പി.എസ്.സി ചെയർമാനെയും മുഴുവൻ അംഗങ്ങളെയും പിരിച്ചുവിടാനുള്ള മുൻ ഗവർണ്ണർ രാജേന്ദ്ര വിശ്വനാഥ് ആർലേക്കറുടെ ശുപാർശ സംസ്ഥാന രാഷ്ട്രീയത്തിൽ വൻ കൊടുങ്കാറ്റ് അഴിച്ചുവിട്ടിരിക്കുകയാണ്. ഗവർണ്ണറുടെ നീക്കം ജനാധിപത്യത്തിന് മേലുള്ള കടന്നുകയറ്റമാണെന്ന് പ്രതിപക്ഷ നേതാവ് സഭയിൽ കുറ്റപ്പെടുത്തി. മുൻകൂട്ടി അറിയിക്കാതെയുള്ള ഗവർണ്ണറുടെ കടുംവെട്ട് നടപടിയിൽ സർക്കാറും നീരസം വ്യക്തമാക്കിയിട്ടുണ്ട്. ഭരണഘടനാപരമായ പദവി ദുരുപയോഗം ചെയ്തുവെന്ന് ആരോപിച്ചു മന്ത്രി ഒ.ജെ. ജനീഷ് അടക്കമുള്ളവർ ഗവർണ്ണർക്കെതിരെ രൂക്ഷമായ വിമർശനവുമായി രംഗത്തെത്തി.
സംസ്ഥാനത്തിന്റെ അധികാരത്തിന് മേലുള്ള കടന്നുകയറ്റമെന്ന് ചൂണ്ടിക്കാട്ടി പ്രതിപക്ഷ നേതാവ് പിണറായി വിജയൻ നിയമസഭയിൽ അടിയന്തര സബ്മിഷന് ശ്രമിച്ചെങ്കിലും, ഗവർണ്ണർക്കെതിരായ വിഷയമായതിനാൽ സ്പീക്കർ അനുമതി നിഷേധിച്ചു. എന്നാൽ അനുമതി നിഷേധിച്ചിട്ടും പിണറായി വിഷയത്തിൽ ശക്തമായ വിമർശനം തുടർന്നു. പ്രതിപക്ഷം മുൻപ് പി.എസ്.സി ക്രമക്കേടിൽ കടുത്ത നിലപാട് സ്വീകരിച്ചിരുന്നെങ്കിലും, ഗവർണ്ണറുടെ ഈ അപ്രതീക്ഷിത ഇടപെടലിൽ എതിർപ്പ് വ്യക്തമാക്കിയിട്ടുണ്ട്. അതേസമയം, പി.എസ്.സിയിലെ ക്രമക്കേടുകളിൽ സർക്കാർ നടപടിയെടുക്കാൻ മടിച്ചുനിന്നതാണ് ഇത്തരം ഒരു നീക്കത്തിലേക്ക് ഗവർണ്ണറെ പ്രേരിപ്പിച്ചതെന്ന് ബി.ജെ.പി നേതാവ് രാജീവ് ചന്ദ്രശേഖർ പ്രതികരിച്ചു.
ഗവർണ്ണറുടെ നടപടിയോടെ പി.എസ്.സി കടുത്ത അനിശ്ചിതത്വത്തിലും പ്രതിസന്ധിയിലുമാണ്. പ്രതിവാര യോഗം ചേർന്ന് സ്ഥിതിഗതികൾ വിലയിരുത്തിയ പി.എസ്.സി ഭരണസമിതി, വിഷയത്തിൽ കാത്തിരുന്ന് കാണാമെന്ന നിലപാടിലാണ് എത്തിച്ചേർന്നത്. നിയമനാധികാരി തങ്ങളിൽ അവിശ്വാസം പ്രകടിപ്പിച്ച സാഹചര്യത്തിൽ ഇനി എങ്ങനെ പദവിയിൽ തുടരുമെന്ന ചോദ്യവും ഉയരുന്നുണ്ട്. രാഷ്ട്രപതി ഈ ശുപാർശ സുപ്രീം കോടതിയുടെ പരിഗണനയ്ക്ക് വിട്ടാൽ, പുതിയ ഗവർണ്ണർ എത്തുന്നതോടെ പി.എസ്.സി ചെയർമാനെയും അംഗങ്ങളെയും സസ്പെൻഡ് ചെയ്യുന്നതിലേക്കാവും കാര്യങ്ങൾ നീങ്ങുക.
Governor’s Recommendation to Dismiss PSC Members: Opposition Terms it an Attack on Democracy; Massive Ruckus in Assembly
