സാൻ ഫ്രാൻസിസ്കോ: അമേരിക്കൻ സ്വപ്നങ്ങൾ തേടി കടൽ കടക്കുന്ന ലക്ഷക്കണക്കിന് പ്രൊഫഷണലുകൾക്ക് ഒരു പാഠപുസ്തകമാണ് ഇന്ത്യൻ വംശജനായ സംരംഭകൻ നികിൻ തരൻ്റെ ജീവിതം. കഠിനാധ്വാനം കൊണ്ട് സ്റ്റാർട്ടപ്പുകൾ കെട്ടിപ്പടുക്കാമെങ്കിലും, അവിടുത്തെ സങ്കീർണ്ണമായ കുടിയേറ്റ നിയമങ്ങൾ ശരിയായി മനസ്സിലാക്കിയില്ലെങ്കിൽ ആ സ്വപ്നങ്ങൾ പാതിവഴിയിൽ തകർന്നേക്കാം. ഒ-1 വിസയുണ്ടായിട്ടും ഗ്രീൻ കാർഡ് നിഷേധിക്കപ്പെട്ട തൻ്റെ അനുഭവം പങ്കുവെച്ചുകൊണ്ട് കുടിയേറ്റ പ്രക്രിയയിലെ ‘ബ്ലൈൻഡ് സ്പോട്ടുകളെ’ കുറിച്ച് അദ്ദേഹം മുന്നറിയിപ്പ് നൽകുന്നു.”
നോർത്ത് ഈസ്റ്റേൺ യൂണിവേഴ്സിറ്റിയിൽ നിന്ന് സ്കോളർഷിപ്പ് ലഭിച്ചതിനെത്തുടർന്ന് 16-ാം വയസ്സിലാണ് തരൻ യുഎസിലേക്ക് താമസം മാറിയത്. സ്റ്റാർട്ടപ്പ് ലോകത്തേക്ക് പ്രവേശിക്കുന്നതിന് മുമ്പ് അദ്ദേഹം അഡ്വാൻസ്ഡ് റേഡിയേഷൻ ഡിറ്റക്ഷൻ സിസ്റ്റങ്ങളിൽ ജോലി ചെയ്തു. അഞ്ച് സുഹൃത്തുക്കളോടൊപ്പം ചേർന്ന് അദ്ദേഹം ‘മെഡ്സിക്സ്’ എന്ന മെഡ്ടെക് സ്റ്റാർട്ടപ്പിന് രൂപം നൽകി. ഈ സംരംഭം രണ്ട് എംഐടി അവാർഡുകൾ കരസ്ഥമാക്കിയിട്ടുണ്ട്. തുടർന്ന് ‘ഗ്രീൻകാർഡ് ഇൻക്’, ഉയർന്ന വൈദഗ്ധ്യമുള്ള കുടിയേറ്റക്കാരെ അഡ്മിഷൻ, താമസം, ജോലി, വിസ നടപടികൾ എന്നിവയിൽ സഹായിക്കുന്ന പ്ലാറ്റ്ഫോമായ ‘ഓപ്പൺ വെഞ്ച്വർ’ ഉൾപ്പെടെ നിരവധി സംരംഭങ്ങൾ അദ്ദേഹം സഹ-സ്ഥാപിച്ചു.
തൻ്റെ ആദ്യകാലങ്ങളെക്കുറിച്ച് തരൻ പറയുന്നത് ഇങ്ങനെ: “ശാസ്ത്രത്തിലും ഇന്നൊവേഷനിലും താൽപ്പര്യമുള്ള ഒരു കുട്ടിയായാണ് ഞാൻ ബംഗളൂരുവിൽ വളർന്നത്. കൗമാരപ്രായത്തിൽ തന്നെ സർക്യൂട്ടുകൾ നിർമ്മിക്കാനും ചിപ്പുകളും ബോർഡുകളും നിർമ്മിക്കാനും ഞാൻ പഠിച്ചു. എന്റെ മാതാപിതാക്കൾ വളരെ പുരോഗമന ചിന്താഗതിക്കാരായിരുന്നു. പഠനത്തിൽ ഞാൻ മുന്നിലാണെന്ന് കണ്ട അവർ എന്നെ ഹോംസ്കൂൾ (വീട്ടിലിരുന്ന് പഠിപ്പിക്കുക) ചെയ്യാൻ തുടങ്ങി. പത്താം ക്ലാസ് പരീക്ഷ എഴുതാനുള്ള പ്രായപരിധി ഇല്ലാതിരുന്നതിനാൽ, യുകെ ബോർഡിൻ്റെ ഐജിസിഎസ്ഇ പത്താം ക്ലാസ് പരീക്ഷ പ്രൈവറ്റ് കാൻഡിഡേറ്റായി ഞാൻ എഴുതി. അതിൽ വിജയിച്ച ശേഷം, സാധാരണ പ്രായത്തേക്കാൾ രണ്ട് വർഷം മുമ്പ് തന്നെ ഞാൻ പതിനൊന്നാം ക്ലാസിൽ ചേർന്നു.” വിദേശത്ത് പഠിക്കണമെന്ന തൻ്റെ ആഗ്രഹത്തിന് സാമ്പത്തിക പരിമിതികൾ തടസ്സമായിരുന്നുവെന്നും, പിന്നീട് സ്കോളർഷിപ്പ് ലഭിച്ചതോടെയാണ് യുഎസിൽ പഠിക്കാൻ സാധിച്ചതെന്നും അദ്ദേഹം പറഞ്ഞു.
കരിയറിനെ ബാധിച്ച ‘ബ്ലൈൻഡ് സ്പോട്ട്’
“നമ്മൾ എല്ലാം കൃത്യമായി ചെയ്യുന്നുണ്ടെങ്കിൽ, നമ്മുടെ മേഖലയിൽ മികവ് പുലർത്തുന്നുണ്ടെങ്കിൽ കുടിയേറ്റ നടപടികൾ താനേ ശരിയാകുമെന്ന് നമ്മൾ വിചാരിക്കും. ഇതാണ് ഈ പ്രക്രിയയിലെ ഏറ്റവും വലിയ ‘ബ്ലൈൻഡ് സ്പോട്ട്’,” നികിൻ പറയുന്നു. ഈ അശ്രദ്ധ തൻ്റെ കരിയറിനെത്തന്നെ തകർക്കുന്ന അവസ്ഥയിൽ എത്തിയെന്നും അദ്ദേഹം കൂട്ടിച്ചേർത്തു. രണ്ട് തവണ അപേക്ഷകൾ നിരസിക്കപ്പെട്ടതിന് ശേഷം, ഉദ്യോഗസ്ഥർ കൃത്യമായി എന്താണ് ആവശ്യപ്പെടുന്നത് എന്ന് മനസ്സിലാക്കിയതാണ് മൂന്നാം ശ്രമത്തിൽ വിജയമായത്.
ഒ-1 വിസ വേഗത്തിൽ അനുവദിക്കപ്പെട്ടെങ്കിലും, ഇബി-1 വിഭാഗത്തിന് കീഴിലുള്ള ഗ്രീൻ കാർഡ് അപേക്ഷകൾ ആവർത്തിച്ച് നിരസിക്കപ്പെട്ടു. “നമ്മൾ എല്ലാവർക്കുമുള്ള ഒരു അന്ധമായ വിശ്വാസമാണിത്. നമ്മൾ എല്ലാം കൃത്യമായി ചെയ്യുകയും നമ്മുടെ മേഖലയിൽ മികവ് പുലർത്തുകയും ചെയ്താൽ ബാക്കിയെല്ലാം താനേ ശരിയാകുമെന്ന് നമ്മൾ കരുതും. എന്നാൽ എന്നെ സംബന്ധിച്ചിടത്തോളം അത് കരിയറിനെത്തന്നെ തകർക്കുന്ന അവസ്ഥയിലെത്തിച്ചു,” അദ്ദേഹം പറഞ്ഞു. “കുടിയേറ്റ സംബന്ധമായ തടസ്സങ്ങളെ ഒരിക്കലും നിസ്സാരമായി കാണരുത്. അത് നിങ്ങളുടെ കരിയറിനെയും സാമ്പത്തിക ഭദ്രതയെയും പാടേ തകർത്തേക്കാം,” അദ്ദേഹം കൂട്ടിച്ചേർത്തു.
ഈ പ്രക്രിയയിൽ തരന് നിരവധി തിരിച്ചടികൾ നേരിടേണ്ടി വന്നു. “എനിക്ക് എപ്പോഴും വർക്ക് ഓതറൈസേഷൻ ഉണ്ടായിരുന്നു. എങ്കിലും ഗ്രീൻ കാർഡ് നടപടികൾ വളരെ തളർത്തുന്നതായിരുന്നു. ആദ്യ തവണ അപേക്ഷിച്ചപ്പോൾ ആർഎഫ്ഇ (RFE – Request for Evidence) ലഭിച്ചു, അത് പിന്നീട് നിരസിക്കപ്പെട്ടു. രണ്ടാം തവണയും അപേക്ഷ തള്ളിപ്പോയി. മൂന്നാം തവണ മാത്രമാണ് എനിക്ക് അംഗീകാരം ലഭിച്ചത്,” അദ്ദേഹം പറഞ്ഞു.
അനിശ്ചിതത്വം നിറഞ്ഞ ആ കാലത്തെ ഉത്കണ്ഠയെക്കുറിച്ചും അദ്ദേഹം സംസാരിച്ചു. “ഇത് ശരിയായില്ലെങ്കിൽ ഞാൻ എങ്ങനെ ഈ രാജ്യത്ത് തുടരും, എൻ്റെ സ്റ്റാർട്ടപ്പുകൾക്ക് എന്ത് സംഭവിക്കും എന്നതിനെക്കുറിച്ചെല്ലാം എനിക്ക് ആശങ്കയുണ്ടായിരുന്നു. എൻ്റെ കരിയറിനും യുഎസിലെ ജീവിതത്തിനും ഇത് ഉണ്ടാക്കുന്ന വലിയ റിസ്കിനെ ഞാൻ കുറച്ചുകാണുകയായിരുന്നു.”
കോവിഡ് കാലത്തെ മെഡിക്കൽ സാങ്കേതികവിദ്യയിലെ പ്രവർത്തനങ്ങൾ ഉൾപ്പെടെ ശക്തമായ പ്രൊഫഷണൽ നേട്ടങ്ങൾ ഉണ്ടായിരുന്നിട്ടും, അപേക്ഷകൾ നിരസിക്കപ്പെട്ടത് അദ്ദേഹത്തെ ആശയക്കുഴപ്പത്തിലാക്കി. “രണ്ടാമത്തെ ആർഎഫ്ഇയിൽ അവർക്ക് കൃത്യമായി എന്താണ് വേണ്ടതെന്ന് പറഞ്ഞിരുന്നു. ഉദാഹരണത്തിന്, ഞാൻ നിരവധി ഹാക്കത്തോണുകളിൽ പങ്കെടുത്തിരുന്നു. അതിനാൽ അവർ പിയർ റിവ്യൂകൾ, കേസ് സ്റ്റഡികൾ, പ്രസിദ്ധീകരിച്ച പേപ്പറുകൾ എന്നിവ ആവശ്യപ്പെട്ടു. നമ്മൾ ശക്തമെന്ന് കരുതുന്ന വിവരങ്ങൾ നൽകുന്നതിന് പകരം, അവർ ചോദിക്കുന്ന കാര്യങ്ങൾ നൽകിക്കൂടെ എന്ന് ഞാൻ അഭിഭാഷകനോട് ചോദിച്ചു,” അദ്ദേഹം പറഞ്ഞു.
ആ മാറ്റമാണ് ഒടുവിൽ അദ്ദേഹത്തിൻ്റെ മൂന്നാം അപേക്ഷ വിജയിക്കാൻ സഹായിച്ചത്. യുവ സംരംഭകർ നെറ്റ്വർക്കിംഗിലും പുതിയ കാര്യങ്ങൾ പഠിക്കുന്നതിലും വിട്ടുവീഴ്ച ചെയ്യരുതെന്ന് തരൻ ഇപ്പോൾ ഉപദേശിക്കുന്നു. “ഉടനടി ഫലങ്ങൾ കണ്ടില്ലെങ്കിലും, നിങ്ങളുടെ കാഴ്ചപ്പാടുകൾക്ക് അനുയോജ്യമായ ആളുകളെ നിങ്ങൾ കണ്ടുമുട്ടും. ശ്രമിച്ചുകൊണ്ടേയിരിക്കുക, അതിനുള്ള ഫലം ലഭിക്കും,” അദ്ദേഹം പറഞ്ഞു.
കുടിയേറ്റ സംബന്ധമായ തടസ്സങ്ങളെ നിസ്സാരമായി കാണരുതെന്നും യുവ സംരംഭകർ കൃത്യമായ രേഖകളും നെറ്റ്വർക്കിംഗും ഉറപ്പാക്കണമെന്നും നികിൻ തരൻ ഉപദേശിക്കുന്നു.
Indian entrepreneur on his immigration struggle, denied green card despite having O-1 visa
