അലബാമ: അമേരിക്കയിലെ അലബാമയിലുണ്ടായ ദാരുണമായ വാഹനാപകടത്തിൽ പരിക്കേറ്റ 27 കാരനായ ഇന്ത്യൻ വിദ്യാർത്ഥി സായ് തേജ തീവ്രപരിചരണ വിഭാഗത്തിൽ ജീവിതത്തിനായി പോരാടുന്നു. പ്രായപൂർത്തിയാകാത്ത ഒരു ഡ്രൈവർ ഓടിച്ച വാഹനം സായ് തേജ സഞ്ചരിച്ചിരുന്ന കാറിലേക്ക് ഇടിച്ചുകയറുകയായിരുന്നു. അലബാമയിലെ ബാപ്റ്റിസ്റ്റ് മെഡിക്കൽ സെൻ്റർ സൗത്തിൽ നിലവിൽ ബോധരഹിതനായ അവസ്ഥയിലാണ് അദ്ദേഹം.
ഹൈദരാബാദ് സ്വദേശിയായ സായ് തേജ അടുത്തിടെയാണ് യു.എസിലെ ന്യൂ ഇംഗ്ലണ്ട് യൂണിവേഴ്സിറ്റിയിൽ നിന്ന് മാസ്റ്റേഴ്സ് ബിരുദം പൂർത്തിയാക്കിയത്. തുടർന്ന് ജോലി അന്വേഷിച്ചുവരികയായിരുന്നു. സുഹൃത്തിൻ്റെ ബിരുദദാന ചടങ്ങിൽ പങ്കെടുത്ത ശേഷം മടങ്ങുന്നതിനിടെയാണ് മോണ്ട്ഗോമറിയിൽ വെച്ച് അപകടമുണ്ടായത്.
അപകടത്തിൽ സായ് തേജയുടെ തലച്ചോറിന് ഗുരുതരമായി പരിക്കേൽക്കുകയും താടിയെല്ലിനും ഇടത് കാലിനും ഒടിവുണ്ടാവുകയും ചെയ്തു. സായ് തേജയോടൊപ്പം വാഹനത്തിലുണ്ടായിരുന്ന സുഹൃത്ത് അഖിൽ നിസ്സാര പരിക്കുകളോടെ രക്ഷപ്പെട്ടു.
സായ് തേജയ്ക്ക് യു.എസിൽ നിലവിൽ മെഡിക്കൽ ഇൻഷുറൻസ് ഇല്ലെന്നത് ചികിത്സ മുന്നോട്ട് കൊണ്ടുപോകുന്നതിന് വലിയ പ്രതിസന്ധി സൃഷ്ടിക്കുന്നുണ്ട്. അദ്ദേഹത്തിൻ്റെ പിതാവും സഹോദരനും ഇന്ത്യയിലാണുള്ളത്. യു.എസിലുള്ള കുറച്ചു സുഹൃത്തുക്കളും ബന്ധുക്കളുമാണ് ഇപ്പോൾ പരിചരണത്തിന് കൂടെയുള്ളത്.
സായ് തേജയുടെ ബോധം തിരിച്ചുകിട്ടിയാലും മാസങ്ങളോളം നീളുന്ന ന്യൂറോളജിക്കൽ കെയർ, ഫിസിക്കൽ തെറാപ്പി, സ്പീച്ച് തെറാപ്പി തുടങ്ങിയ വിപുലമായ പുനരധിവാസ ചികിത്സകൾ ആവശ്യമായി വരുമെന്ന് ഡോക്ടർമാർ അറിയിച്ചു. ചികിത്സാച്ചെലവുകൾക്കും മറ്റ് സഹായങ്ങൾക്കുമായി സുഹൃത്ത് അഖിലിൻ്റെ നേതൃത്വത്തിൽ ഓൺലൈൻ വഴി സഹായധന ശേഖരണം ആരംഭിച്ചിട്ടുണ്ട്.
Car accident in US: Indian student from Hyderabad in critical condition; Accident involving a car driven by a minor
