ന്യൂയോർക്ക്: അമേരിക്കൻ കുതിരപ്പന്തയത്തിൻ്റെ പ്രധാന കേന്ദ്രങ്ങളിലൊന്നായ അപ്സ്റ്റേറ്റ് ന്യൂയോർക്കിലെ സരടോഗ സ്പ്രിംഗ്സിൽ ചൊവ്വാഴ്ച പുലർച്ചെയുണ്ടായ മാരകമായ തീപിടിത്തത്തിൽ 17 കുതിരകൾക്ക് ദാരുണാന്ത്യം. സരടോഗ കാസിനോ ഹോട്ടൽ ഹാർനെസ് റേസിംഗ് ട്രാക്കിലെ ലായത്തിലാണ് പുലർച്ചെ ഏകദേശം 02:30 ഓടെ (പ്രാദേശിക സമയം) തീപിടിത്തമുണ്ടായത്.18 കുതിരകളെ പാർപ്പിച്ചിരുന്ന ഒരു ലായം പൂർണ്ണമായും അഗ്നിക്കിരയായി. അപകടത്തിൽ ഒരു കുതിരയ്ക്ക് നിസ്സാര പരിക്കുകളോടെ രക്ഷപ്പെടാനായതായി അധികൃതർ സ്ഥിരീകരിച്ചു.
അതേസമയം, മനുഷ്യർക്ക് പരിക്കുകൾ റിപ്പോർട്ട് ചെയ്തിട്ടില്ല. തീപിടിത്തത്തിൻ്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്. കുതിരകൾക്ക് തീറ്റ നൽകാനും ലായങ്ങൾ വൃത്തിയാക്കാനുമായി പുലർച്ചെ ജീവനക്കാർ എത്തിയപ്പോഴാണ് തീ പടരുന്നത് ശ്രദ്ധയിൽ പെട്ടത്. എന്നാൽ നിമിഷങ്ങൾക്കകം തീ ആളിപ്പടർന്നതിനാൽ കുതിരകളെ രക്ഷിക്കാനുള്ള ശ്രമങ്ങൾ വിഫലമാകുകയായിരുന്നു. ദുരന്തത്തിൽ പ്രമുഖ ട്രെയിനർ റോബിൻ മംഗിയാർഡിയുടെ 11 കുതിരകളും, തിമോത്തി ബെൻസൻ്റെ 6 കുതിരകളുമാണ് അഗ്നിക്കിരയായത്. സമീപത്തെ മറ്റ് ലായങ്ങളിലേക്ക് തീ പടരാതിരിക്കാൻ സുരക്ഷാ ജീവനക്കാരും ഫയർഫോഴ്സും യഥാസമയം ഇടപെട്ടതിനാൽ വലിയൊരു ദുരന്തം ഒഴിവായി.
തൊട്ടടുത്ത ലായങ്ങളിൽ പാർപ്പിച്ചിരുന്ന മുന്നൂറ്റമ്പതോളം കുതിരകളെയും മറ്റ് മൃഗങ്ങളെയും സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. കുതിരപ്പന്തയ വ്യവസായത്തിലെ ഏറ്റവും കറുത്ത ദിനമാണിതെന്നും, കുതിരകളെ സ്നേഹിക്കുന്നവരുടെ ഏറ്റവും വലിയ പേക്കിനാവാണ് യാഥാർത്ഥ്യമായതെന്നും സരടോഗ ഹാർനെസ് ഹോഴ്സ് പേഴ്സൺസ് അസോസിയേഷൻ പ്രസ്താവനയിൽ പറഞ്ഞു.
അപകടത്തെത്തുടർന്ന് ചൊവ്വാഴ്ചത്തെ എല്ലാ മത്സരങ്ങളും റദ്ദാക്കി. ദാരുണാന്ത്യത്തിന് കുതിരകൾക്കായി കാസിനോ ഹോട്ടൽ മാനേജ്മെൻ്റ് പിന്നീട് പ്രത്യേക അനുസ്മരണ ചടങ്ങ് സംഘടിപ്പിക്കും. ലായവും ജീവനോപാധികളും നഷ്ടപ്പെട്ട കുതിര ഉടമകളെയും ജീവനക്കാരെയും സഹായിക്കുന്നതിനായി ഇതിനോടകം തന്നെ ഓൺലൈൻ വഴി 50,000 ഡോളറിലധികം (ഏകദേശം 41 ലക്ഷത്തിലധികം രൂപ) സമാഹരിച്ചിട്ടുണ്ട്. ഭാവിയിൽ ഇത്തരം ദുരന്തങ്ങൾ ആവർത്തിക്കാതിരിക്കാൻ കർശനമായ സുരക്ഷാ മുൻകരുതലുകൾ സ്വീകരിക്കുമെന്ന് സിറ്റി സൂപ്പർവൈസർ സാറാ ബർഗർ അറിയിച്ചു.
A fire broke out at a stable in Saratoga, New York; 17 racehorses died tragically
