വാഷിംഗ്ടൺ: അമേരിക്കയിൽ വർദ്ധിച്ചുവരുന്ന ഇന്ത്യ വിരുദ്ധ, കുടിയേറ്റ വിരുദ്ധ വിദ്വേഷ പ്രചാരണങ്ങൾക്കെതിരെ ശക്തമായി പോരാടുമെന്ന് ഇന്ത്യൻ വംശജരായ യുഎസ് കോൺഗ്രസ് അംഗങ്ങൾ. ഡെമോക്രാറ്റിക് പാർട്ടി പ്രതിനിധികളായ ശ്രീ താനേദർ, രാജാ കൃഷ്ണമൂർത്തി എന്നിവരാണ് ഇന്ത്യൻ-അമേരിക്കൻ സമൂഹത്തോട് തദ്ദേശീയം മുതൽ ദേശീയ തലം വരെയുള്ള തിരഞ്ഞെടുപ്പുകളിൽ സജീവമായി മത്സരിച്ച് രാഷ്ട്രീയത്തിൻ്റെ ഭാഗമാകാൻ ആഹ്വാനം ചെയ്തത്.
വാഷിംഗ്ടണിൽ ഇന്ത്യൻ അമേരിക്കൻ കമ്മറ്റി സംഘടിപ്പിച്ച യുഎസ് സ്വാതന്ത്ര്യത്തിൻ്റെ 250-ാം വാർഷിക ആഘോഷ പരിപാടിയിൽ സംസാരിക്കുകയായിരുന്നു ഇരു നേതാക്കളും.
അമേരിക്ക എക്കാലത്തും കുടിയേറ്റക്കാരുടെ രാജ്യമാണെന്ന് മിഷിഗണിൽ നിന്നുള്ള ജനപ്രതിനിധിയായ ശ്രീ താനേദർ ഓർമ്മിപ്പിച്ചു. കുടിയേറ്റക്കാർക്കെതിരെയുള്ള വിദ്വേഷം രാജ്യം വെച്ചുപൊറുപ്പിക്കരുത്. പ്രവാസി സമൂഹത്തിൻ്റെ സംസ്കാരവും അവർ ഈ രാജ്യത്തിന് നൽകിയ സംഭാവനകളും ദിവസവും ആദരിക്കപ്പെടണം. രാഷ്ട്രീയ മേഖലയിൽ പ്രാദേശിക, സംസ്ഥാന, ദേശീയ തലങ്ങളിൽ കൂടുതൽ ഇന്ത്യൻ വംശജർ കടന്നുവന്നാൽ മാത്രമേ വ്യവസ്ഥിതിയിൽ മാറ്റം കൊണ്ടുവരാൻ സാധിക്കൂ എന്ന് അദ്ദേഹം വ്യക്തമാക്കി.
ഇന്ത്യക്കാർക്കും ഹിന്ദുക്കൾക്കുമെതിരെ നടക്കുന്ന അതിക്രമങ്ങളെ ശക്തമായി പ്രതിരോധിക്കുമെന്ന് ഇല്ലിനോയിയിൽ നിന്നുള്ള കോൺഗ്രസ് അംഗമായ രാജാ കൃഷ്ണമൂർത്തി പ്രഖ്യാപിച്ചു. തന്നെ രാജ്യം കടത്താൻ വിദ്വേഷവാദികൾ ആവശ്യപ്പെട്ട സംഭവം ഓർമ്മിപ്പിച്ചുകൊണ്ട്, “ഞങ്ങൾ ഇവിടെത്തന്നെ കാണും, ഈ രാജ്യത്തിൻ്റെ സാമൂഹിക ഘടനയുടെ അവിഭാജ്യ ഘടകമാണ് ഞങ്ങൾ” എന്ന് അദ്ദേഹം ഉറപ്പിച്ചു പറഞ്ഞു.
ടെക്സാസിലെ ഫ്രിസ്കോയിൽ അടുത്തിടെ തീവ്രവാദ ഗ്രൂപ്പുകൾ ഇന്ത്യൻ പതാക കീറുകയും “ഇന്ത്യയിലേക്ക് തിരികെ പോകൂ” എന്ന് മുദ്രാവാക്യം വിളിക്കുകയും ചെയ്ത സംഭവം അദ്ദേഹം ചൂണ്ടിക്കാണിച്ചു. ഇത്തരം വിവേചനങ്ങൾ ആർക്കെതിരെ ഉണ്ടായാലും ഒന്നിച്ച് എതിർക്കണം.
അമേരിക്കയിലെ ഏറ്റവും മികച്ച വിദ്യാഭ്യാസമുള്ളതും സമ്പന്നവുമായ സമൂഹങ്ങളിലൊന്നാണ് ഇന്ത്യൻ വംശജരെന്നും കൃഷ്ണമൂർത്തി ചൂണ്ടിക്കാട്ടി. യുഎസിലെ ഡോക്ടർമാരിൽ 10 ശതമാനവും ഇന്ത്യൻ വംശജരാണ്. കൂടാതെ അവിടുത്തെ ഹോട്ടലുകളുടെയും മോട്ടലുകളുടെയും 60 ശതമാനത്തോളം ഉടമസ്ഥതയും പ്രവാസികൾക്കാണ്. ഡെമോക്രാറ്റ്, റിപ്പബ്ലിക്കൻ അല്ലെങ്കിൽ സ്വതന്ത്രർ എന്നിങ്ങനെ രാഷ്ട്രീയ ഭേദമന്യേ സിറ്റി കൗൺസിലുകളിലേക്കും സ്റ്റേറ്റ് ലെജിസ്ലേച്ചറുകളിലേക്കും യുഎസ് പാർലമെൻ്റിലേക്കും പ്രവാസികൾ മത്സരിക്കേണ്ട സമയമാണിതെന്നും അദ്ദേഹം കൂട്ടിച്ചേർത്തു.
Hate campaign against people of Indian origin: US Congress members call on expatriates to enter politics in America
