യു.ഡി.എഫ് സ്ഥാനാര്ത്ഥിക്ക് പിന്തുണ നല്കണമോ വേണ്ടയോ എന്ന് പിവി അൻവർ ആണ് തീരുമാനിക്കേണ്ടതെന്നാണ് ഏറ്റവും എളിമയോടെയും വിനയത്തോടെയും പറഞ്ഞതെന്ന് പ്രതിപക്ഷ നേതാവ് വി ഡി സതീശൻ. ഞങ്ങളുടെ സ്ഥാനാര്ത്ഥിക്ക് പിന്തുണ നല്കാന് അദ്ദേഹം തീരുമാനിച്ചാല് യു.ഡി.എഫിന്റെ തീരുമാനം അപ്പോള് പറയാം. ആദ്യം മുതല്ക്കെ ഇതല്ലാതെ ഞങ്ങളുടെ കൂട്ടത്തിലുള്ള ആരെങ്കിലും ആരെയെങ്കിലും പ്രകോപിപ്പിച്ചു കൊണ്ട് ഒരു വാക്ക് പോലും പറഞ്ഞിട്ടില്ലെന്നും സതീശൻ വ്യക്തമാക്കി.
എന്നെക്കുറിച്ച് അദ്ദേഹം പറയുന്നതില് ഒരു കുഴപ്പവുമില്ല. ഈ വിഷയം മാത്രമല്ല തിരഞ്ഞെടുപ്പിലുള്ളത്. സ്ഥാനാര്ത്ഥിയെ പ്രഖ്യാപിച്ചത് ഉള്പ്പെടെയുള്ള കാര്യങ്ങള് യു.ഡി.എഫിലെ എല്ലാ നേതാക്കളും പരസ്പരം കൂടിയാലോചന നടത്തിയാണ് തീരുമാനിക്കുന്നത്. നാളെ വൈകിട്ടോടെ തീരുമാനം എടുക്കുമെന്ന് പി.കെ കുഞ്ഞാലിക്കുട്ടി പറഞ്ഞത് എല്ലാവരുമായി ആലോചിച്ചാണെന്നും പ്രതിപക്ഷ നേതാവ് വിവരിച്ചു
എനിക്കെതിരെ പറഞ്ഞതൊന്നും പിന്വലിക്കേണ്ട. ഞങ്ങളുടെ സ്ഥാനാര്ത്ഥിയെ പിന്തുണയ്ക്കുന്നുണ്ടോ ഇല്ലയോ എന്നു മാത്രം അൻവർ വ്യക്തമാക്കിയാല് മതി. അതിനു ശേഷം യു ഡി എഫിന്റെ നിലപാട് പറയാം എന്നും സതീശൻ വ്യക്തമാക്കി.
