ലോസ് ഏഞ്ചല്സ് : ആരോഗ്യ ഇന്ഷുറന്സ് തട്ടിപ്പില് പങ്കാളിയായ യുഎസ് ആസ്ഥാനമായുള്ള ഇന്ത്യന് വംശജനായ ഫാര്മ വ്യവസായിയെ ലോസ് ഏഞ്ചല്സ് അന്താരാഷ്ട്ര വിമാനത്താവളത്തില് അറസ്റ്റ് ചെയ്തു. അസമിലെ ഗുവാഹത്തിയില് നിന്നുള്ള 61 കാരനായ ടോണ്മോയ് ശര്മ്മ, മെയ് 29 നാണ് അറസ്റ്റിലായത്. 149 മില്യണ് ഡോളറിന്റെ തട്ടിപ്പിനാണ് ഇദ്ദേഹം പിടിയിലായിരിക്കുന്നത്. കേസിലെ കൂട്ടുപ്രതിയായ പോള് ജിന് സെന് ഖോര് എന്ന വ്യക്തിയും പിടിയിലായിട്ടുണ്ട്. ഇയാളുടെ വിചാരണ ജൂലൈ 29 ലേക്ക് മാറ്റി.
അഡിക്ഷനുകള്ക്ക് ചികിത്സാ വാഗ്ദാനം ചെയ്യുന്ന സോവറിന് ഹെല്ത്ത് ഗ്രൂപ്പിന്റെ സ്ഥാപകനും മുന് സിഇഒയുമായ ടോണ്മോയ് ശര്മ്മ ആരോഗ്യ ഇന്ഷുറന്സ് കമ്പനികള്ക്ക് 149 മില്യണ് ഡോളറിലധികം വ്യാജ ക്ലെയിമുകള് സമര്പ്പിച്ചുവെന്നാരോപിച്ച് എട്ട് ഫെഡറല് ഗ്രാന്ഡ് ജൂറി കുറ്റപത്രം സമര്പ്പിച്ചിരിക്കുകയാണ്. പിന്നാലെയാണ് അറസ്റ്റ്.
സോവറിന് ഹെല്ത്ത് ഗ്രൂപ്പ് രോഗികളെ അവരുടെ അറിവില്ലാതെ ഇന്ഷുറന്സ് പ്ലാനുകളില് ഉള്പ്പെടുത്തിയാണ് തട്ടിപ്പ് നടത്തിയിരുന്നതെന്ന് കാലിഫോര്ണിയയിലെ സെന്ട്രല് ഡിസ്ട്രിക്റ്റിലെ യുഎസ് അറ്റോര്ണി ഓഫീസ് രേഖകളില് പറയുന്നത്. അനധികൃത മൂത്രരോഗപരിശോധനകള്ക്ക് ശര്മ്മയുടെ കമ്പനി ഇന്ഷുറന്സ് കമ്പനികള്ക്ക് ബില് നല്കി, ഇതിലൂടെ 29 മില്യണ് ഡോളറിലധികം വ്യാജ ക്ലെയിമുകള് ഉണ്ടാക്കിയെന്നാണ് വിവരം. കൂടാതെ, രോഗികളുടെ റഫറലുകള്ക്കായി ശര്മ്മ 21 മില്യണ് ഡോളറിലധികം നിയമവിരുദ്ധ കൈക്കൂലി നല്കിയതായും യുഎസ് നീതിന്യായ വകുപ്പിന്റെ പ്രസ്താവനയില് പറയുന്നു.
തെക്കന് കാലിഫോര്ണിയയില് ഒന്നിലധികം ആസക്തി ചികിത്സാ കേന്ദ്രങ്ങള് നടത്തിയിരുന്ന ടോണ്മോയ് ശര്മ്മയുടെ ഇപ്പോള് പ്രവര്ത്തനരഹിതമായ സോവറിന് ഹെല്ത്ത് ഗ്രൂപ്പിനെതിരെ 2017 ജൂണ് മുതല് അന്വേഷണം നടന്നുവരികയായിരുന്നുവെന്ന് എന്ബിസി ലോസ് ഏഞ്ചല്സ് റിപ്പോര്ട്ട് ചെയ്തു. എഫ്ബിഐ അവരുടെ ചികിത്സാ കേന്ദ്രങ്ങള്, സാന് ക്ലെമെന്റെ ആസ്ഥാനം, സാന് ജുവാന് കാപ്പിസ്ട്രാനോയിലെ ശര്മ്മയുടെ വസതി എന്നിവിടങ്ങളില് റെയ്ഡ് നടത്തുകയും ചെയ്തിരുന്നു.
ടോണ്മോയ് ശര്മ്മ ഒരു ഗവേഷണ മനോരോഗ വിദഗ്ദ്ധനാണ്. മാനസിക രോഗങ്ങളില് തലച്ചോറിന്റെ പ്രവര്ത്തനം, അറിവ്, മനുഷ്യന്റെ പെരുമാറ്റം എന്നിവയിലായിരുന്നു അദ്ദേഹത്തിന്റെ പ്രവര്ത്തനങ്ങള്. അനുരാധയുടെയും ഇപ്പോള് പ്രവര്ത്തനരഹിതമായ രൂപയന്, അനുപമ സിനിമാ ഹാളുകളുടെ ഉടമയും സ്പോര്ട്സ് സംഘാടകനുമായ പരേതനായ ഫാനി ശര്മ്മയുടെ മകനാണ് അദ്ദേഹം.
