വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിനുള്ള നേരത്തെയുള്ള വോട്ടെടുപ്പ് ആരംഭിച്ചു. കോൺഗ്രസിന്റെ നിയന്ത്രണം ഏത് പാർട്ടിക്ക് ലഭിക്കുമെന്നതിൽ നിർണായകമാകുന്ന തിരഞ്ഞെടുപ്പിൽ വെള്ളിയാഴ്ചയാണ് നേരിട്ടുള്ള വോട്ടെടുപ്പ് തുടങ്ങിയത്. ജീവിതച്ചെലവ് വർധന, ഇറാൻ യുദ്ധം തുടങ്ങിയ വിഷയങ്ങൾക്കിടെയാണ് അമേരിക്കക്കാർ വോട്ട് ചെയ്യുന്നത്. തിരഞ്ഞെടുപ്പ് കൃത്യമായും സുരക്ഷിതമായും നടത്താൻ സജ്ജമാണെന്ന് അധികൃതർ അറിയിച്ചു.
അതേസമയം, ചില വോട്ടിങ് രീതികളെ ചോദ്യം ചെയ്യുകയും തിരഞ്ഞെടുപ്പ് നടപടികളിൽ ഫെഡറൽ ഇടപെടൽ വർധിപ്പിക്കാൻ ശ്രമിക്കുകയും ചെയ്യുന്ന പ്രസിഡന്റ് ഡൊണാൾഡ് ട്രംപിന്റെ നീക്കങ്ങളും തുടരുകയാണ്. വിർജീനിയയിലാണ് വെള്ളിയാഴ്ച നേരത്തെയുള്ള വോട്ടെടുപ്പ് ആരംഭിച്ചത്. മിനസോട്ട, സൗത്ത് ഡക്കോട്ട തുടങ്ങിയ സംസ്ഥാനങ്ങളിലും വോട്ടർമാർക്ക് നേരത്തെ നേരിട്ടെത്തി ആബ്സന്റി ബാലറ്റ് രേഖപ്പെടുത്താം. മറ്റ് സംസ്ഥാനങ്ങളിൽ വരും ആഴ്ചകളിൽ നേരത്തെയുള്ള വോട്ടെടുപ്പ് ആരംഭിക്കും.
വിർജീനിയയിലെ ഫെയർഫാക്സിൽ 18കാരിയായ കോളജ് വിദ്യാർഥിനി സന്യ സിംഗാൾ നേരത്തെ വോട്ട് ചെയ്ത ആദ്യ വോട്ടർമാരിൽ ഒരാളായി. കേന്ദ്രം തുറക്കുന്നതിന് ഏറെ മുമ്പുതന്നെ അവർ വരിയിൽ എത്തിയിരുന്നു.ജനാധിപത്യത്തിൽ പങ്കെടുക്കണമെന്ന് എനിക്ക് ഏറെ ആഗ്രഹമുണ്ട്. നേരത്തെ വോട്ട് ചെയ്യുന്നവരിൽ ആദ്യത്തെയാളാകാൻ ശ്രമിക്കാമല്ലോ എന്ന് സന്യ പ്രതികരിച്ചു.
റിച്ച്മണ്ടിലെ വോട്ടിങ് കേന്ദ്രത്തിൽ ആദ്യമായി വോട്ട് ചെയ്യാൻ എത്തിയ സ്റ്റീഫൻ ഗുറ ട്രംപിന്റെ രാഷ്ട്രീയ അജൻഡയ്ക്കെതിരായ നിലപാടാണ് പ്രകടിപ്പിച്ചത്. ഈ തിരഞ്ഞെടുപ്പ് നിർണായകമാണ്. ട്രംപിന്റെ അജൻഡ തടയേണ്ടതുണ്ട് എന്ന് അദ്ദേഹം പറഞ്ഞു. ഡെമോക്രാറ്റിക് സെനറ്റർ മാർക്ക് വാർണർക്കും മറ്റ് ഡെമോക്രാറ്റിക് സ്ഥാനാർഥികൾക്കും വോട്ട് ചെയ്തതായും ഗുറ പറഞ്ഞു.
നവംബർ 3നാണ് തിരഞ്ഞെടുപ്പ്. ഭൂരിഭാഗം സംസ്ഥാനങ്ങളിലും ഗവർണർ, സംസ്ഥാന നിയമസഭാ തിരഞ്ഞെടുപ്പുകളും നടക്കും. യുഎസ് ജനപ്രതിനിധിസഭയിലും സെനറ്റിലും റിപ്പബ്ലിക്കൻ പാർട്ടി നിയന്ത്രണം നിലനിർത്തുമോ എന്നതും തിരഞ്ഞെടുപ്പ് നിർണയിക്കും. ഡെമോക്രാറ്റുകൾ കോൺഗ്രസിന്റെ നിയന്ത്രണം തിരിച്ചുപിടിച്ചാൽ ട്രംപിന്റെ കാലാവധിയിലെ അവസാന രണ്ട് വർഷങ്ങളിൽ രാഷ്ട്രീയ സാഹചര്യം മാറാം. ഭരണകൂടത്തിനെതിരായ അന്വേഷണങ്ങളും മേൽനോട്ട നടപടികളും ശക്തമാകാനും സാധ്യതയുണ്ട്.
റിച്ച്മണ്ടിലെ വോട്ടിങ് കേന്ദ്രത്തിൽ 74കാരനായ വില്യം കറി ട്രംപിന്റെ റിപ്പബ്ലിക്കൻ സ്ഥാനാർഥികൾക്ക് വോട്ട് ചെയ്തു. ട്രംപിന്റെ ഭരണത്തെ പൊതുവെ അംഗീകരിക്കുന്നതായി പറഞ്ഞ അദ്ദേഹം ഇറാനുമായുള്ള യുദ്ധത്തെ എതിർത്തു. അതേസമയം, സൗത്ത് ഡക്കോട്ടയിലെ സിയൂക്സ് ഫാൾസിൽ 67കാരനായ ബിൽ ഗോറിങ് ഡെമോക്രാറ്റുകൾക്കും സ്വതന്ത്ര സ്ഥാനാർഥികൾക്കും വോട്ട് ചെയ്തു. ട്രംപിന്റെ “ഏകാധിപത്യ പ്രവണതകൾ അമേരിക്കയ്ക്ക് ദോഷകരമാണ്” എന്നാണ് അദ്ദേഹത്തിന്റെ അഭിപ്രായം.
ഇന്ധന, ഭക്ഷ്യവില വർധന, ഇറാൻ യുദ്ധം, ആർട്ടിഫിഷ്യൽ ഇന്റലിജൻസിന്റെ സാധ്യതയുള്ള അപകടങ്ങൾ, ട്രംപിന്റെ കുടിയേറ്റ നയം തുടങ്ങിയ വിഷയങ്ങളിൽ അമേരിക്കയിൽ രാഷ്ട്രീയ വിഭജനം ശക്തമായ സാഹചര്യത്തിലാണ് നേരത്തെയുള്ള വോട്ടെടുപ്പ് ആരംഭിച്ചത്. ഇതിനിടെ, ജനപ്രതിനിധിസഭാ മണ്ഡലങ്ങളുടെ അതിരുകൾ പുനർനിർണയിക്കുന്ന നടപടികളും തിരഞ്ഞെടുപ്പിന് മുമ്പ് ചർച്ചയാകുന്നുണ്ട്. ടെക്സസിലെ റിപ്പബ്ലിക്കൻ നിയന്ത്രിത നിയമസഭ മണ്ഡലങ്ങൾ പാർട്ടിക്ക് അനുകൂലമായി പുനർനിർണയിക്കണമെന്ന് ട്രംപ് ആവശ്യപ്പെട്ടതിനെ തുടർന്ന് മറ്റ് സംസ്ഥാനങ്ങളും സമാന നടപടികൾ സ്വീകരിച്ചിരുന്നു.
2024നെ അപേക്ഷിച്ച് ഈ വർഷം ഏകദേശം പത്തിൽ ഒരാൾ താമസിക്കുന്ന കോൺഗ്രഷണൽ മണ്ഡലം മാറിയതായി പഠനങ്ങൾ വ്യക്തമാക്കുന്നു. തിരഞ്ഞെടുപ്പ് നടത്തിപ്പിൽ ഫെഡറൽ സർക്കാരിന് കൂടുതൽ നിയന്ത്രണം നൽകാനുള്ള ശ്രമങ്ങളും ട്രംപ് തുടരുകയാണ്. എന്നാൽ തിരഞ്ഞെടുപ്പ് നടത്താനുള്ള അധികാരം ഭരണഘടന പ്രകാരം പ്രധാനമായും സംസ്ഥാനങ്ങൾക്കാണ്. തപാൽ ബാലറ്റുകൾ നിയന്ത്രിക്കാനുള്ള ട്രംപിന്റെ ശ്രമം ഈ ആഴ്ച യുഎസ് സുപ്രീം കോടതി തള്ളിയിരുന്നു.
അതേസമയം സംസ്ഥാനങ്ങളിലെ വോട്ടർ പട്ടികകൾ പരിശോധിക്കുന്നതടക്കമുള്ള മറ്റ് നീക്കങ്ങൾ ഭരണകൂടം തുടരുകയാണ്. അമേരിക്കൻ തിരഞ്ഞെടുപ്പുകളിൽ പൗരന്മാരല്ലാത്തവർ വ്യാപകമായി വോട്ട് ചെയ്യുന്നുവെന്ന ആരോപണം ട്രംപ് ആവർത്തിക്കുന്നുണ്ടെങ്കിലും ഇത്തരം വോട്ടിങ് വളരെ അപൂർവമാണെന്ന് വിവിധ പഠനങ്ങൾ വ്യക്തമാക്കുന്നു. തിരഞ്ഞെടുപ്പ് ഉദ്യോഗസ്ഥർക്കെതിരായ ട്രംപിന്റെ വിമർശനങ്ങളും തെറ്റായ വിവര പ്രചാരണവും തുടരുമെന്ന് കരുതുന്നതിൽ അത്ഭുതമില്ലെന്ന് സെന്റർ ഫോർ ഇലക്ഷൻ ഇന്നൊവേഷൻ ആൻഡ് റിസർച്ചിന്റെ ഡേവിഡ് ബെക്കർ പറഞ്ഞു. എന്നാൽ മുൻ വർഷങ്ങളിലേതുപോലെ തിരഞ്ഞെടുപ്പ് നടപടികൾ മുന്നോട്ടുപോകുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.
ട്രംപിന്റെ കുടിയേറ്റ നടപടികളെക്കുറിച്ചുള്ള ആശങ്കയും ചിലരെ നേരത്തെ വോട്ട് ചെയ്യാൻ പ്രേരിപ്പിച്ചു. മിനിയാപൊളിസിൽ 47കാരനായ ഡ്രാഗൻ കോലാകോവിച്ച് കുടിയേറ്റ ഉദ്യോഗസ്ഥർ തടഞ്ഞേക്കുമെന്ന ഭയത്താലാണ് തിരഞ്ഞെടുപ്പ് ദിവസം വരെ കാത്തിരിക്കാതെ വോട്ട് ചെയ്തതെന്ന് പറഞ്ഞു. ബോസ്നിയയിൽ നിന്ന് 1997ൽ അമേരിക്കയിലെത്തിയ കോലാകോവിച്ച് മുൻ യുഗോസ്ലാവിയയിലെ യുദ്ധത്തിന്റെ അനുഭവങ്ങൾ പങ്കുവച്ചു. മിനസോട്ടയിൽ കുടിയേറ്റ വിരുദ്ധ നടപടികളുടെ ഭാഗമായി ആയുധധാരികളായ ഉദ്യോഗസ്ഥർ തന്റെ പ്രദേശത്ത് പരിശോധന നടത്തിയ സംഭവം ബോസ്നിയയിലെ അനുഭവങ്ങൾ ഓർമിപ്പിച്ചതായും അദ്ദേഹം പറഞ്ഞു.
വിർജീനിയയിലെ ഹെൻറിക്കോ കൗണ്ടിയിൽ 63കാരിയായ ലോറ ബ്ലാൻഡും നേരത്തെ വോട്ട് ചെയ്തു. തപാൽ വോട്ടിങ് നിയന്ത്രിക്കാനുള്ള ട്രംപിന്റെ നീക്കങ്ങൾക്കിടയിലും “ഞങ്ങൾ ഇപ്പോഴും ഇവിടെയുണ്ടെന്ന സന്ദേശം” നൽകാനാണ് നേരത്തെ വോട്ട് ചെയ്തതെന്ന് അവർ പറഞ്ഞു. തപാൽ വോട്ടുകൾ അവസാന തീയതിക്ക് മുമ്പ് തന്നെ അയക്കണമെന്ന് വോട്ടവകാശ പ്രവർത്തകരും യുഎസ് പോസ്റ്റൽ സർവീസും ആവശ്യപ്പെട്ടിട്ടുണ്ട്. നേരത്തെ വോട്ട് ചെയ്യുന്നത് തിരഞ്ഞെടുപ്പ് ദിവസം തിരക്ക് കുറയ്ക്കാനും ഫലങ്ങൾ വേഗത്തിൽ ലഭിക്കാനും സഹായിക്കുമെന്ന് വോട്ടവകാശ സംഘടനയായ ഓൾ വോട്ടിങ് ഈസ് ലോക്കലിന്റെ ഹന്ന ഫ്രൈഡ് പറഞ്ഞു.
Early voting begins in US midterm elections that could flip control of Congress
