ദില്ലി സർവ്വകലാശാല യൂണിയൻ തെരഞ്ഞെടുപ്പിൽ എ.ബി.വി.പി.ക്ക് വൻ വിജയം. പ്രസിഡന്റ്, സെക്രട്ടറി, ജോയിന്റ് സെക്രട്ടറി സ്ഥാനങ്ങൾ എ.ബി.വി.പി. നിലനിർത്തിയപ്പോൾ വൈസ് പ്രസിഡന്റ് സ്ഥാനത്തേക്ക് എൻ.എസ്.യു.ഐ. വിട്ട് സ്വതന്ത്രനായി മത്സരിച്ച ദീപാൻഷു ഷോക്കിൻ തെരഞ്ഞെടുക്കപ്പെട്ടു. പ്രസിഡന്റ് സ്ഥാനത്തേക്ക് നടന്ന ശക്തമായ പോരാട്ടത്തിൽ എ.ബി.വി.പി.യുടെ യശ് ദബാസ് 2053 വോട്ടിന്റെ വ്യത്യാസത്തിൽ എൻ.എസ്.യു.ഐ.യുടെ വിജയ് ശങ്കർ മീണയെ പരാജയപ്പെടുത്തി. സെക്രട്ടറി സ്ഥാനത്ത് റിയ ചാവ്ഡിയും ജോയിന്റ് സെക്രട്ടറി സ്ഥാനത്ത് ലക്ഷയ് രാജ് സിംഗും വിജയിച്ചു. എൻ.എസ്.യു.ഐ.ക്കും ഐസ, എസ്.എഫ്.ഐ. ഉൾപ്പെടുന്ന ഇടതു സഖ്യത്തിനും പ്രധാന സീറ്റുകളിൽ വലിയ തിരിച്ചടിയാണ് നേരിട്ടത്.
ഹോസ്റ്റൽ കെട്ടിടം തകർന്നു വീണതടക്കമുള്ള വിഷയങ്ങൾ ചർച്ചയായ തെരഞ്ഞെടുപ്പിന്റെ വോട്ടെണ്ണലിൽ തുടക്കത്തിൽ എൻ.എസ്.യു.ഐ. മുന്നിലായിരുന്നെങ്കിലും അവസാന റൗണ്ടുകളിൽ എ.ബി.വി.പി. മുന്നേറുകയായിരുന്നു. എന്നാൽ വോട്ടെണ്ണൽ തൽക്കാലം നിർത്തിവെച്ച് സർവകലാശാല അധികൃതർ എ.ബി.വി.പി.യെ സഹായിച്ചെന്ന് എൻ.എസ്.യു.ഐ. അധ്യക്ഷൻ വിനോദ് ജാക്കർ ആരോപിച്ചു. തങ്ങളുടെ വിജയം ബി.ജെ.പി. വലിയ ആഘോഷമാക്കുകയാണ്. യുവാക്കൾ വികസിത ഇന്ത്യയ്ക്കായും ക്രിയാത്മക രാഷ്ട്രീയത്തിനുമായി വോട്ടു ചെയ്തുവെന്നും, ജനങ്ങൾ നരേന്ദ്ര മോദിയിൽ നിന്ന് അകന്നു എന്ന കള്ളപ്രചാരണങ്ങൾക്കുള്ള മറുപടിയാണിതെന്നും ബി.ജെ.പി. അധ്യക്ഷൻ നിതിൻ നവീൻ പ്രതികരിച്ചു.
അതിനിടെ, തെരഞ്ഞെടുപ്പ് ഫലത്തിന് പിന്നാലെ സർവ്വകലാശാലയ്ക്ക് അകത്തും പുറത്തും വിദ്യാർത്ഥികളുടെ വലിയ പ്രതിഷേധവും സംഘർഷവും അരങ്ങേറി. വോട്ടെണ്ണലിൽ അട്ടിമറി നടത്തിയെന്നും സർവകലാശാല ഒത്തുകളിച്ചെന്നും ആരോപിച്ച് വൈസ് പ്രസിഡന്റ് സ്ഥാനത്തേക്ക് മത്സരിച്ച വിശേഷ് യാദവിന്റെ നേതൃത്വത്തിലാണ് വിദ്യാർത്ഥികൾ റോഡ് ഉപരോധിച്ചത്. കുത്തിയിരുന്ന് പ്രതിഷേധിച്ച വിദ്യാർത്ഥികളെ പോലീസ് ശക്തി ഉപയോഗിച്ച് നീക്കാൻ ശ്രമിച്ചത് വൻ തർക്കത്തിനും ഉന്തും തള്ളിനും വഴിവെച്ചു. പോലീസിനെ ഉപയോഗിച്ച് പ്രതിഷേധം അടിച്ചമർത്താൻ ശ്രമിക്കുമ്പോഴും പിരിഞ്ഞുപോകില്ലെന്ന നിലപാടിൽ ഒരുവിഭാഗം വിദ്യാർത്ഥികൾ ഉറച്ചുനിൽക്കുകയാണ്.
ABVP Wins Delhi University Elections; Opposition Alleges Rigging, Massive Protests Break Out in Campus
