പകുതിയിലധികം യുഎസ് സംസ്ഥാനങ്ങളിൽ ഭീതി വിതച്ച് ‘സൈക്ലോസ്പോറിയാസിസ്’; എന്താണ് ഈ രോഗം? എങ്ങനെ തടയാം?

വാഷിംഗ്ടൺ: അമേരിക്കയിലെ പകുതിയിലധികം സംസ്ഥാനങ്ങളിൽ കടുത്ത വയറിളക്കത്തിന് കാരണമാകുന്ന ‘സൈക്ലോസ്പോറിയാസിസ്’ രോഗബാധ അതിവേഗം പടരുന്നതായി റിപ്പോർട്ട്. ‘സൈക്ലോസ്പോറ’ എന്ന സൂക്ഷ്മ പരാദ ജീവി പരത്തുന്ന ഈ രോഗം നിലവിൽ യുഎസിലെ 31 സംസ്ഥാനങ്ങളെ ബാധിച്ചുകഴിഞ്ഞു. കഴിഞ്ഞ ഏതാനും ആഴ്ചകൾക്കുള്ളിൽ ആയിരക്കണക്കിന് ആളുകൾക്കാണ് രോഗബാധ സ്ഥിരീകരിച്ചിട്ടുള്ളത്.

യുഎസ് സെൻ്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) പുറത്തുവിട്ട വിവരങ്ങൾ പ്രകാരം രോഗബാധിതരുടെ എണ്ണം ഇനിയും ഉയരാൻ സാധ്യതയുണ്ട്. നിലവിൽ ഔദ്യോഗികമായി സ്ഥിരീകരിച്ച കേസുകൾക്ക് പുറമെ, ആയിരത്തഞ്ഞൂറിലധികം ആളുകൾ നിരീക്ഷണത്തിലാണ്. രോഗം ബാധിച്ചവരിൽ 86 ഓളം പേരെ ആശുപത്രിയിൽ പ്രവേശിപ്പിച്ചെങ്കിലും ഇതുവരെ മരണങ്ങളൊന്നും റിപ്പോർട്ട് ചെയ്തിട്ടില്ല.

മിഷിഗണിൽ സ്ഥിതി ഗുരുതരം

അമേരിക്കയിലെ മിഷിഗൺ സംസ്ഥാനത്തെയാണ് രോഗബാധ ഏറ്റവും കൂടുതൽ ബാധിച്ചിരിക്കുന്നത്. ഇവിടെ വെറും രണ്ടാഴ്ചയ്ക്കുള്ളിൽ ആയിരത്തിലധികം ആളുകൾക്ക് രോഗം സ്ഥിരീകരിച്ചു. ന്യൂയോർക്ക് (300 കേസുകൾ), ഒഹായോ (177 കേസുകൾ), ഇല്ലിനോയി (141 കേസുകൾ) എന്നിവയാണ് രോഗവ്യാപനം കൂടുതലുള്ള മറ്റ് പ്രധാന സംസ്ഥാനങ്ങൾ.

പകരുന്നത് ഭക്ഷണത്തിലൂടെയും വെള്ളത്തിലൂടെയും

മലിനമായ ഭക്ഷണത്തിലൂടെയും വെള്ളത്തിലൂടെയുമാണ് ഈ പരാദ ജീവി മനുഷ്യശരീരത്തിൽ പ്രവേശിക്കുന്നത്. രോഗബാധയേറ്റാൽ കടുത്തതും നിയന്ത്രിക്കാൻ കഴിയാത്തതുമായ വയറിളക്കമാണ് പ്രധാന ലക്ഷണം. പരാദം ശരീരത്തിൽ പ്രവേശിച്ച് ഏകദേശം ഒരു ആഴ്ചയ്ക്ക് ശേഷമായിരിക്കും ലക്ഷണങ്ങൾ കണ്ടുതുടങ്ങുക. കൃത്യമായ ചികിത്സ ലഭിച്ചില്ലെങ്കിൽ രോഗം ഒരു മാസം വരെ നീണ്ടുനിൽക്കാം. എന്നാൽ, ഈ രോഗം ഒരാളിൽ നിന്ന് മറ്റൊരാളിലേക്ക് നേരിട്ട് പകരില്ലെന്ന് ആരോഗ്യവിദഗ്ദ്ധർ വ്യക്തമാക്കുന്നു.

ഉറവിടം വ്യക്തമല്ല; അസംസ്കൃത പച്ചക്കറികളെന്ന് സംശയം

രോഗബാധയുടെ കൃത്യമായ ഉറവിടം കണ്ടെത്താൻ ആരോഗ്യവകുപ്പിന് ഇതുവരെ സാധിച്ചിട്ടില്ല. രോഗബാധിതർ ആരും തന്നെ സമീപകാലത്ത് വിദേശയാത്രകൾ നടത്തിയിട്ടില്ലാത്തതിനാൽ അമേരിക്കയിൽ നിന്ന് തന്നെയാണ് രോഗബാധയേറ്റതെന്ന് സ്ഥിരീകരിച്ചിട്ടുണ്ട്. കൃഷിയിടങ്ങളിലെ മണ്ണിൽ നിന്നോ ജലസേചനത്തിന് ഉപയോഗിക്കുന്ന വെള്ളത്തിൽ നിന്നോ പച്ചക്കറികളിലേക്ക് പരാദം പടർന്നതാകാമെന്നാണ് നിഗമനം. മുൻകാലങ്ങളിൽ പാക്കറ്റുകളിൽ ലഭിക്കുന്ന സാലഡ് മിക്സുകൾ, മല്ലിയില, തുളസിയില, റാസ്ബെറി പഴങ്ങൾ, ഉള്ളിത്തണ്ട് എന്നിവയിലൂടെ സമാനമായ രോഗവ്യാപനം ഉണ്ടായിട്ടുണ്ട്.

മുൻകരുതൽ നിർദ്ദേശങ്ങളുമായി ആരോഗ്യവകുപ്പ്

രോഗവ്യാപനം ശക്തമായ പശ്ചാത്തലത്തിൽ ജനങ്ങൾ കർശനമായ മുൻകരുതലുകൾ എടുക്കണമെന്ന് ആരോഗ്യവകുപ്പ് നിർദ്ദേശിച്ചു:

• സാലഡുകൾക്കായി ഉപയോഗിക്കുന്ന ഇലക്കറികളും പച്ചക്കറികളും ഉപയോഗിക്കുന്നതിന് മുൻപ് നന്നായി കഴുകുക.
• സാധ്യമാകുന്നിടത്തോളം ഇലക്കറികളും റാസ്ബെറി പോലുള്ള പഴങ്ങളും വേവിച്ച് മാത്രം കഴിക്കുക.
• ലെറ്റൂസ്, ഉള്ളിത്തണ്ട് എന്നിവയുടെ പുറമെയുള്ള ഭാഗങ്ങൾ പൂർണ്ണമായും കളഞ്ഞതിന് ശേഷം ഉപയോഗിക്കുക.
• കടുത്ത വയറിളക്കവും മറ്റ് അസ്വസ്ഥതകളും അനുഭവപ്പെടുന്നവർ സ്വയംചികിത്സ ഒഴിവാക്കി ഉടനടി ഡോക്ടറെ സമീപിക്കുക.

Cyclosporiasis spreads fear in more than half of US states; What is this disease? How can it be prevented?