അമേരിക്കയിൽ ഡേലൈറ്റ് സേവിങ് സമയം നവംബർ ഒന്നിന് അവസാനിക്കുന്നു. ഇതോടെ ഞായറാഴ്ച പുലർച്ചെ രണ്ട് മണിയാകുമ്പോൾ ക്ലോക്കുകൾ ഒരു മണിക്കൂർ പിന്നോട്ടാക്കി ഒന്നാക്കും. അതുവഴി ആളുകൾക്ക് ഒരു മണിക്കൂർ അധികം ലഭിക്കും. എന്നാൽ, അമേരിക്കയിലെ 50 സംസ്ഥാനങ്ങളും ഈ സമയമാറ്റം പിന്തുടരുന്നില്ല. അരിസോണയുടെ ഭൂരിഭാഗം പ്രദേശങ്ങളിലും ഹവായിയിലും വർഷം മുഴുവൻ സ്റ്റാൻഡേർഡ് സമയമാണ് പിന്തുടരുന്നത്.
അമേരിക്കൻ സമോവ, ഗുവാം, നോർത്തേൺ മരിയാന ദ്വീപുകൾ, പ്യൂർട്ടോ റിക്കോ, വിർജിൻ ദ്വീപുകൾ തുടങ്ങിയ യുഎസ് അധീനപ്രദേശങ്ങളും ഡേലൈറ്റ് സേവിങ് സമയം നടപ്പാക്കുന്നില്ല. എന്നാൽ അരിസോണയിലെ നവാജോ നേഷൻ ഈ സമയമാറ്റം പിന്തുടരുന്നുണ്ട്. അമേരിക്കൻ കോൺഗ്രസ് പാസാക്കിയ നിയമപ്രകാരമാണ് ഡേലൈറ്റ് സേവിങ് സമയം നിയന്ത്രിക്കുന്നത്. എല്ലാ വർഷവും നവംബറിലെ ആദ്യ ഞായറാഴ്ച ക്ലോക്കുകൾ ഒരു മണിക്കൂർ പിന്നോട്ടാക്കും.
അരനൂറ്റാണ്ടിലേറെയായി അമേരിക്കയിൽ ഈ സമയക്രമം നിലവിലുണ്ട്. 1970കളിലെ എണ്ണപ്രതിസന്ധിക്കിടെ ഊർജം ലാഭിക്കാനായി കോൺഗ്രസ് ഡേലൈറ്റ് സേവിങ് സമയം അവസാനിപ്പിച്ചിരുന്നു. എന്നാൽ പുലർച്ചെ ഇരുട്ടിൽ കുട്ടികൾ സ്കൂളിലേക്ക് പോകേണ്ടിവരുമെന്ന രക്ഷിതാക്കളുടെ എതിർപ്പിനെത്തുടർന്ന് 1974ൽ തീരുമാനം പിൻവലിച്ചു. വർഷത്തിൽ രണ്ടുതവണ ക്ലോക്കുകൾ മാറ്റുന്ന രീതി തുടരണമോ അവസാനിപ്പിക്കണമോ എന്ന ചർച്ച വർഷങ്ങളായി തുടരുകയാണ്.
ഫ്ലോറിഡയിൽ നിന്നുള്ള പ്രതിനിധി വെർൺ ബുക്കാനൻ അവതരിപ്പിച്ച 2025ലെ സൺഷൈൻ പ്രൊട്ടക്ഷൻ ആക്ട്, സമയമാറ്റം അവസാനിപ്പിക്കണമെന്ന നിർദേശത്തോടെ ജനപ്രതിനിധിസഭയിൽ 308നെതിരെ 117 വോട്ടുകൾക്ക് പാസായി. ഡേലൈറ്റ് സേവിങ് സമയം തുടരുന്നതിനെ പിന്തുണയ്ക്കുന്നവർ ഇത് സമ്പദ്‌വ്യവസ്ഥയ്ക്ക് ഗുണകരമാകുമെന്നും ആളുകളെ കൂടുതൽ സമയം പുറംപ്രവർത്തനങ്ങളിൽ ഏർപ്പെടാൻ പ്രോത്സാഹിപ്പിക്കുമെന്നും വാദിക്കുന്നു.
വിനോദസഞ്ചാരം പ്രധാന വരുമാനമാർഗമായ ഫ്ലോറിഡയിൽ കൂടുതൽ സ്ഥിരതയുള്ള പകൽസമയം തൊഴിലാളികൾക്കും വ്യാപാരികൾക്കും സന്ദർശകർക്കും പ്രയോജനപ്പെടുമെന്ന് പ്രതിനിധി ഗസ് ബിലിറാക്കിസ് പറഞ്ഞു. അതേസമയം, ഇത്രയും വലിയ മാറ്റം നടപ്പാക്കുന്നതിന് മുമ്പ് കൂടുതൽ ചർച്ചയും പഠനവും വേണമെന്നാണ് എതിർക്കുന്നവരുടെ നിലപാട്. ജൂലൈയിൽ സെനറ്റിന്റെ പരിഗണനയ്ക്ക് അയച്ച ബിൽ പിന്നീട് അവിടെ മുന്നോട്ടുപോയിട്ടില്ല.
Daylight saving time is on track to end on Sunday in US
