ബ്രാംപ്ടൺ: കാനഡയിലെ ബ്രാംപ്ടണിൽ സായാഹ്ന നടത്തത്തിനിടെ 78കാരിയായ ഇന്ത്യൻ വംശജയുടെ സ്വർണാഭരണങ്ങൾ കവർന്നു. ഏകദേശം 20,000 കനേഡിയൻ ഡോളർ വിലമതിക്കുന്ന ആഭരണങ്ങളാണ് നഷ്ടമായത്. അജ്ഞാതയായ സ്ത്രീ കാൽതൊട്ട് കെട്ടിപ്പിടിക്കുന്നതിനിടെയാണ് മോഷണം നടത്തിയത്.
ഇംഗ്ലീഷ് സംസാരിക്കാൻ അറിയാത്ത അമ്മ അജ്ഞാത സ്ത്രീയെ പരിചയമുള്ളയാളാണെന്നാണ് കരുതിയതെന്ന് മകൻ രാഘവേന്ദ്ര കുമാർ പൊലീസിനോട് പറഞ്ഞു. സ്ത്രീ ആദ്യം വയോധികയുടെ കാൽതൊട്ട ശേഷം കെട്ടിപ്പിടിച്ചു. ഇതിനിടെ യഥാർഥ സ്വർണമാല അഴിച്ചെടുത്ത് പകരം വ്യാജ ആഭരണം കഴുത്തിലണിയിച്ചു. തുടർന്ന് സ്വർണവളകളും കവർന്ന് എസ്യുവിയിൽ രക്ഷപ്പെട്ടു.
ജൂലൈ 28നാണ് സംഭവം നടന്നത്. സമാനമായ രീതിയിൽ നടന്ന മറ്റൊരു ആഭരണ മോഷണത്തിന്റെ ദൃശ്യങ്ങൾ ടൊറന്റോ പൊലീസ് പുറത്തുവിട്ടതോടെയാണ് രാഘവേന്ദ്ര സംഭവം പുറത്തുപറഞ്ഞത്. അമ്മയെ ലക്ഷ്യമിട്ട അതേ സംഘമാകാം മറ്റൊരു മോഷണത്തിനും പിന്നിലെന്നാണ് സംശയം.
സമാന രീതിയിൽ നടന്ന രണ്ട് ആഭരണ മോഷണങ്ങളെക്കുറിച്ച് വിവരം ലഭിച്ചിട്ടുണ്ടെന്ന് പീൽ പൊലീസ് അറിയിച്ചു. എന്നാൽ രണ്ട് സംഭവങ്ങളും തമ്മിൽ ബന്ധമുണ്ടെന്ന് സ്ഥിരീകരിക്കാൻ ഇതുവരെ കഴിഞ്ഞിട്ടില്ല.
സംഭവം നടന്നത് മോഷ്ടാക്കൾ പോയതിന് ശേഷമാണ് അമ്മ തിരിച്ചറിഞ്ഞതെന്ന് രാഘവേന്ദ്ര പറഞ്ഞു. വീട്ടിലെത്തിയ ശേഷം അമ്മ വിറയ്ക്കുകയും ഏകദേശം 30 മിനിറ്റോളം സംസാരിക്കാനോ നടക്കാനോ കഴിയാത്ത അവസ്ഥയിലായിരുന്നുവെന്നും അദ്ദേഹം പറഞ്ഞു. മോഷണം പോയ ആഭരണങ്ങളേക്കാൾ അമ്മയുടെ ആരോഗ്യത്തെക്കുറിച്ചായിരുന്നു തന്റെ ആശങ്കയെന്നും അദ്ദേഹം വ്യക്തമാക്കി.
1971ൽ വിവാഹിതരായപ്പോൾ പിതാവ് അമ്മയ്ക്ക് നൽകിയ ആഭരണങ്ങളായിരുന്നു മോഷണം പോയത്. 2008ഓടെ മരിച്ച പിതാവ് സ്വർണപ്പണിക്കാരനായിരുന്നെന്നും ആഭരണങ്ങളിൽ ചിലത് അദ്ദേഹം സ്വയം നിർമിച്ചതാണെന്നും രാഘവേന്ദ്ര പറഞ്ഞു.
ഏകദേശം 110 ഗ്രാം ആഭരണങ്ങളാണ് മോഷണം പോയത്. ഇവയുടെ അസംസ്കൃത ലോഹമൂല്യം ഏകദേശം 20,000 കനേഡിയൻ ഡോളറാണെന്നാണ് കണക്ക്. സംഭവത്തിന് ശേഷം സായാഹ്ന നടത്തത്തിനിറങ്ങുന്നത് അമ്മ പൂർണമായും നിർത്തിയെന്നും രാഘവേന്ദ്ര പറഞ്ഞു.
Gold chain snatched from elderly woman of Indian origin in Canada; gold worth ₹20,000 lost.
