വാഷിംഗ്ടൺ: പ്രസിഡന്റ് ഡോണൾഡ് ട്രംപിന്റെ ഉത്തരവിനെ തുടർന്ന് വൈറ്റ് ഹൗസിലേക്ക് പ്രവേശനം നിഷേധിച്ച് മാധ്യമപ്രവർത്തകരെ തടഞ്ഞതായി മാധ്യമ സ്ഥാപനങ്ങൾ അറിയിച്ചു. വൈറ്റ് ഹൗസ് പ്രവേശന കവാടത്തിൽ വെച്ച് എംഎസ് നൗ, സിഎൻഎൻ എന്നീ മാധ്യമങ്ങളുടെ മാധ്യമപ്രവർത്തകരെയും ക്യാമറാമാന്മാരെയും തിരിച്ചയച്ചതായി സിബിഎസ് ന്യൂസ് റിപ്പോർട്ട് ചെയ്തു. മാധ്യമപ്രവർത്തകരുടെ സ്ഥിരം പ്രവേശന പാസുകൾ റദ്ദാക്കിയിട്ടുണ്ട്.
എംഎസ് നൗ കറസ്പോണ്ടന്റ് അകേല ഗാർഡ്നറും ക്യാമറാമാനും ശനിയാഴ്ച രാവിലെ വൈറ്റ് ഹൗസിൽ പ്രവേശിക്കാൻ ശ്രമിച്ചെങ്കിലും സുരക്ഷാ ജീവനക്കാർ പ്രവേശനം നിഷേധിക്കുകയായിരുന്നു. പാസ് സ്വൈപ് ചെയ്യാൻ ശ്രമിച്ചപ്പോൾ അത് പ്രവർത്തനരഹിതമാക്കപ്പെട്ടതായി അകേല ഗാർഡ്നർ പറഞ്ഞു. കാരണം തിരക്കിയപ്പോൾ സുരക്ഷാ ജീവനക്കാർ അത് തങ്ങളുടെ അധികാരപരിധിയിൽ വരുന്നതല്ലെന്ന് മറുപടി നൽകി. സിഎൻഎൻ റിപ്പോർട്ടർ ബെറ്റ്സി ക്ലൈനും ക്യാമറാമാനും വൈറ്റ് ഹൗസ് മൈതാനത്ത് പ്രവേശിക്കാൻ ശ്രമിച്ചെങ്കിലും ബാഡ്ജുകൾ കൈപ്പറ്റാനാവാതെ മടങ്ങേണ്ടി വന്നു.
എംഎസ്എൻസിഎൻ എന്ന പേര് മാറ്റി എംഎസ് നൗ എന്നാക്കിയ മാധ്യമ സ്ഥാപനം ഇതിനെതിരെ ശക്തമായി പ്രതികരിച്ചു. ജനാധിപത്യത്തിലെ സ്വതന്ത്ര മാധ്യമപ്രവർത്തനത്തിന്റെ അവകാശങ്ങളും ഭരണഘടനയുടെ ഒന്നാം ഭേദഗതിയും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് അവർ പ്രസ്താവനയിൽ വ്യക്തമാക്കി. വൈറ്റ് ഹൗസ് അമേരിക്കൻ ജനതയുടേതാണെന്നും അവിടെയെടുക്കുന്ന തീരുമാനങ്ങൾ ജനങ്ങളുടെ നികുതിപ്പണം കൊണ്ടാണെന്നും അവർ ഓർമ്മിപ്പിച്ചു.
ഗവൺമെന്റുകളെയും മറ്റ് പൊതു സ്ഥാപനങ്ങളെയും ഉത്തരവാദികളാക്കാനുള്ള തങ്ങളുടെ ദൗത്യത്തിൽ നിന്ന് പിന്മാറില്ലെന്നും ഫ്രീഡം ഓഫ് പ്രെസ്സിനെ തടയാനുള്ള ഏത് ശ്രമത്തെയും പ്രതിരോധിക്കുമെന്നും സിഎൻഎൻ പ്രസ്താവനയിൽ അറിയിച്ചു. ട്രൂത്ത് സോഷ്യലിലൂടെ പോളിറ്റിക്കോ മാധ്യമപ്രവർത്തകർക്കും വൈറ്റ് ഹൗസിൽ പ്രവേശനം വിലക്കുമെന്ന് പ്രസിഡന്റ് ട്രംപ് വെള്ളിയാഴ്ച പ്രഖ്യാപിച്ചിരുന്നു. മറ്റ് ചില മാധ്യമങ്ങൾക്കെതിരെയും നടപടിയുണ്ടാകുമെന്ന് അദ്ദേഹം ഭീഷണിപ്പെടുത്തിയിട്ടുണ്ട്. പോളിറ്റിക്കോ മാധ്യമപ്രവർത്തകരെ തടഞ്ഞതായി റിപ്പോർട്ടുകളില്ലെങ്കിലും അവർ തങ്ങളുടെ ജീവനക്കാർക്ക് പിന്തുണയറിച്ച് പ്രസ്താവനയിറക്കിയിട്ടുണ്ട്.
മാധ്യമപ്രവർത്തകർ തങ്ങളുടെ ജോലി ചെയ്തതിന്റെ പേരിൽ മാത്രം ലക്ഷ്യം വെക്കപ്പെടുകയാണെന്ന് വൈറ്റ് ഹൗസ് കറസ്പോണ്ടന്റ്സ് അസോസിയേഷൻ പ്രസിഡന്റും ഫോക്സ് ന്യൂസ് റിപ്പോർട്ടറുമായ ജാക്വി ഹെൻറിച്ച് വ്യക്തമാക്കി. എംഎസ്എൻഒഡബ്ല്യു, സിഎൻഎൻ, പോളിറ്റിക്കോ എന്നീ മാധ്യമങ്ങളിലെ സഹപ്രവർത്തകർക്ക് പൂർണ്ണ പിന്തുണ നൽകുന്നതായും അവർ പറഞ്ഞു. വ്യാജ വാർത്തകൾ നൽകുന്നത് മടുത്തതുകൊണ്ടാണ് ഈ മാധ്യമങ്ങൾക്ക് വിലക്കേർപ്പെടുത്തുന്നത് എന്നായിരുന്നു ട്രംപിന്റെ ന്യായീകരണം. എന്നാൽ ഏതെങ്കിലും പ്രത്യേക വാർത്തകളെക്കുറിച്ചോ റിപ്പോർട്ടുകളെക്കുറിച്ചോ അദ്ദേഹം പരാമർശിച്ചിട്ടില്ല. മാധ്യമങ്ങളുടെ അസാധുവായ നടപടികൾക്കെതിരെ വ്യാപക പ്രതിഷേധമാണ് ഉയരുന്നത്.
