ടെഹ്റാൻ: അമേരിക്കയുമായുള്ള ചർച്ചകൾ പാകിസ്ഥാൻ എന്ന മധ്യസ്ഥൻ വഴി ഇപ്പോഴും തുടരുകയാണെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായ് വാർത്താ സമ്മേളനത്തിൽ അറിയിച്ചു. നിലവിൽ പ്രഖ്യാപിച്ചിട്ടുള്ള രണ്ടാഴ്ചത്തെ വെടിനിർത്തൽ കാലാവധി അവസാനിക്കാറായ സാഹചര്യത്തിൽ, അത് നീട്ടുന്ന കാര്യത്തിൽ ഇറാൻ ഇതുവരെ ഔദ്യോഗികമായി ഉറപ്പുനൽകിയിട്ടില്ല. നയതന്ത്ര ശ്രമങ്ങളിൽ അമേരിക്ക എത്രത്തോളം ആത്മാർത്ഥത പുലർത്തുന്നുണ്ട് എന്നത് ഇനിയും തെളിയേണ്ടതുണ്ടെന്ന് ഇറാന്റെ ഔദ്യോഗിക വാർത്താ ഏജൻസിയായ ഐആർഎൻഎ റിപ്പോർട്ട് ചെയ്യുന്നു.
വാഗ്ദാനങ്ങൾ പാലിക്കുന്നതിൽ പരാജയപ്പെടുക മാത്രമല്ല, ചർച്ചകളുടെ അടിസ്ഥാനം തന്നെ അമേരിക്ക പലപ്പോഴും തകർക്കുകയാണെന്നും ബഗായ് കുറ്റപ്പെടുത്തി. ചർച്ചകൾക്കായി ഇറാൻ പുതിയ നിർദ്ദേശങ്ങളൊന്നും മുന്നോട്ടുവെച്ചിട്ടില്ലെന്നും നേരത്തെ സമർപ്പിച്ച 10 ഇന സമാധാന പദ്ധതിയിൽ ഉറച്ചുനിൽക്കുകയാണെന്നും വക്താവ് വ്യക്തമാക്കി. അമേരിക്കയുടെ ചില ആവശ്യങ്ങൾ തികച്ചും അവിശ്വസനീയവും യാഥാർത്ഥ്യബോധമില്ലാത്തതുമാണെന്നും അദ്ദേഹം ചൂണ്ടിക്കാട്ടി.
സമാധാനപരമായ ആവശ്യങ്ങൾക്കായി യുറേനിയം സമ്പുഷ്ടമാക്കാനുള്ള തങ്ങളുടെ അവകാശത്തിൽ വിട്ടുവീഴ്ചയില്ലെന്ന് ഇറാൻ ആവർത്തിച്ചു. ആണവായുധങ്ങൾ ഉപേക്ഷിക്കുക, സമ്പുഷ്ടീകരിച്ച യുറേനിയം കൈമാറുക, പ്രതിരോധ ശേഷിയിൽ നിയന്ത്രണം ഏർപ്പെടുത്തുക, ഹോർമുസ് കടലിടുക്ക് വീണ്ടും തുറക്കുക തുടങ്ങിയ 15 ഇന നിർദ്ദേശങ്ങളാണ് അമേരിക്ക മുന്നോട്ടുവെച്ചിട്ടുള്ളത്. ഇരുരാജ്യങ്ങളും തങ്ങളുടെ നിലപാടുകളിൽ ഉറച്ചുനിൽക്കുന്നത് ചർച്ചകളെ കൂടുതൽ സങ്കീർണ്ണമാക്കുകയാണ്. വരും ദിവസങ്ങളിലെ നീക്കങ്ങൾ പശ്ചിമേഷ്യൻ സമാധാനത്തിന് ഏറെ നിർണ്ണായകമാണ്.
