ലണ്ടൻ: പാകിസ്ഥാൻ മുൻ പ്രധാനമന്ത്രിയും മുൻ ക്രിക്കറ്റ് താരവുമായ ഇമ്രാൻ ഖാൻ്റെ മുൻഭാര്യയും പ്രശസ്ത ബ്രിട്ടീഷ് ചലച്ചിത്ര നിർമാതാവുമായ ജെമീമ ഗോൾഡ്സ്മിത്ത് (52) വീണ്ടും വിവാഹിതയായി. ഐറിഷ്-ഓസ്ട്രേലിയൻ ശതകോടീശ്വരനും പ്രമുഖ ധനകാര്യ വിദഗ്ധനുമായ കാമറൂൺ ഒറെയ്ലിയാണ് (62) വരൻ. ലണ്ടനിൽ വെച്ച് നടന്ന ലളിതമായ സ്വകാര്യ ചടങ്ങിലായിരുന്നു വിവാഹം.
ജെമീമയുടെ സഹോദരൻ ബെൻ ഗോൾഡ്സ്മിത്തിന്റെ ഭാര്യ ജെമീമ ജോൺസ് ഇൻസ്റ്റാഗ്രാമിലൂടെ വിവാഹചിത്രങ്ങൾ പങ്കുവെച്ചതോടെയാണ് വാർത്ത പുറംലോകമറിഞ്ഞത്. ദീർഘകാലമായി ലണ്ടൻ കേന്ദ്രീകരിച്ച് സിനിമ-ഡോക്യുമെന്ററി നിർമാണ രംഗത്ത് സജീവമായ ജെമീമയും, ഇൻവെസ്റ്റ്മെന്റ് കമ്പനിയായ ‘ബയാർഡ് കാപ്പിറ്റലിന്റെ’ സ്ഥാപകനായ കാമറൂൺ ഒറെയ്ലിയും കഴിഞ്ഞ ഒരു വർഷത്തോളമായി പ്രണയത്തിലായിരുന്നു. പ്രശസ്ത ഐറിഷ് മാധ്യമ വ്യവസായി സർ ആന്റണി ഒറെയ്ലിയുടെ മകനാണ് കാമറൂൺ.
1995-ലായിരുന്നു ജെമീമയും ഇമ്രാൻ ഖാനും തമ്മിലുള്ള വിവാഹം. ഇമ്രാനുമായുള്ള വിവാഹശേഷം ഇസ്ലാം മതം സ്വീകരിച്ച ജെമീമ ഒൻപത് വർഷത്തോളം പാകിസ്ഥാനിലാണ് ജീവിച്ചത്. തുടർന്ന് 2004-ൽ ഇവർ ഔദ്യോഗികമായി വേർപിരിഞ്ഞു. ഇമ്രാൻ ഖാനുമായുള്ള ബന്ധത്തിൽ സുലൈമാൻ, കാസിം എന്നിങ്ങനെ രണ്ട് ആൺമക്കളുണ്ട്.
ആദ്യ വിവാഹബന്ധം വേർപിരിഞ്ഞ് 22 വർഷങ്ങൾക്ക് ശേഷമാണ് ജെമീമയുടെ ഈ രണ്ടാം വിവാഹം. വിവാഹശേഷം ലണ്ടനിലും സ്വിറ്റ്സർലൻഡിലുമായി താമസമാക്കാനാണ് ഇരുവരുടെയും തീരുമാനം.
Imran Khan’s ex-wife Jemima Goldsmith has remarried; the groom is Irish financial expert Cameron O’Reilly.
