പിണറായിയെ ഡൽഹി പൊലീസ് കസ്റ്റഡ‍ിയിലെടുത്ത് വട്ടംകറക്കിയത് മൂന്നര മണിക്കൂർ, മരുന്നും ഭക്ഷണവും മുടങ്ങി, ശാരീരിക അസ്വസ്ഥത അനുഭവപ്പെട്ടു; വൈകാതെ വിട്ടയക്കുമെന്ന് പൊലീസ്

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ പ്രതിഷേധിക്കാനെത്തിയ മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനെ ഡൽഹി പോലീസ് കസ്റ്റഡിയിലെടുത്ത് മൂന്നര മണിക്കൂറോളം വാഹനത്തിൽ വട്ടംകറക്കി. രാവിലെ പതിനൊന്ന് മണിയോടെ കസ്റ്റഡിയിലെടുത്ത അദ്ദേഹത്തെ ഉച്ചയ്ക്ക് ശേഷമാണ് മന്ദിർ മാർഗ് പോലീസ് സ്റ്റേഷനിലെത്തിച്ചത്. പ്രായത്തിന്റെ പരിഗണന പോലും നൽകാതെ ഭക്ഷണവും കൃത്യസമയത്തെ മരുന്നും നിഷേധിച്ചാണ് പോലീസിന്റെ നടപടിയെന്നും, ഇതേതുടർന്ന് പിണറായി വിജയന് ശാരീരിക അസ്വസ്ഥത അനുഭവപ്പെട്ടെന്നും ഒപ്പമുണ്ടായിരുന്ന ജോൺ ബ്രിട്ടാസ് എം.പി വ്യക്തമാക്കുകയുണ്ടായി.

കസ്റ്റഡിയിലുള്ള നേതാക്കളെ ഉന്നത നിർദേശമില്ലാതെ വിട്ടയക്കില്ലെന്ന നിലപാടിലാണ് പോലീസ് തുടരുന്നതെന്ന് ഒപ്പമുണ്ടായിരുന്ന കെ.എൻ. ബാലഗോപാൽ, ജോൺ ബ്രിട്ടാസ് എന്നിവർ ലൈവ് വീഡിയോയിലൂടെ ആരോപിച്ചു. പ്രായമായ മുതിർന്ന നേതാവിനോട് പോലീസ് തികച്ചും മോശമായാണ് പെരുമാറിയതെന്നും അവർ ചൂണ്ടിക്കാട്ടി. എന്നാൽ പിണറായി വിജയനടക്കമുള്ള നേതാക്കളെ ഔദ്യോഗികമായി അറസ്റ്റ് ചെയ്തിട്ടില്ലെന്നും വൈകാതെ വിട്ടയക്കുമെന്നുമാണ് പോലീസ് നൽകുന്ന വിശദീകരണം.

കേരള ഹൗസിൽ നിന്ന് ഇലക്ഷൻ കമ്മീഷൻ ഓഫീസിലേക്ക് മാർച്ചായി പുറപ്പെടാൻ ഒരുങ്ങുന്നതിനിടെയാണ് സി.പി.എം ജനറൽ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദൻ, പി.കെ. ശ്രീമതി, കെ.കെ. ശൈലജ, പി.ബി അംഗം വിജു കൃഷ്ണൻ, സി.ഐ.ടി.യു നേതാക്കൾ, എസ്.എഫ്.ഐ ദേശീയ അധ്യക്ഷൻ ആദർശ് സജി തുടങ്ങിയ പ്രമുഖ നേതാക്കളെ പോലീസ് കസ്റ്റഡിയിലെടുത്ത് നീക്കിയത്. ജനപ്രതിനിധികളെയും മുതിർന്ന നേതാക്കളെയും തടഞ്ഞുവെച്ച പോലീസിന്റെ നടപടിക്കെതിരെ കടുത്ത അമർഷമാണ് ഉയരുന്നത്.

അതേസമയം, മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുള്ള പ്രക്ഷോഭം ഡൽഹിയിലും രാജ്യവ്യാപകമായും ശക്തമായി തുടരുകയാണ്. സി.ജെ.പി ജന്തർമന്തറിലേക്ക് പ്രഖ്യാപിച്ച മാർച്ച് ഡൽഹി പോലീസ് സർവ്വ സന്നാഹങ്ങളുമായി തടയുകയും നേതാക്കളായ അഭിജീത് ദിപ്കെ, അശുതോഷ് രംഗ, സൗരവ് ദാസ് എന്നിവരെ വിമാനത്തിനുള്ളിൽ നിന്ന് നാടകീയമായി കസ്റ്റഡിയിലെടുക്കുകയും ചെയ്തു. എന്നാൽ നേതാക്കളെ തടവിലാക്കിയാലും സമരം അവസാനിപ്പിക്കില്ലെന്നും ജനാധിപത്യത്തെ രക്ഷിക്കാൻ പൊതുജനങ്ങൾ മുന്നോട്ട് വരണമെന്നും ആവശ്യപ്പെട്ട് പ്രക്ഷോഭങ്ങളുമായി മുന്നോട്ട് പോകാനാണ് സി.ജെ.പിയുടെ തീരുമാനം.

Delhi Police Detain Pinarayi Vijayan and Left Leaders; Protests Intensify Over Election Commissioner’s Resignation