അറ്റ്ലാൻ്റ: ഫിഫ ലോകകപ്പിൽ വൻ അട്ടിമറി. കിരീടസാധ്യത കൽപ്പിക്കപ്പെട്ടിരുന്ന വമ്പന്മാരായ സ്പെയിനിനെ ഗോൾരഹിത സമനിലയിൽ തളച്ച് കുഞ്ഞൻമാരായ കേപ് വെർദെ ചരിത്രം കുറിച്ചു. ലോകകപ്പ് ചരിത്രത്തിലെ തങ്ങളുടെ കന്നി മത്സരത്തിൽ തന്നെ കരുത്തരായ സ്പെയിനിൽ നിന്ന് ഒരു പോയൻ്റ് പിടിച്ചെടുത്താണ് ആഫ്രിക്കൻ രാജ്യം ഫുട്ബോൾ ലോകത്തെ ഞെട്ടിച്ചത്.
അറ്റ്ലാൻ്റയിലെ മെർസിഡസ് ബെൻസ് സ്റ്റേഡിയത്തിൽ നടന്ന ഗ്രൂപ്പ് എച്ച് മത്സരത്തിൽ സ്പാനിഷ് ആക്രമണ നിരയെ മുഴുവൻ സമയവും പ്രതിരോധിച്ചു നിർത്താൻ കേപ് വെർദെയ്ക്ക് കഴിഞ്ഞു. 23 ഷോട്ടുകളുതിർത്ത് സ്പെയിൻ കളം നിറഞ്ഞെങ്കിലും കേപ് വെർദെയുടെ പ്രതിരോധ കോട്ട തകർക്കാനായില്ല.
വോസീഞ്ഞോ: കേപ് വെർദെയുടെ രക്ഷകൻ
40-ാം വയസ്സിൽ ലോകകപ്പിൽ അരങ്ങേറ്റം കുറിച്ച കേപ് വെർദെ ഗോൾകീപ്പർ വോസീഞ്ഞോയുടെ അവിശ്വസനീയമായ പ്രകടനമാണ് സ്പെയിനിന് വിജയവഴിയിൽ തടസ്സമായത്. സ്പെയിനിൻ്റെ 8 ഓൺ-ടാർഗെറ്റ് ഷോട്ടുകളാണ് വോസീഞ്ഞോ തട്ടിയകറ്റിയത്. തകർപ്പൻ പ്രകടനത്തോടെ മത്സരത്തിലെ മികച്ച താരമായി തിരഞ്ഞെടുക്കപ്പെട്ട വോസീഞ്ഞോ, ലോകകപ്പിൽ അരങ്ങേറുന്ന ഏറ്റവും പ്രായം കൂടിയ താരം എന്ന റെക്കോർഡും സ്വന്തമാക്കി.
രണ്ടാം പകുതിയിൽ സൂപ്പർ താരം ലാമിൻ യമാൽ പകരക്കാരനായി ഇറങ്ങിയിട്ടും സ്പാനിഷ് പടയ്ക്ക് ഗോൾ കണ്ടെത്താനായില്ല. ആദ്യ പകുതിയിൽ ഫെറാൻ ടോറസിന്റെ ഷോട്ട് ക്രോസ്ബാറിൽ തട്ടി തെറിച്ചതാണ് സ്പെയിന് ലഭിച്ച ഏറ്റവും മികച്ച അവസരം. മത്സരത്തിൻ്റെ അവസാന നിമിഷങ്ങളിൽ കേപ് വെർദെയ്ക്ക് അനുകൂലമായി ലഭിച്ച ഒരു ഹെഡ്ഡർ അവസരം സ്പാനിഷ് കീപ്പർ ഉനായ് സിമോൺ രക്ഷപെടുത്തിയതുകൊണ്ട് മാത്രമാണ് സ്പെയിൻ തോൽവിയിൽ നിന്ന് രക്ഷപെട്ടത്.
കേവലം 5.5 ലക്ഷം മാത്രം ജനസംഖ്യയുള്ള കേപ് വെർദെ, ലോകകപ്പ് കളിക്കുന്ന ചരിത്രത്തിലെ ഏറ്റവും ചെറിയ മൂന്നാമത്തെ രാജ്യമാണ്. ഈ സമനിലയോടെ ഗ്രൂപ്പിൽ നിന്ന് അടുത്ത റൗണ്ടിലേക്ക് കടക്കാനുള്ള സ്പെയിനിൻ്റെ സാധ്യതകൾക്ക് കടുത്ത വെല്ലുവിളിയാണ് ഉയർന്നിരിക്കുന്നത്.
Cape Verde held Spain, the defending champions, to a goalless draw in the FIFA World Cup
