കുവൈറ്റ് സിറ്റി/വാഷിംഗ്ടൺ: കഴിഞ്ഞ ബുധനാഴ്ച കുവൈറ്റ് അന്താരാഷ്ട്ര വിമാനത്താവളത്തിൽ വൻ നാശനഷ്ടമുണ്ടാക്കിയ ആക്രമണം നടത്തിയത് ഇറാൻ നിർമ്മിത ഡ്രോൺ ആണെന്ന് സ്ഥിരീകരിച്ച് അന്താരാഷ്ട്ര ആയുധ വിദഗ്ധർ. പ്രമുഖ ആയുധ ഗവേഷണ സ്ഥാപനമായ ‘ആർമമെന്റ് റിസർച്ച് സർവീസസ്’ ഡയറക്ടറും മ്യൂണിഷൻ സ്പെഷ്യലിസ്റ്റുമായ എൻ.ആർ. ജെൻസൻ-ജോൺസൺ സി.എൻ.എന്നിന് നൽകിയ അഭിമുഖത്തിലാണ് ഇക്കാര്യം വെളിപ്പെടുത്തിയത്.
സംഭവത്തിന്റെ വീഡിയോ ദൃശ്യങ്ങൾ പരിശോധിച്ചതിൽ നിന്നും, ഇറാന്റെ മാരകമായ ‘ഷാഹെദ്-136’ സീരീസിൽപ്പെട്ട വൺ-വേ അറ്റാക്ക് അഥവാ കാമികാസെ ഡ്രോൺ ആണ് വിമാനത്താവളത്തിന്റെ ടെർമിനൽ കെട്ടിടത്തിൽ പതിച്ചതെന്ന് അദ്ദേഹം വ്യക്തമാക്കി. സ്ഫോടനത്തിന്റെ തീവ്രതയും ആഘാതവും ഈ ആയുധത്തിന്റേതുമായി പൂർണ്ണമായി ഒത്തുപോകുന്നതാണെന്നും അദ്ദേഹം കൂട്ടിച്ചേർത്തു.
ആക്രമണത്തിന്റേതെന്ന് ചൂണ്ടിക്കാട്ടി കുവൈറ്റ് വ്യോമയാന അതോറിറ്റി വ്യാഴാഴ്ച പുറത്തുവിട്ട ദൃശ്യങ്ങളിൽ, ഡ്രോൺ വിമാനത്താവളത്തിൽ വന്നിടിക്കുന്നതും വലിയ തോതിൽ തീഗോളങ്ങൾ ഉയരുന്നതും വ്യക്തമാണ്. വിമാനാപകടാവശിഷ്ടങ്ങളിൽ നിന്ന് കണ്ടെടുത്ത എഞ്ചിന്റെ ഭാഗങ്ങൾ ഷാഹെദ് ഡ്രോണുകളിൽ സാധാരണയായി ഉപയോഗിക്കുന്ന ഇറാൻ നിർമ്മിത ‘MD550’ എഞ്ചിനാണെന്നും ആയുധ വിദഗ്ധർ സ്ഥിരീകരിച്ചു.
അമേരിക്കയും കുവൈറ്റും കൃത്യമായ തെളിവുകൾ പുറത്തുവിട്ടിട്ടും, വിമാനത്താവള ആക്രമണത്തിന്റെ ഉത്തരവാദിത്തം ഇറാൻ ഇപ്പോഴും നിഷേധിക്കുകയാണ്. വിമാനത്താവളത്തിലുണ്ടായ നാശനഷ്ടങ്ങൾ ഇറാന്റെ ആക്രമണം മൂലമല്ലെന്നും, പകരം അവിടെ വിന്യസിച്ചിരുന്ന അമേരിക്കൻ നിർമ്മിത ‘പേട്രിയറ്റ്’ മിസൈൽ പ്രതിരോധ സംവിധാനത്തിലുണ്ടായ സാങ്കേതിക തകരാറാണ് കാരണമെന്നുമാണ് ഇസ്ലാമിക് റവല്യൂഷണറി ഗാർഡ് കോർപ്സ് വക്താവ് ബ്രിഗേഡിയർ ജനറൽ ഹൊസൈൻ മൊഹ്ബി അവകാശപ്പെട്ടത്.
എന്നാൽ ഇറാന്റെ ഈ വാദം “പൂർണ്ണമായും വ്യാജമാണെന്ന്” യു.എസ് സെൻട്രൽ കമാൻഡ് ആവർത്തിച്ചു. യാത്രാവിമാനങ്ങൾ സർവീസ് നടത്തുന്ന ഒരു സിവിലിയൻ വിമാനത്താവളത്തിന് നേരെ ഇറാൻ ബോധപൂർവ്വം നടത്തിയ ക്രൂരമായ ആക്രമണമാണിതെന്ന് സെന്റകോം വ്യക്തമാക്കി. കുവൈറ്റ് വിമാനത്താവളത്തിന് നേരെയുണ്ടായ ഈ ഡ്രോൺ ആക്രമണത്തിൽ ഒരാൾ കൊല്ലപ്പെടുകയും 63 പേർക്ക് പരിക്കേൽക്കുകയും ചെയ്തതായി കുവൈറ്റ് അധികൃതർ ഔദ്യോഗികമായി സ്ഥിരീകരിച്ചു. ആക്രമണത്തെത്തുടർന്ന് ഗൾഫ് മേഖലയിലാകെ കനത്ത യുദ്ധഭീതിയും ജാഗ്രതയും തുടരുകയാണ്.
