പശ്ചിമേഷ്യന് സംഘര്ഷത്തിന്റെ പശ്ചാത്തലത്തില് വാണിജ്യ എല്പിജി വിതരണത്തിന് ഏര്പ്പെടുത്തിയ താത്ക്കാലിക നിയന്ത്രണങ്ങള് നീക്കി കേന്ദ്രസര്ക്കാര്. കേന്ദ്ര പെട്രോളിയം മന്ത്രാലയത്തിന്റേതാണ് തീരുമാനം. ഇക്കാര്യം ചൂണ്ടിക്കാട്ടി സംസ്ഥാനങ്ങള്ക്ക് കേന്ദ്രം കത്തയച്ചു. കേന്ദ്ര പെട്രോളിയം മന്ത്രാലയം സെക്രട്ടറി നീരജ് മിത്തലാണ് നിയന്ത്രണങ്ങള് നീക്കിയത് ചൂണ്ടിക്കാട്ടി സംസ്ഥാന ചീഫ് സെക്രട്ടറിമാര്ക്ക് കത്തയച്ചത്.
ഇതോടെ പ്രതിസന്ധിക്ക് മുമ്പുള്ള നിലവാരത്തിലേക്ക് വാണിജ്യ എല്പിജി വിതരണം പുനസ്ഥാപിക്കും. പ്രതിസന്ധിക്ക് മുമ്പുള്ള ഉപഭോഗത്തിന്റെ 50 ശതമാനം വരെ ബള്ക്ക് എല്പിജി വിതരണങ്ങള് പുനസ്ഥാപിച്ചേക്കുമെന്നാണ് ലഭിക്കുന്ന വിവരം. ദീര്ഘകാല പരിഹാരമായി പിഎന്ജിയിലേക്ക് മാറുന്നത് പരിഗണിക്കണമെന്ന നിര്ദേശവും കേന്ദ്രം ആവര്ത്തിച്ചിട്ടുണ്ട്.
എന്നാൽ, വിലവര്ധനവ് പിന്വലിക്കുന്നതുമായി ബന്ധപ്പെട്ട് നിലവില് നിര്ദേശങ്ങളൊന്നും വന്നിട്ടില്ല. പെട്രോളിയം വിതരണ കമ്പനികളുടെ യോഗത്തിലായിരിക്കും തീരുമാനം. ഹോര്മുസ് കടലിടുക്ക് വഴിയുള്ള ചരക്ക് നീക്കങ്ങള് പുനസ്ഥാപിക്കാന് സാധിച്ചതിനാലാണ് രാജ്യത്തെ എല്പിജി പ്രതിസന്ധി ഒഴിയുന്നത്.
Centre lifts commercial LPG restrictions; distribution to resume as it was prior to the Iran conflict; states informed via letter.
