ടെഹ്‌റാൻ: ജനുവരിയിൽ രാജ്യത്ത് അരങ്ങേറിയ സർക്കാർ വിരുദ്ധ പ്രക്ഷോഭങ്ങൾക്കിടെ നാല് പൊലീസ് ഉദ്യോഗസ്ഥർ കൊല്ലപ്പെട്ട സംഭവത്തിൽ പങ്കാളികളായ രണ്ട് യുവാക്കളുടെ വധശിക്ഷ നടപ്പാക്കിയതായി ഇറാന്‍റെ ജുഡീഷ്യറി അറിയിച്ചു. സാമ്പത്തിക പ്രതിസന്ധിയെത്തുടർന്ന് ഡിസംബറിൽ തലസ്ഥാനമായ ടെഹ്‌റാനിൽ ആരംഭിച്ച് രാജ്യവ്യാപകമായി പടർന്ന പ്രതിഷേധങ്ങൾക്കിടെ, മധ്യ നഗരമായ ഇസ്ഫഹാനിൽ വെച്ച് ഉദ്യോഗസ്ഥരെ കൊലപ്പെടുത്തിയെന്നാണ് ഇവർക്കെതിരെയുള്ള കുറ്റം.
സുപ്രീം കോടതി വധശിക്ഷ ശരിവെച്ചതിനെത്തുടർന്ന് അലിറെസ സെപാഹി, അലിറെസ റെയ്സി എന്നിവരെ തിങ്കളാഴ്ച രാവിലെ തൂക്കിലേറ്റിയതായി ജുഡീഷ്യറിയുടെ ഔദ്യോഗിക വെബ്സൈറ്റായ മിസാൻ ഓൺലൈൻ വ്യക്തമാക്കി. എന്നാൽ ഇവരെ അറസ്റ്റ് ചെയ്ത തീയതികളോ വിചാരണ സംബന്ധിച്ച കൂടുതൽ വിശദാംശങ്ങളോ അധികൃതർ പുറത്തുവിട്ടിട്ടില്ല. സായുധ സംഘത്തിൽ അംഗമായതിനും ദേശീയ സുരക്ഷ തകർക്കാൻ ശ്രമിച്ചതിനുമാണ് കോടതി ഇവർക്ക് വധശിക്ഷ വിധിച്ചതെന്ന് മിസാൻ അറിയിച്ചു. ഇവരുടെ പ്രായം എത്രയെന്ന് വാർത്താക്കുറിപ്പിൽ വ്യക്തമാക്കിയിട്ടില്ല.
ഫെബ്രുവരി അവസാനത്തോടെ യു.എസും ഇസ്രായേലും സംയുക്തമായി നടത്തിയ ആക്രമണങ്ങളെത്തുടർന്ന് ഇറാനിൽ യുദ്ധസമാനമായ സാഹചര്യങ്ങൾ നിലനിൽക്കുന്നതിനിടെ, രാജ്യത്ത് വധശിക്ഷ നടപ്പാക്കുന്ന സംഭവങ്ങളിൽ വലിയ വർധനവാണ് ഉണ്ടായിരിക്കുന്നത്. അംനസ്റ്റി ഇന്റർനാഷണലിന്റെ കണക്കുകൾ പ്രകാരം 2025-ൽ മാത്രം ഇറാനിൽ വധശിക്ഷകളുടെ എണ്ണം ഇരട്ടിയിലധികമായി ഉയർന്നിരുന്നു. കഴിഞ്ഞ ശനിയാഴ്ചയും സമാനമായ രീതിയിൽ പ്രക്ഷോഭങ്ങൾക്കിടെ പൊലീസ് ഉദ്യോഗസ്ഥർക്ക് നേരെ അത്യാധുനിക സൈനിക ആയുധങ്ങൾ ഉപയോഗിച്ച് വെടിയുതിർത്തതടക്കം നിരവധി കുറ്റങ്ങൾക്ക് ശിക്ഷിക്കപ്പെട്ട മറ്റൊരാളുടെ വധശിക്ഷയും ഇറാൻ നടപ്പാക്കിയിരുന്നു.
