വാഷിംഗ്ടൺ: തന്ത്രപ്രധാനമായ ഹോർമുസ് കടലിടുക്കിൽ വാണിജ്യ ചരക്കുകപ്പലിന് നേരെ ഇറാൻ നടത്തിയ ഡ്രോൺ ആക്രമണത്തിന് പിന്നാലെ, ഇറാനിലെ സൈനിക കേന്ദ്രങ്ങൾ ലക്ഷ്യമിട്ട് യു.എസ് സൈന്യത്തിൻ്റെ ശക്തമായ വ്യോമാക്രമണം. ഇരുരാജ്യങ്ങളും തമ്മിൽ ഈമാസം ഒപ്പുവെച്ച താൽക്കാലിക വെടിനിർത്തൽ കരാർ ഇറാൻ ‘വിഡ്ഢിത്തം നിറഞ്ഞ രീതിയിൽ ലംഘിച്ചു’ എന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് കുറ്റപ്പെടുത്തിയതിന് തൊട്ടുപിന്നാലെയാണ് യു.എസ് തിരിച്ചടി നൽകിയത്.
#WATCH | On whether there will be consequences for Iran's violation of the ceasefire agreement, US President Donald Trump says, "You will find out. I don't like the fact that they took a shot yesterday, actually, four. We knocked down three… A very expensive ship took a little… pic.twitter.com/O6uHx6RSN1
— ANI (@ANI) June 26, 2026
വ്യാഴാഴ്ച ഹോർമുസ് കടലിടുക്കിലൂടെ ഒമാൻ തീരം വഴി കടന്നുപോവുകയായിരുന്ന സിംഗപ്പൂർ പതാകയുള്ള ‘എം.വി. എവർ ലൗലി’ എന്ന വലിയ ചരക്കുകപ്പലിന് നേരെ ഇറാൻ നാല് വൺ-വേ അറ്റാക്ക് ഡ്രോണുകൾ വിക്ഷേപിക്കുകയായിരുന്നു. ഇതിൽ ഒരു ഡ്രോൺ കപ്പലിൻ്റെ മുകൾത്തട്ടിൽ ഇടിച്ചതിനെ തുടർന്ന് നാശനഷ്ടങ്ങളുണ്ടായെങ്കിലും ആർക്കും പരിക്കേറ്റിട്ടില്ല. ബാക്കി മൂന്ന് ഡ്രോണുകൾ യു.എസ് സേന വെടിവെച്ചിട്ടു. കേടുപാടുകൾ സംഭവിച്ചെങ്കിലും കപ്പലിന് യാത്ര തുടരാൻ സാധിച്ചു.
ഈ ആക്രമണത്തിന് മറുപടിയായി ഇറാൻ്റെ മിസൈൽ, ഡ്രോൺ സംഭരണ കേന്ദ്രങ്ങളും തീരദേശ റഡാർ സംവിധാനങ്ങളും ലക്ഷ്യമിട്ടാണ് യു.എസ് സെൻട്രൽ കമാൻഡ് (CENTCOM) യുദ്ധവിമാനങ്ങൾ ഉപയോഗിച്ച് ആക്രമണം നടത്തിയത്. വാണിജ്യ കപ്പലുകളെ ലക്ഷ്യമിട്ടുള്ള ഇറാൻ്റെ നടപടി നിലവിലുള്ള വെടിനിർത്തൽ കരാറിൻ്റെ വ്യക്തമായ ലംഘനമാണെന്നും, അന്താരാഷ്ട്ര കപ്പൽ ഗതാഗത സ്വാതന്ത്ര്യത്തെ തകർക്കുന്ന ഇത്തരം നീക്കങ്ങൾക്കെതിരെ മേഖലയിൽ സുരക്ഷ ശക്തമാക്കുമെന്നും യു.എസ് സൈന്യം പ്രസ്താവനയിലൂടെ അറിയിച്ചു.
“ഇന്നലെ അവർ ആക്രമണം നടത്തിയത് ഒട്ടും ശരിയായില്ല. അവർ വലിയൊരു തെറ്റാണ് ചെയ്തത്, ഇതിനുള്ള യു.എസ് മറുപടി എന്താണെന്ന് ഉടൻ തന്നെ ലോകം അറിയും,” എന്ന് വൈറ്റ് ഹൗസിൽ വാർത്താലേഖകരോട് സംസാരിക്കവെ ട്രംപ് മുന്നറിയിപ്പ് നൽകി.
ആഗോളതലത്തിൽ വിതരണം ചെയ്യുന്ന എണ്ണയുടെയും ദ്രവീകൃത പ്രകൃതിവാതകത്തിൻ്റെയും (എൽഎൻജി) അഞ്ചിലൊന്നും കടന്നുപോകുന്ന ലോകത്തിലെ ഏറ്റവും പ്രധാനപ്പെട്ട ഊർജ്ജ ഇടനാഴിയാണ് ഹോർമുസ് കടലിടുക്ക്. ഇരുരാജ്യങ്ങളും തമ്മിലുള്ള ശത്രുത അവസാനിപ്പിക്കുന്നതിനായി ഈ മാസം ഒപ്പുവെച്ച 14-ഇന ധാരണാപത്രം നിലനിൽക്കെയാണ് ഈ പുതിയ സൈനിക നീക്കം എന്നതിനാൽ അന്താരാഷ്ട്ര തലത്തിൽ വലിയ ആശങ്കയ്ക്ക് ഇത് കാരണമായിട്ടുണ്ട്.
Iran’s drone attack on ship in the Strait of Hormuz; US military retaliates with strong response
