മോൺട്രിയൽ: കാനഡയിലെ ക്യൂബെക്ക് പ്രവിശ്യയിൽ ഹെലികോപ്റ്റർ വയലിൽ തകർന്നുവീണ് നാല് പേർ മരിച്ചു. ശനിയാഴ്ച ഉച്ചയോടെയായിരുന്നു അപകടം. മോൺട്രിയലിന് സമീപം ഹൈവേ 10-ന് പുറത്തുള്ള റാങ് ഡെസ് എകോസെ പ്രദേശത്താണ് ഹെലികോപ്റ്റർ തകർന്നുവീണ് തീപിടിച്ചത്.
ഉച്ചയ്ക്ക് 2.30ന് ശേഷമാണ് അപകടത്തെക്കുറിച്ച് പൊലീസിന് വിവരം ലഭിച്ചത്. മോൺട്രിയലിൽ നിന്ന് ഏകദേശം 50 കിലോമീറ്റർ തെക്കുകിഴക്കായാണ് അപകടസ്ഥലം. ഹെലികോപ്റ്ററിലുണ്ടായിരുന്ന നാല് പേരും സംഭവസ്ഥലത്തുവച്ചുതന്നെ മരിച്ചതായി ക്യൂബെക്ക് പൊലീസ് (SQ) അറിയിച്ചു. രക്ഷാപ്രവർത്തകർ ഒരു മണിക്കൂറിനുള്ളിൽ തീ നിയന്ത്രണവിധേയമാക്കി.
മരിച്ചവരുടെ വിവരങ്ങൾ പൊലീസ് പുറത്തുവിട്ടിട്ടില്ല. അപകടത്തിന്റെ കാരണം വ്യക്തമല്ല. ഹെലികോപ്റ്റർ സ്വകാര്യ വിമാനമായിരുന്നെന്നാണ് പ്രാഥമിക നിഗമനമെന്ന് പൊലീസ് അറിയിച്ചു. അപകടത്തിൽ ഗതാഗതമന്ത്രി സ്റ്റീവൻ മക്കിന്നൺ അനുശോചനം രേഖപ്പെടുത്തി. സംഭവത്തിൽ അധികൃതർ അന്വേഷണം നടത്തിവരികയാണെന്നും ഗതാഗതമന്ത്രിയുടെ നിരീക്ഷകനെ നിയോഗിക്കുമെന്നും അദ്ദേഹം എക്സിൽ കുറിച്ചു.
ക്യൂബെക്ക് പൊലീസിന്റെ മേജർ ക്രൈംസ് യൂണിറ്റാണ് അപകടത്തിന്റെ സാഹചര്യങ്ങൾ അന്വേഷിക്കുന്നത്. കാനഡയിലെ ട്രാൻസ്പോർട്ടേഷൻ സേഫ്റ്റി ബോർഡും സംഭവസ്ഥലത്തേക്ക് അന്വേഷണ ഉദ്യോഗസ്ഥരെ അയച്ചതായി പൊലീസ് അറിയിച്ചു.
4 killed as helicopter crashes in field in Canada’s Quebec, probe launched
