാറില്ലെങ്കിലും യുദ്ധത്തിൽ വിജയിച്ചുവെന്ന തരത്തിലുള്ള സോഷ്യൽ മീഡിയ പ്രചാരണങ്ങൾ ട്രംപ് ഇതിനോടകം ആരംഭിച്ചുകഴിഞ്ഞു.
2025 മെയ് മാസത്തിൽ അമേരിക്ക ഇറാൻ്റെ മൂന്ന് പ്രധാന ആണവനിലയങ്ങൾ തകർത്തതിനാൽ, ഇറാന് ഇനി പെട്ടെന്നൊന്നും ആണവ പരിപാടി പുനരാരംഭിക്കാൻ കഴിയില്ലെന്നാണ് ട്രംപിൻ്റെ കണക്കുകൂട്ടൽ. കൂടാതെ, ഇറാൻ രഹസ്യമായി ആണവായുധം വികസിപ്പിക്കാൻ ശ്രമിച്ചാൽ യുഎസ് ഇൻ്റലിജൻസ് അത് കണ്ടെത്തുമെന്നും ട്രംപ് വാദിക്കുന്നു.
എന്നാൽ, അമേരിക്കൻ നികുതിദായകരുടെ പണം ഇറാന് നൽകില്ലെന്ന ട്രംപിൻ്റെ മുൻ നിലപാടും, അന്താരാഷ്ട്ര വിപണിയിൽ എണ്ണ വിൽക്കാൻ ഇറാന് ഉപരോധ ഇളവുകൾ നൽകണമെന്ന ഇറാൻ്റെ ആവശ്യവും വരും ദിവസങ്ങളിൽ ചർച്ചകളെ എങ്ങനെ ബാധിക്കുമെന്നാണ് നയതന്ത്ര ലോകം ഉറ്റുനോക്കുന്നത്. അമേരിക്കയിൽ ട്രംപിന് മറ്റൊരു രാഷ്ട്രീയ തലവേദന സൃഷ്ടിക്കാത്ത രീതിയിൽ ഈ യുദ്ധം എങ്ങനെ അവസാനിക്കുമെന്നത് ഇപ്പോഴും ചോദ്യചിഹ്നമായി തുടരുന്നു.
Will Trump back out of nuclear deal if Iran opens Strait of Hormuz? US reportedly looking for way to withdraw from war
