ബീജിംഗ്: ചൈനയിൽ ശരിയായ ടോയ്‌ലറ്റുകൾ പോലുമില്ലെന്ന മുൻ വൈറ്റ് ഹൗസ് പ്രസ് സെക്രട്ടറി കാറ്റി സഖറിയയുടെ പരാമർശത്തിന് മറുപടിയുമായി ചൈനീസ് വിദേശകാര്യ മന്ത്രാലയം. അവസരം ലഭിക്കുമ്പോൾ ചൈന സന്ദർശിക്കാനും കൂടുതൽ കാര്യങ്ങൾ നേരിട്ട് മനസ്സിലാക്കാനും അവർക്ക് സ്വാഗതം ഉണ്ടെന്ന് ചൈനീസ് വിദേശകാര്യ വക്താവ് മാവോ നിങ് പരിഹസിച്ചു. 2016-ലെ യുഎസ് തിരഞ്ഞെടുപ്പിന് മുന്നോടിയായുള്ള രാഷ്ട്രീയ ചർച്ചകൾക്കിടയിലാണ് ചൈനീസ് സംവിധാനങ്ങളെ വിമർശിച്ച് കാറ്റി സഖറിയ രംഗത്തെത്തിയത്.
ചൈനയിൽ നിന്ന് വന്ന് നോക്കുമ്പോൾ എങ്ങനെയാണ് അവർ അടുത്ത വലിയ ശക്തിയായി മാറുന്നതെന്ന് താൻ അത്ഭുതപ്പെട്ടിട്ടുണ്ടെന്നും, അവിടെ ശരിയായ ടോയ്‌ലറ്റുകൾ പോലും ഇല്ലെന്നുമായിരുന്നു അവരുടെ പരാമർശം. പോഡ്‌കാസ്റ്റിൽ നടത്തിയ ഈ പരാമർശങ്ങൾ വൻ വിവാദങ്ങൾക്ക് വഴിവെച്ചിരുന്നു. ചൈനയുടെ പ്രശസ്തമായ സമൂഹമാധ്യമമായ വെയ്‌ബോയിലും ഇത് വലിയ ചർച്ചയായി. പത്തുവർഷം മുമ്പത്തെ ചില സാഹചര്യങ്ങളെയാകാം അവർ ഉദ്ദേശിച്ചതെങ്കിലും ഇപ്പോഴത്തെ പരാമർശം മണ്ടത്തരമാണെന്ന രീതിയിലാണ് പലരും പ്രതികരിച്ചത്.
അമേരിക്കൻ പ്രസിഡന്‍റ് ഡോണൾഡ് ട്രംപിന്‍റെ പ്രസ് സെക്രട്ടറിയായി ചുമതലയേറ്റ് ഒരാഴ്ച തികയും മുൻപ് തന്നെ കടുത്ത വിമർശനങ്ങളെ തുടർന്ന് കാറ്റി സഖറിയയ്ക്ക് പദവി നഷ്ടമായിരുന്നു. ഇതിന് പിന്നാലെയാണ് ചൈനീസ് ഔദ്യോഗിക വക്താവിന്റെ പ്രതികരണം പുറത്തുവന്നത്. 1970-കളുടെ അവസാനം സാമ്പത്തിക രംഗത്ത് ഉദാരവൽക്കരണം നടപ്പിലാക്കിയതിനുശേഷം ലോകത്തിലെ രണ്ടാമത്തെ വലിയ സാമ്പത്തിക ശക്തിയായി ചൈന വളർന്നുവെങ്കിലും, നഗരങ്ങളും ഗ്രാമങ്ങളും തമ്മിലുള്ള വികസനത്തിലെ അസമത്വങ്ങൾ ഇനിയും പൂർണ്ണമായി പരിഹരിക്കപ്പെട്ടിട്ടില്ല. മുൻകാലങ്ങളിൽ ബീജിംഗിലെ ഒരു നിയമസ്ഥാപനത്തിൽ അസോസിയേറ്റായി കാറ്റി സഖറിയ ജോലി ചെയ്തിട്ടുണ്ടെന്നാണ് അവരുടെ ലിങ്ക്ഡ്ഇൻ പ്രൊഫൈൽ വ്യക്തമാക്കുന്നത്.
