സിബിഎസ്ഇ പരീക്ഷകളുടെ പുനർമൂല്യനിർണയത്തിനായുള്ള ഔദ്യോഗിക പോർട്ടലിന് നേരെ വൻ സൈബർ ആക്രമണശ്രമം ഉണ്ടായതായി അധികൃതർ അറിയിച്ചു. പോർട്ടലിന്റെ പ്രവർത്തനം പൂർണ്ണമായി തടസ്സപ്പെടുത്താൻ ലക്ഷ്യമിട്ടുള്ള ആക്രമണങ്ങളാണ് ഇന്ന് നടന്നത്. ഇതിന്റെ ഭാഗമായി വെറും രണ്ട് മിനിറ്റിനുള്ളിൽ 15 ലക്ഷത്തിലധികം ഹിറ്റുകൾ പോർട്ടലിലേക്ക് വരുത്തിച്ചുകൊണ്ടുള്ള ഡിനയൽ ഓഫ് സർവീസ് (DoS) ആക്രമണശ്രമമാണ് പ്രധാനമായും ഉണ്ടായത്. എന്നാൽ സൈബർ സെക്യൂരിറ്റി വിഭാഗത്തിന്റെ കൃത്യമായ ഇടപെടലിലൂടെ ഈ അട്ടിമറി നീക്കത്തെ വിജയകരമായി പ്രതിരോധിക്കാൻ സിബിഎസ്ഇക്ക് കഴിഞ്ഞു.
പോർട്ടലിൽ സൂക്ഷിച്ചിട്ടുള്ള വിദ്യാർത്ഥികളുടെ സുപ്രധാന വിവരങ്ങളും ഫയലുകളും ചോർത്താനായി ഒരു ലക്ഷത്തിലധികം തവണ അനധികൃത കടന്നുകയറ്റ ശ്രമങ്ങളും സൈബർ അക്രമികളുടെ ഭാഗത്തുനിന്നും ഉണ്ടായിട്ടുണ്ട്. സൈബർ ആക്രമണ ഭീഷണി നിലനിൽക്കുന്നുണ്ടെങ്കിലും വിദ്യാർത്ഥികൾക്ക് യാതൊരുവിധ ബുദ്ധിമുട്ടുകളും ഉണ്ടാകാത്ത രീതിയിൽ സുരക്ഷ ശക്തമാക്കിയിട്ടുണ്ടെന്ന് സൈബർ സുരക്ഷാ വിഭാഗം വ്യക്തമാക്കി. വിദ്യാർത്ഥികളിൽ നിന്നുള്ള പ്രതികരണങ്ങൾ കണക്കിലെടുത്ത് പോർട്ടലിലെ സെഷൻ സമയപരിധി വർദ്ധിപ്പിക്കുന്നതുൾപ്പെടെയുള്ള ക്രമീകരണങ്ങൾ വരുത്തിയിട്ടുണ്ട്.
അതേസമയം പോർട്ടൽ വഴിയുള്ള അപേക്ഷാ സമർപ്പണം തടസ്സമില്ലാതെ തുടരുകയാണ്. ഇന്ന് ഉച്ചയ്ക്ക് മൂന്ന് മണി വരെയുള്ള കണക്കുകൾ പ്രകാരം പതിനാറായിരത്തിലധികം വിദ്യാർത്ഥികളാണ് പുനർമൂല്യനിർണയത്തിനായി വിജയകരമായി അപേക്ഷ സമർപ്പിച്ചത്. ഒരേ സമയം എണ്ണായിരത്തിലധികം ഉപഭോക്താക്കളാണ് നിലവിൽ ഈ പോർട്ടൽ ഉപയോഗിച്ചുകൊണ്ടിരിക്കുന്നത്. വരും ദിവസങ്ങളിലും വിദ്യാർത്ഥികൾക്ക് സുഗമമായി അപേക്ഷ നൽകാനുള്ള എല്ലാ സഹായങ്ങളും സുരക്ഷയും ഉറപ്പാക്കാൻ തങ്ങളുടെ സംഘം സദാ സന്നദ്ധരാണെന്ന് സിബിഎസ്ഇ അറിയിച്ചു.
CBSE Revaluation Portal Targets by Cyberattacks; Authorities Successfully Defend Disruptive Attempts
