വാഷിംഗ്ടൺ: ഇറാൻ യുദ്ധത്തിന് ശേഷം അമേരിക്കയുടെ അടുത്ത ലക്ഷ്യം ക്യൂബയായിരിക്കുമെന്ന ശക്തമായ സൂചന നൽകി യുഎസ് പ്രസിഡന്റ് ഡോണൾഡ് ട്രംപ്. ഇറാനിൽ നിന്ന് മടങ്ങുന്ന അമേരിക്കൻ യുദ്ധക്കപ്പലുകൾ ക്യൂബൻ തീരത്ത് ചെറിയ ‘സ്റ്റോപ്പ്ഓവർ’ (ഇടത്താവളം) നടത്തിയേക്കുമെന്നാണ് ട്രംപിന്റെ പുതിയ വെളിപ്പെടുത്തൽ. യുഎസ് സ്റ്റേറ്റ് സെക്രട്ടറി മാർക്കോ റൂബിയോ ക്യൂബയുമായി ഒരു കരാറിലെത്തുന്നതിന് മുന്നോടിയായിട്ടായിരിക്കും ഈ സൈനിക നീക്കമെന്നും അദ്ദേഹം സൂചിപ്പിച്ചു.
സൗത്ത് ഫ്ലോറിഡയിൽ നടന്ന തിരഞ്ഞെടുപ്പ് റാലിയിലാണ് ട്രംപ് ഇക്കാര്യം വ്യക്തമാക്കിയത്. ഇറാൻ യുദ്ധ പശ്ചാത്തലത്തിൽ ഇന്ധനം, പലചരക്ക് സാധനങ്ങൾ എന്നിവയുൾപ്പെടെയുള്ള അവശ്യവസ്തുക്കളുടെ വിലക്കയറ്റത്തിൽ അമേരിക്കൻ വോട്ടർമാർ ആശങ്കാകുലരായിരിക്കുന്ന സാഹചര്യത്തിലാണ്, യുഎസ് ഇടക്കാല തിരഞ്ഞെടുപ്പിന് തൊട്ടുമുമ്പ് ട്രംപിന്റെ ഈ പ്രസ്താവന പുറത്തുവരുന്നത്. “നമ്മൾ അവിടെ ഒരു ചെറിയ സ്റ്റോപ്പ്ഓവർ നടത്തും. ആ മനോഹരമായ കപ്പലുകൾ ക്യൂബൻ തീരത്ത് നിന്ന് ഏകദേശം 50 വാര അകലെയായി നിർത്തിയിടും,” ട്രംപ് റാലിയിൽ പറഞ്ഞു.
ക്യൂബയിലെ കമ്മ്യൂണിസ്റ്റ് സർക്കാരിനെതിരെ കർശന നിലപാടാണ് ട്രംപും മാർക്കോ റൂബിയോയും സ്വീകരിച്ചുപോരുന്നത്. മുൻ ക്യൂബൻ നേതാവ് റൗൾ കാസ്ട്രോയ്‌ക്കെതിരെ ക്രിമിനൽ കുറ്റങ്ങൾ ചുമത്തിയതിന് പിന്നാലെ, കഴിഞ്ഞ മെയ് മാസത്തിലും ഇരുവരും ക്യൂബയിൽ സൈനിക ഇടപെടൽ നടത്താനുള്ള സാധ്യതകളെക്കുറിച്ച് സംസാരിച്ചിരുന്നു. അമേരിക്കയുടെ ദേശീയ സുരക്ഷയ്ക്ക് ക്യൂബ ഭീഷണിയാണെന്നാണ് റൂബിയോയുടെ വാദം. ഇതിന് പിന്നാലെ, ക്യൂബയിൽ മാറ്റം ആഗ്രഹിക്കുന്നവർ സിഐഎയുമായി ചേർന്ന് പ്രവർത്തിക്കണമെന്ന് റൂബിയോ സോഷ്യൽ മീഡിയയിലൂടെ ആഹ്വാനം ചെയ്യുകയും ചെയ്തു.
അതേസമയം, കടുത്ത ഉപരോധങ്ങൾക്കിടയിലും ഇരുരാജ്യങ്ങളിലെയും ഉദ്യോഗസ്ഥർ തമ്മിൽ സമീപകാലത്ത് ചർച്ചകൾ നടത്തിയിരുന്നു. എന്നാൽ ഈ ചർച്ചകളിൽ അതൃപ്തി പ്രകടിപ്പിച്ച വാഷിംഗ്ടൺ, ക്യൂബയ്ക്ക് മേൽ വീണ്ടും ഉപരോധങ്ങൾ കടുപ്പിക്കുകയാണുണ്ടായത്. കഴിഞ്ഞ ദിവസം ഐക്യരാഷ്ട്രസഭയിൽ ക്യൂബയ്‌ക്കെതിരെയുള്ള അമേരിക്കയുടെ പതിറ്റാണ്ടുകൾ പഴക്കമുള്ള സാമ്പത്തിക ഉപരോധത്തെ അപലപിക്കുന്ന പ്രമേയം അവതരിപ്പിച്ചതുമായി ബന്ധപ്പെട്ടും ഇരുരാജ്യങ്ങളും തമ്മിൽ കടുത്ത തർക്കമുണ്ടായിരുന്നു.
2020 മുതൽ ക്യൂബ കടുത്ത സാമ്പത്തിക-ഊർജ്ജ പ്രതിസന്ധിയിലൂടെയാണ് കടന്നുപോകുന്നത്. വ്യാപകമായ വൈദ്യുതി തടസ്സവും ഭക്ഷ്യക്ഷാമവും വിലക്കയറ്റവും കാരണം ജനങ്ങൾ വലിയ ദുരിതത്തിലാണ്. നിലവിലെ പ്രതിസന്ധിയെ തുടർന്ന് ലക്ഷക്കണക്കിന് ക്യൂബൻ പൗരന്മാരാണ് രാജ്യം വിട്ട് അമേരിക്കയിലേക്ക് കുടിയേറിക്കൊണ്ടിരിക്കുന്നത്. ഈ പശ്ചാത്തലത്തിലാണ് ക്യൂബയിൽ സ്വയംഭരണം തകർന്നടിയുകയാണെന്നും ഒരു സൈനിക ഇടപെടൽ കൂടാതെ തന്നെ അവിടെ മാറ്റമുണ്ടാകുമെന്നും ട്രംപ് പ്രതീക്ഷ പ്രകടിപ്പിക്കുന്നത്.
Is Cuba the next target after a war with Iran? Trump hints at military intervention.
