ജക്കാർത്ത: ഇന്തോനേഷ്യയിൽ ഉണ്ടായ ശക്തമായ 7.7 തീവ്രതയുള്ള ഭൂചലനത്തിൽ കുറഞ്ഞത് 38 പേർ മരിച്ചു. നിരവധി വീടുകളും കെട്ടിടങ്ങളും തകർന്നതിനു പുറമെ മണ്ണിടിച്ചിലും സുനാമി മുന്നറിയിപ്പും ഉണ്ടായതായി റിപ്പോർട്ട്. പ്രാദേശിക സമയം രാവിലെ 5.58നാണ് ഇന്തോനേഷ്യയിലെ ഫ്ലോറസ് മേഖലയിൽ ഭൂചലനം ഉണ്ടായത്. 10 കിലോമീറ്റർ ആഴത്തിലായിരുന്നു ഭൂകമ്പത്തിന്റെ പ്രഭവകേന്ദ്രമെന്ന് യുഎസ് ജിയോളജിക്കൽ സർവേ (USGS) അറിയിച്ചു. തുടർന്ന് നിരവധി തുടർചലനങ്ങളും മണ്ണിടിച്ചിലും ഉണ്ടായി.
ഇന്തോനേഷ്യൻ ജിയോഫിസിക്സ് ഏജൻസിയായ BMKGയുടെ കണക്കനുസരിച്ച് പ്രാദേശിക സമയം പുലർച്ചെ 4.58നാണ് ആദ്യ ഭൂചലനം രേഖപ്പെടുത്തിയത്. പിന്നാലെ നിരവധി തുടർചലനങ്ങളുണ്ടായി. പസഫിക് ‘റിങ് ഓഫ് ഫയർ’ മേഖലയിലെ സ്ഥാനം കാരണം ഭൂകമ്പങ്ങൾക്ക് ഏറെ സാധ്യതയുള്ള രാജ്യമാണ് ഇന്തോനേഷ്യ. എന്നാൽ ഈ വർഷം ഏപ്രിൽ ഒന്നിന് വടക്കൻ മലുകു തീരത്ത് ഉണ്ടായ 7.4 തീവ്രതയുള്ള ഭൂചലനത്തിന് ശേഷം രാജ്യത്തുണ്ടായ ഏറ്റവും വലിയ മരണസംഖ്യയുള്ള ഭൂകമ്പമാണിത്.
കെട്ടിടങ്ങൾ തകർന്നും മണ്ണിടിച്ചിലിലും സിക്ക, വെസ്റ്റ് മംഗാരായി, ഈസ്റ്റ് മംഗാരായി മേഖലകളിൽ കുറഞ്ഞത് 20 മൃതദേഹങ്ങൾ കണ്ടെത്തിയതായി മൗമെറെ സെർച്ച് ആൻഡ് റെസ്ക്യൂ ഏജൻസി മേധാവി ഫത്തൂർ റഹ്മാൻ അസോസിയേറ്റഡ് പ്രസ്സിനോട് പറഞ്ഞു. രക്ഷാപ്രവർത്തനം തുടരുന്നതിനിടെ മരണസംഖ്യ 38 ആയി ഉയർന്നതായും കൂടുതൽ പേർ മരിച്ചിരിക്കാമെന്ന ആശങ്കയുണ്ടെന്നും അധികൃതർ അറിയിച്ചു.
കുറഞ്ഞത് ആറ് പേർക്ക് പരിക്കേറ്റിട്ടുണ്ട്. മണ്ണിടിച്ചിലിനെ തുടർന്ന് ടൺ കണക്കിന് മണ്ണിനടിയിൽപ്പെട്ടിരിക്കാമെന്ന് കരുതുന്ന രണ്ട് ഗ്രാമീണർക്കായി തിരച്ചിൽ തുടരുകയാണ്. ശക്തമായ ഭൂചലനത്തെ തുടർന്ന് നാഗെകിയോ റീജൻസിയിലെ ഏകദേശം 2,000 ഗ്രാമീണർ വീടുകളിൽ നിന്ന് ഒഴിഞ്ഞ് താൽക്കാലിക അഭയകേന്ദ്രങ്ങളിലേക്ക് മാറിയതായി പ്രാദേശിക അധികൃതർ അറിയിച്ചു. ഭൂചലനത്തിൽ നിരവധി കെട്ടിടങ്ങൾക്ക് ഗുരുതരമായ നാശനഷ്ടമുണ്ടാകുകയും ചിലത് പൂർണമായി തകരുകയും ചെയ്തു. വൈദ്യുതി ബന്ധം തകരാറിലായത് വിവരങ്ങൾ കൈമാറുന്നതിന് തടസ്സമായതായും രക്ഷാപ്രവർത്തനങ്ങളെ സങ്കീർണമാക്കിയതായും ഈസ്റ്റ് നുസ തെൻഗാര പൊലീസ് മേധാവി റൂഡി ദർമോക്കോ പറഞ്ഞു.
സുനാമി മുന്നറിയിപ്പ് പിൻവലിച്ചു
ശക്തമായ ഭൂചലനത്തെ തുടർന്ന് സുനാമി മുന്നറിയിപ്പും പുറപ്പെടുവിച്ചിരുന്നു. ചില പ്രദേശങ്ങളിൽ ഒരു മീറ്ററിൽ താഴെ ഉയരമുള്ള സുനാമി തിരമാലകൾ രേഖപ്പെടുത്തിയതായി റിപ്പോർട്ടുകൾ പറയുന്നു. എന്നാൽ ഭൂചലനത്തിനും തുടർചലനങ്ങൾക്കും പിന്നാലെ ഏകദേശം മൂന്ന് മണിക്കൂറിന് ശേഷം സുനാമി മുന്നറിയിപ്പ് പിൻവലിച്ചു.
മുന്നറിയിപ്പ് പിൻവലിച്ചെങ്കിലും കടൽനിരപ്പ് നിരീക്ഷിക്കുന്നത് തുടരുമെന്ന് BMKG അറിയിച്ചു.സുനാമി മുന്നറിയിപ്പ് അവസാനിപ്പിച്ചെങ്കിലും കടൽനിരപ്പ് നിരീക്ഷിക്കുന്നത് തുടരുമെന്ന് BMKGയുടെ ഭൂകമ്പ-സുനാമി വിഭാഗം ഡയറക്ടർ വിജയാന്തോ പറഞ്ഞു. 1992ലാണ് ഇന്തോനേഷ്യയിലെ ഫ്ലോറസ് മേഖലയിൽ അവസാനമായി 7.7 തീവ്രതയുള്ള വൻ ഭൂചലനം ഉണ്ടായത്. അന്ന് ഭൂചലനത്തെ തുടർന്ന് സുനാമിയുണ്ടാകുകയും ഏകദേശം 2,500 പേർ മരിക്കുകയും ചെയ്തിരുന്നു.
38 people died in a massive earthquake in Indonesia; numerous houses were destroyed.
