ചെന്നൈ: തമിഴക വെട്രി കഴകം നേതാവും നടനുമായ വിജയ്ക്കെതിരെ 41 പേരുടെ മരണത്തിന് ഇടയായ കരൂര് ദുരന്തത്തില് കേസെടുക്കേണ്ടെന്ന നിലപാടുമായി മുഖ്യമന്ത്രി എം കെ സ്റ്റാലിന്. വിജയ്ക്കെതിരെ കേസെടുക്കുന്നത് തെറ്റായ കീഴ്വഴക്കമാകുമെന്നും രാഷ്ട്രീയ യോഗങ്ങളിലെ അപകടത്തില് പാര്ട്ടികളുടെ ഉന്നത നേതാക്കളെ പ്രതിയാക്കുന്നത് ശരിയല്ലെന്നുമുള്ള നിലപാടിലാണ് സ്റ്റാലിന്.
തെരഞ്ഞെടുപ്പ് അടുത്തിരിക്കെ രാഷ്ട്രീയ പ്രേരിതമായ നടപടി എന്ന ആരോപണത്തിന് ഇട വരുത്തത് എന്നാണ് സർക്കാർ നിലപാട്. അതിനാൽ തന്നെ വിജയ്യുടെ ഗൂഢാലോചനാ വാദം അവഗണിക്കാനാണ് തമിഴ്നാട് സര്ക്കാരിന്റെ തീരുമാനം.
ശനിയാഴ്ച വൈകിട്ടായിരുന്നു രാജ്യത്തെ നടുക്കിയ 41 പേരുടെ മരണത്തിന് ഇടയാക്കിയ അപകടമുണ്ടായത്. ആറ് മണിക്കൂര് വൈകി എത്തിയ വിജയ് നെ കാണാൻ ആ സമയമത്രയും ഭക്ഷണവും വെള്ളവുമില്ലാതെ ആളുകള് കാത്തുനിന്നു. വിജയ് പ്രസംഗം ആരംഭിച്ച് അല്പസമയം കഴിഞ്ഞപ്പോള് തന്നെ ആളുകള് തളര്ന്നുതുടങ്ങി. തുടർന്നുണ്ടായ തിക്കിലും തിരക്കിലും പെട്ട് 41 പേർക്ക് ജീവൻ നഷ്ടമാവുകയും നിരവധി പേർക്ക് പരിക്കേൽക്കുകയും ചെയ്തു.
