നേപ്പാളിലും ടിബറ്റൻ അതിർത്തി മേഖലയിലും ഉണ്ടായ വിനാശകരമായ മിന്നൽ പ്രളയത്തിൽ മരണസംഖ്യ 359 ആയി ഉയർന്നു. 1,300-ലധികം ആളുകളെ ഇപ്പോഴും കാണാതായിട്ടുണ്ടെന്നാണ് വ്യാഴാഴ്ച പുറത്തുവന്ന വിവരങ്ങൾ വ്യക്തമാക്കുന്നത്. പ്രളയം കനത്ത നാശം വിതച്ച നേപ്പാളിൽ മാത്രം 358 മൃതദേഹങ്ങൾ ഇതുവരെ വീണ്ടെടുത്തു. നേപ്പാളിലെ രസുവ ജില്ലയിൽ തൃശൂലി നദിയുടെ തീരത്തുള്ള പ്രദേശങ്ങളെയാണ് പ്രളയം രൂക്ഷമായി ബാധിച്ചത്. ചൈനയിലെ ടിബറ്റ് മേഖലയിൽ 3 പേർ മരണപ്പെടുകയും 558 പേരെ കാണാതാവുകയും ചെയ്തതായി സിൻഹുവ വാർത്താ ഏജൻസി റിപ്പോർട്ട് ചെയ്തു.
ദുരന്തത്തിൽപ്പെട്ട ഇന്ത്യക്കാരെ കണ്ടെത്താനും രക്ഷപ്പെടുത്താനുമുള്ള ശ്രമങ്ങൾ വിദേശകാര്യ മന്ത്രാലയം തുടരുകയാണ്. നേപ്പാളിൽ കാണാതായ 54 ഇന്ത്യക്കാരെ ഇതിനോടകം രക്ഷപ്പെടുത്തിയതായി മന്ത്രാലയം അറിയിച്ചു. തൃശൂലി ജലവൈദ്യുത പദ്ധതി പ്രദേശത്ത് ജോലി ചെയ്തിരുന്ന 73 പേരിൽ 63 ഇന്ത്യക്കാരെ സുരക്ഷിതമായി കണ്ടെത്തിയിട്ടുണ്ട്. കൂടാതെ തമിഴ്നാട്ടിൽ നിന്നുള്ള 21 പേരെയും നേരത്തെ രക്ഷപ്പെടുത്തി. നിലവിൽ 285 മുതൽ 290 വരെ ഇന്ത്യക്കാരുമായി ബന്ധപ്പെടാൻ സാധിച്ചിട്ടില്ലെന്നാണ് ഔദ്യോഗിക കണക്കുകൾ സൂചിപ്പിക്കുന്നത്.
കാണാതായ വിദേശികളിൽ 63 അമേരിക്കൻ പൗരന്മാരും ഉൾപ്പെടുന്നുണ്ടെന്ന് നേപ്പാൾ ടൂറിസം ബോർഡ് അറിയിച്ചു. പ്രളയബാധിത പ്രദേശങ്ങളിൽ നേപ്പാൾ സൈന്യത്തിന്റെ നേതൃത്വത്തിൽ രാപ്പകലില്ലാതെ രക്ഷാപ്രവർത്തനം തുടരുകയാണ്. ദുരന്തത്തിൽ ജീവൻ പൊലിഞ്ഞവരുടെ കുടുംബങ്ങൾക്ക് നേപ്പാൾ പ്രധാനമന്ത്രിയുടെ ഓഫീസും അമേരിക്കൻ വിദേശകാര്യ മന്ത്രാലയവും അനുശോചനം രേഖപ്പെടുത്തി.
Nepal Floods: Death Toll Rises to 359; Search and Rescue Operations Continue
