ബെയ്ജിങ്: ലോകത്തെ മുൻനിര ആർട്ടിഫിഷ്യൽ ഇൻ്റലിജൻസ് കമ്പനികളായ ഓപ്പൺ എഐ, ആന്തോപിക് എന്നിവയുടെ സാങ്കേതികവിദ്യകൾ ചോർത്തി ചൈനീസ് സൈന്യം സ്വന്തം പ്രതിരോധ സംവിധാനങ്ങൾ ശക്തമാക്കുന്നതായി അന്താരാഷ്ട്ര വാർത്താ ഏജൻസിയായ റോയിട്ടേഴ്സിൻ്റെ കണ്ടെത്തൽ. ചൈനീസ് സൈനിക ഗവേഷണ സ്ഥാപനങ്ങളുമായി ബന്ധപ്പെട്ട എൺപതിലധികം അക്കാദമിക് പേപ്പറുകളും പേറ്റൻ്റുകളും പരിശോധിച്ച ശേഷമാണ് ഈ ഞെട്ടിക്കുന്ന വിവരങ്ങൾ പുറത്തുവിട്ടിരിക്കുന്നത്.
ഉയർന്ന ശേഷിയുള്ള കമ്പ്യൂട്ടർ ചിപ്പുകളും ആധുനിക സാങ്കേതികവിദ്യകളും ചൈനയ്ക്ക് ലഭിക്കുന്നത് തടയാൻ അമേരിക്ക ശക്തമായ നിയന്ത്രണങ്ങൾ ഏർപ്പെടുത്തിയിരിക്കുന്ന സാഹചര്യത്തിലാണ്, യു.എസ് മോഡലുകളെ തന്നെ ചൈന മറയാക്കുന്നത്.
എന്താണ് ‘മോഡൽ ഡിസ്റ്റിലേഷൻ’?
വൻകിട യു.എസ് എഐ മോഡലുകളിൽ നിന്നുള്ള വിവരങ്ങളും അവയുടെ ചിന്താശേഷിയും ചോർത്തിയെടുത്ത്, വലിപ്പം കുറഞ്ഞതും എന്നാൽ പ്രത്യേക കാര്യങ്ങൾ ചെയ്യാൻ ശേഷിയുള്ളതുമായ ചെറു എഐ സിസ്റ്റങ്ങളെ പരിശീലിപ്പിക്കുന്ന രീതിയാണിത്. ‘മോഡൽ ഡിസ്റ്റിലേഷൻ’ എന്ന സാങ്കേതികവിദ്യയാണ് ചൈന ഇതിനായി വ്യാപകമായി ഉപയോഗിക്കുന്നത്. വൻ കമ്പ്യൂട്ടിംഗ് ശേഷിയുള്ള സൂപ്പർ കമ്പ്യൂട്ടറുകളുടെ സഹായമില്ലാതെ തന്നെ ചൈനീസ് സൈന്യത്തിന് പ്രാദേശികമായി ഇവ പ്രവർത്തിപ്പിക്കാൻ സാധിക്കും.
രേഖകൾ വ്യക്തമാക്കുന്നതനുസരിച്ച്, അതീവ രഹസ്യ സ്വഭാവമുള്ള സൈനിക ആവശ്യങ്ങൾക്കായാണ് ചൈനീസ് പീപ്പിൾസ് ലിബറേഷൻ ആർമി (PLA) ഈ യു.എസ് സാങ്കേതികവിദ്യകൾ ഉപയോഗിക്കുന്നത്. OpenAI-യുടെ GPT-3.5 മോഡൽ ഉപയോഗിച്ച് സൈനിക സോഫ്റ്റ്വെയർ കോഡുകൾ വിശകലനം ചെയ്യുകയും, അതിലൂടെ ചൈനീസ് സൈനിക നെറ്റ്വർക്കിൽ മാത്രം സുരക്ഷിതമായി പ്രവർത്തിക്കാൻ ശേഷിയുള്ള ഒരു പ്രാദേശിക സിസ്റ്റം അവർ വികസിപ്പിച്ചെടുക്കുകയും ചെയ്തു. കൂടാതെ, Anthropic കമ്പനിയുടെ ‘Claude 3 Haiku’ മോഡൽ വഴി സോഷ്യൽ മീഡിയ നിരീക്ഷണത്തിനുള്ള ഡാറ്റ രൂപപ്പെടുത്താനും അവർക്ക് കഴിഞ്ഞിട്ടുണ്ട്. മറ്റ് യു.എസ് AI മോഡലുകളുടെ സഹായത്തോടെ തത്സമയം ലക്ഷ്യങ്ങൾ തിരിച്ചറിയാനുള്ള ശേഷി ഡ്രോണുകളിൽ ചൈന സജ്ജമാക്കി കഴിഞ്ഞു; ഇന്റർനെറ്റ് ബന്ധം പൂർണ്ണമായി വിച്ഛേദിക്കപ്പെട്ടാൽ പോലും ഡ്രോണുകൾക്കും ആളില്ലാ അന്തർവാഹിനികൾക്കും യുദ്ധരംഗത്ത് സ്വയം തീരുമാനങ്ങളെടുക്കാൻ ഈ ചെറു AI മോഡലുകൾ കരുത്തുപകരുന്നു.
അമേരിക്ക-ചൈന തർക്കം മുറുകുന്നു
അനുമതിയില്ലാത്ത ഇത്തരം സാങ്കേതികവിദ്യ ചോർത്തലുകൾ ബൗദ്ധിക സ്വത്തവകാശ ലംഘനമാണെന്ന് അമേരിക്കൻ അധികൃതർ ആരോപിക്കുന്നു. വരാനിരിക്കുന്ന യു.എസ്-ചൈന എഐ ചർച്ചകളിൽ ഇത് പ്രധാന തർക്കവിഷയമാകും. എന്നാൽ ഈ ആരോപണങ്ങൾ നിഷേധിച്ച ചൈന, അമേരിക്ക എഐ രംഗത്ത് ‘ആധിപത്യം’ സ്ഥാപിക്കാൻ ശ്രമിക്കുകയാണെന്ന് കുറ്റപ്പെടുത്തി. തങ്ങളുടെ മുന്നേറ്റങ്ങൾ സ്വന്തം ഗവേഷണം വഴിയാണെന്നാണ് ചൈനീസ് സ്റ്റാർട്ടപ്പുകളുടെ വാദം.
സ്വന്തം എഐ മോഡലുകൾ ഇത്തരത്തിൽ ദുരുപയോഗം ചെയ്യപ്പെടുന്നത് വലിയ സുരക്ഷാ ഭീഷണിയാണെന്നും, ഇതിലൂടെ തങ്ങളുടെ സുരക്ഷാ മാനദണ്ഡങ്ങൾ നഷ്ടപ്പെടാൻ സാധ്യതയുണ്ടെന്നും കമ്പനികൾ ആശങ്ക പ്രകടിപ്പിച്ചു.
Fighting the enemy with the enemy’s weapon; Chinese military’s secret move by stealing American AI
