കാഠ്മണ്ഡു: നേപ്പാൾ-ടിബറ്റ് അതിർത്തിയിലുണ്ടായ കനത്ത മിന്നൽ പ്രളയത്തിലും ഉരുൾപൊട്ടലിലും മരിച്ചവരുടെ എണ്ണം 389 ആയി ഉയർന്നു. ദുരന്ത മേഖലകളിൽ നിന്ന് ഇന്ത്യക്കാർ ഉൾപ്പെടെ 1,468 പേരെ കാണാതായതായി ഔദ്യോഗിക വൃത്തങ്ങൾ അറിയിച്ചു. കൈലാസ് മാനസരോവർ തീർത്ഥാടകരും വിനോദസഞ്ചാരികളും അടക്കം 290 ഇന്ത്യൻ പൗരന്മാരെക്കുറിച്ച് നിലവിൽ വിവരമൊന്നുമില്ലെന്ന് ഇന്ത്യൻ വിദേശകാര്യ മന്ത്രാലയം (MEA) സ്ഥിരീകരിച്ചു.
റോഡുകളും പാലങ്ങളും തകർന്നതിനെത്തുടർന്ന് ഒറ്റപ്പെട്ടുപോയ ദുരന്തബാധിത പ്രദേശങ്ങളിൽ ഹെലികോപ്റ്ററുകൾ ഉപയോഗിച്ചാണ് നിലവിൽ രക്ഷാപ്രവർത്തനം പുരോഗമിക്കുന്നത്. തൃശൂലി ജലവൈദ്യുത പദ്ധതി പ്രദേശത്ത് കുടുങ്ങിയ 63 തൊഴിലാളികളും തമിഴ്നാട്ടിൽ നിന്നുള്ള 21 തീർത്ഥാടകരും അടക്കം 84 ഇന്ത്യക്കാരെ ഇതിനകം സുരക്ഷിതമായി രക്ഷപ്പെടുത്തി. ചൈന അതിർത്തിയിലെ ടിബറ്റ് ഭാഗത്ത് ഇനിയും ഇരുന്നൂറോളം ഇന്ത്യക്കാർ കുടുങ്ങിക്കിടക്കുന്നതായാണ് റിപ്പോർട്ട്.
അതിനിടെ ഭോട്ടെകോശി, തൃശൂലി നദികളുടെ മുകൾഭാഗത്ത് മലയിടിച്ചിലിനെത്തുടർന്ന് താല്കാലിക തടാകം രൂപപ്പെട്ടതായി സാറ്റലൈറ്റ് ചിത്രങ്ങളിൽ കണ്ടെത്തിയിട്ടുണ്ട്. ഈ തടാകം ഏതുനിമിഷവും പൊട്ടി കൂടുതൽ പ്രളയമുണ്ടാകാൻ സാധ്യതയുള്ളതിനാൽ നദീതീരങ്ങളിൽ ഉള്ളവർക്ക് നേപ്പാൾ സർക്കാർ അതീവ ജാഗ്രതാ നിർദ്ദേശം നൽകി. നേപ്പാളിൽ നിന്നുള്ള നദികൾ ഒഴുകിയെത്തുന്ന ബിഹാർ, ഉത്തർപ്രദേശ് എന്നീ ഇന്ത്യൻ അതിർത്തി സംസ്ഥാനങ്ങളിലും മുൻകരുതൽ നടപടികൾ ശക്തമാക്കി.
ദുരന്തബാധിതർക്കായി 37.5 ടൺ മരുന്നുകളും ഭക്ഷണസാധനങ്ങളും അടങ്ങുന്ന ആദ്യഘട്ട മാനുഷിക സഹായം ഇന്ത്യ നേപ്പാളിന് കൈമാറി. മൂന്നാം ഘട്ട ദുരിതാശ്വാസ സാമഗ്രികളുമായി അടുത്ത വിമാനം ഇന്ന് പുറപ്പെടും. കാണാതായവരെ കണ്ടെത്താനും കുടുങ്ങിക്കിടക്കുന്നവരെ നാട്ടിലെത്തിക്കാനും കാഠ്മണ്ഡുവിലെ ഇന്ത്യൻ എംബസി 24 മണിക്കൂറും പ്രവർത്തിക്കുന്ന പ്രത്യേക ഹെൽപ്പ്ലൈൻ നമ്പറുകൾ (+977 9851316807, +977 9709107500, +977 9810326117) തുറന്നിട്ടുണ്ട്.
Floods in Nepal: Death toll rises to 389, 1468 missing; 290 Indians missing
