വാഷിംഗ്ടൺ: ഈ വർഷം ഇറാന് നേരെ സൈനിക നീക്കം ആരംഭിക്കുന്നതിന് മുൻപ് തന്നെ ആഗോള ഇന്ധന വിതരണത്തിലുണ്ടാകുന്ന പ്രത്യാഘാതങ്ങളെക്കുറിച്ച് പ്രസിഡന്‍റ് ഡോണൾഡ് ട്രംപിന് വ്യക്തമായ ബോധ്യമുണ്ടായിരുന്നുവെന്ന് യുഎസ് ഊർജ്ജ സെക്രട്ടറി ക്രിസ് റൈറ്റ്. ഹ്രസ്വകാലത്തേക്ക് ഇന്ധനവില വർധിക്കുമെന്നും രാഷ്ട്രീയമായി തിരിച്ചടിയുണ്ടാകുമെന്നും ട്രംപിന് അറിയാമായിരുന്നുവെങ്കിലും, ലോകത്തിന് ആണവായുധ ശേഷിയുള്ള ഇറാനെ അംഗീകരിക്കാൻ കഴിയില്ലെന്നതിനാലാണ് ശരിയായ ഈ തീരുമാനത്തിലേക്ക് അദ്ദേഹം എത്തിയതെന്നും റൈറ്റ് വ്യക്തമാക്കി. സിബിഎസിന്റെ “ഫേസ് ദി നേഷൻ” പരിപാടിയിൽ സംസാരിക്കുകയായിരുന്നു അദ്ദേഹം.
സമീപ മാസങ്ങളിലായി പെട്രോൾ, ഡീസൽ വിലക്കയറ്റം മൂലം കടുത്ത സാമ്പത്തിക പ്രതിസന്ധിയിലാണ് അമേരിക്കൻ ജനത. എന്നാൽ ലോകത്തെ ഏറ്റവും വലിയ ഭീകര ഭരണകൂടമായ ഇറാന്റെ കൈകളിൽ ആണവായുധം എത്തിയാൽ അത് ഇന്ധന വിപണിക്ക് വരുത്തുന്ന ദീർഘകാല പ്രത്യാഘാതം ഇതിലും വലുതായിരിക്കുമെന്നാണ് ട്രംപ് ഭരണകൂടത്തിന്റെ വാദം. വരാനിരിക്കുന്ന ഇടക്കാല തെരഞ്ഞെടുപ്പിന് മുന്നോടിയായി നാലാഴ്ചയ്ക്കുള്ളിൽ ഇന്ധനവില താഴേക്ക് വരുമെന്ന് ഊർജ്ജ സെക്രട്ടറി ഉറപ്പിച്ചു പറഞ്ഞു. ഹോർമുസ് കടലിടുക്കിലൂടെയുള്ള വിതരണം വർധിച്ചതും അമേരിക്കൻ ആഭ്യന്തര പെട്രോൾ ഉത്പാദനം കൂടിയതും വേനൽക്കാല ഡ്രൈവിംഗ് സീസൺ അവസാനിച്ചതും വില കുറയാൻ ഇടയാക്കുമെന്ന് അദ്ദേഹം ചൂണ്ടിക്കാട്ടി.
കഴിഞ്ഞ ആഴ്ചകളിൽ ഡീസൽ വില ഗാലന് 6.50 ഡോളറിന് മുകളിലേക്ക് ഉയർന്നത് കാർഷിക മേഖലയെയും നിർമ്മാണ-വിതരണ മേഖലകളെയും സാരമായി ബാധിച്ചിരുന്നു. എന്നാൽ അടുത്ത ദിവസങ്ങളിലായി ഡീസൽ വിലയിൽ 20 സെന്റിലധികം കുറവുണ്ടായിട്ടുണ്ടെന്നും ഉടൻ തന്നെ വില 6 ഡോളറിന് താഴെയെത്തുമെന്നും റൈറ്റ് പ്രത്യാശ പ്രകടിപ്പിച്ചു. രാജ്യത്ത് ഇന്ധന ഉത്പാദന ശേഷി വെട്ടിച്ചുരുക്കിയ മുൻകാല നയങ്ങൾ തിരുത്തി, ഉത്പാദനവും വിതരണവും വർദ്ധിപ്പിക്കാനുള്ള നടപടികളാണ് സർക്കാർ സ്വീകരിച്ചുവരുന്നതെന്നും അദ്ദേഹം പറഞ്ഞു.
ഇടക്കാല തെരഞ്ഞെടുപ്പിന് ശേഷം സൈനിക നടപടികൾ കൂടുതൽ ശക്തമാക്കുമോ എന്ന ചോദ്യത്തിന്, പ്രതിസന്ധികളെ നേരിടാൻ എല്ലാ സാധ്യതകളും ഒരുക്കുന്ന ആളാണ് ട്രംപെന്നും നയതന്ത്ര-സൈനിക വഴികൾ ഒരുപോലെ തുറന്നുകിടക്കുകയാണെന്നും അദ്ദേഹം മറുപടി നൽകി. വരും മാസങ്ങളിൽ ഡീസൽ വില നിയന്ത്രിക്കാനായി അടുത്ത നാല് മാസത്തിനുള്ളിൽ 100 ദശലക്ഷം ബാരൽ ഇന്ധനം കരുതൽ ശേഖരത്തിൽ നിന്ന് വിപണിയിലെത്തിക്കാൻ ജി 7 (G7) രാജ്യങ്ങളുമായി ഉണ്ടാക്കിയ ധാരണ നിർണായകമാണെന്നും റൈറ്റ് കൂട്ടിച്ചേർത്തു. റഷ്യൻ ഡീസൽ കയറ്റുമതി നിലയ്ക്കുകയും ചൈനയുടെ വിതരണം കുറയുകയും ഗൾഫിൽ നിന്നുള്ള നീക്കം തടസ്സപ്പെടുകയും ചെയ്ത സാഹചര്യത്തിൽ യൂറോപ്യൻ രാജ്യങ്ങൾ തങ്ങളുടെ കരുതൽ ശേഖരം വിപണിയിലെത്തിക്കുന്നത് ആഗോളതലത്തിൽ വില കുറയാൻ സഹായിക്കുമെന്നും അദ്ദേഹം വ്യക്തമാക്കി.
