മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഇന്ത്യാ സഖ്യം നടത്താനിരുന്ന ജനകീയ കുറ്റവിചാരണ പ്രതികൂല കാലാവസ്ഥയെ തുടർന്ന് നാളത്തേക്ക് മാറ്റിയതിന് പിന്നിൽ മുന്നണിക്കുള്ളിലെ ഐക്യമില്ലായ്മയാണെന്ന് ബി.ജെ.പി ആരോപിച്ചു. കാലാവസ്ഥയല്ല, മറിച്ച് കക്ഷികൾ തമ്മിലുള്ള അഭിപ്രായവ്യത്യാസവും ചില പാർട്ടികളുടെ പിന്മാറ്റവുമാണ് പരിപാടി മാറ്റാൻ കാരണമെന്ന് ബി.ജെ.പി ദേശീയ വക്താവ് സാംപിത് പത്ര വിമർശിച്ചു. ‘മോക്ക് പാർലമെന്റ്’ എന്ന പേര് ജനകീയ കുറ്റവിചാരണ എന്ന് മാറ്റിയതും മുന്നണിക്കുള്ളിലെ സമ്മർദ്ദം കൊണ്ടാണെന്നും അദ്ദേഹം കുറ്റപ്പെടുത്തി.
എന്നാൽ ഡൽഹിയിലെ കനത്ത മഴയും മുതിർന്ന നേതാക്കൾക്ക് ദീർഘനേരം മഴയത്ത് തുടരാനുള്ള ബുദ്ധിമുട്ടും കണക്കിലെടുത്താണ് പരിപാടി മാറ്റിയതെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി വ്യക്തമാക്കി. പുതിയ തീരുമാനപ്രകാരം നാളെ ഉച്ചയ്ക്ക് ശേഷം രണ്ടരയ്ക്ക് കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ വസതിയിൽ വെച്ച് കുറ്റവിചാരണ നടക്കും. നവംബർ ഒന്നിന് രാംലീല മൈതാനത്ത് നടക്കാനിരിക്കുന്ന മഹാറാലി തടയുന്നുവെന്ന കോൺഗ്രസ് ആരോപണം ബി.ജെ.പി തള്ളിക്കളയുകയും ചെയ്തു.
നാളെ നടക്കുന്ന പ്രതീകാത്മക പരസ്യ വിചാരണയിൽ മുൻ ലോക്‌സഭാ സ്പീക്കർ മീരാ കുമാർ പ്രതീകാത്മക സ്പീക്കറാകും. ഗ്യാനേഷ് കുമാറിനെ പുറത്താക്കണമെന്ന പ്രമേയം മല്ലികാർജുൻ ഖർഗെ അവതരിപ്പിക്കും. എം.പിമാരും സഖ്യനേതാക്കളും പൗരാവകാശ പ്രവർത്തകരും സംസാരിക്കുന്ന ചടങ്ങിൽ, വോട്ടർ പട്ടിക പരിഷ്കരണത്തിലൂടെ വോട്ടവകാശം നഷ്ടപ്പെട്ടവരും തങ്ങളുടെ അനുഭവങ്ങൾ പങ്കുവെക്കും. രാഹുൽ ഗാന്ധിയുടെ മറുപടി പ്രസംഗത്തിന് ശേഷം ഗ്യാനേഷ് കുമാറിനെ പുറത്താക്കിക്കൊണ്ടുള്ള പ്രതീകാത്മക വിധി സ്പീക്കർ പ്രഖ്യാപിക്കും.
BJP Claims Internal Rift Behind Postponed Trial of CEC: INDIA Alliance to Hold Event Tomorrow with Meira Kumar as Speaker
